Halfstarke!

Antje Heßler besöcht de Mantelmöwen

Överall in'n Fischereehaven kaamt di de Halfstarken in de Mööt. Un nich blots in'n Haven, nee, an de hele Küüst. Se maakt groten Larm un schreet un randaleert üm de Wett. Kuum dat se Platz för di maakt. Se sünd so driest, se pett di meist up de Fööt. Wo se langlatscht, liggt achterna n' Barg Schiet. Musst di vörsehn, dat du dor nich rinpettst. Mit ehr'n groten Snavel ramentert se mank de lerrigen Fischkisten. In'n Sturzfloog suust se över dien Kopp. De utbreedten Flünken sünd meist bit twee Meter breet. Kannst bang vör warrn, vör de twee- bit dreejährigen Mantelmöwen. Se hebbt bannig grote Snavels. Dörch den Haken seht se meist en Adlersnavel liek.

In Fischereehaven steiht en groten Schuppen. Baben up dat Dack sitt de Möwen dicht neveneenanner un luurt över den Haven. Ümmer wedder landt welk up dat Dack. Dorbi flattert se mit ehr groten Flunken. Welk hebbt sik ok enen Laternenpahl as Utkiek utsöcht. In de Luft schweevt ok noch en poor "Spionen". Kümmt en Fischkutter in Sicht, gifft dat glieks Alarm. De hele Schwarm störk sik denn mit groot Geschree up den Kutter. Aver dat gifft noch nix. De Fischresten kaamt eerst later över Bord.

Denn is dat endlich so wiet. De Fischer hebbt ehr'n Fang ut de Netten puult un sauber maakt. De Fischresten warrt nu in't Water smeten. Mit groot Geschree kaamt de Möven anflagen. Se stört sik all to glieke Tiet up de Fischresten. In't Water is en groot Balgeree. Se slaagt so dull mit de Flünken üm sik, dat dat Water richtig hochspütt. Dat süht ut, as wenn dat Water kaakt. Dorbi jagt se sik gegensiedig de groten Happen af. Gau slingt un würgt se de Fischstücken hindaal.

Bald weer keen Happen mehr dor, allens weer verswunnen. De Möwen flogen in de Luft un kreisten över de neegsten Fischkutter. Söchen denn wedder ehr'n Utkiek up un leggen sik up de Luur. So'n poor ganz freche Halfstarke möken sik an en Fischkist. De frischen Fisch legen fien neveneenanner in de Kist. Aver dor keem de Fischer un hett de frechen Möwen gau verjagt.

Ditt Speelwark kannst in de Hauptsaak bi uns in de Wintertied bekieken. Meisttiets sünd dat de twee- bit dreejährigen Mantelmöwen, de sik dor rümdrievt. Utmaken kannst se an ehr gries Fedderkleed. De sünd hier bi uns noch antodrapen. De Öllern sünd gröötstendeels al na'n Noorden ünnerwegens. De sünd witt mit düstergraue Flünken un enen gelen Snavel mit roden Punkt. An de Küsten vun dat Noordmeer söök se sik Placken to'n Nestbu ut.

Dat Verhollen vun de Mantelmöwen het mi neescheerig maakt. Dor müss ik mehr över weten.

Mantelmöwen (Larus marinus)

De gewaltig Mantelmööw is ut de Familie vun de Möwen (Laridae). Se kann bit to 75 cm groot warrn un kriggt dormit meist de Grööt vun en lütte Goos tostann. De utbreeten Flünken hebbt en Breed bit to 170 cm. Wegen deiht se bit to 2 kg. Se is de gröötst Möwenoort in Europa. Ehr'n Naam hett se na de düster Flunken vun ehr sünst witt Fedderkleed kregen. Se seht enen Mantel liek. De stark bagen Snavel is geel un hett vörn an de Ünnersiet enen roden Punkt. De langen Been sünd blassrosa. De jungen Mantelmöwen — uns' Halfstarken — sünd bruun un gries farvt un kriegt eerst na veer Johr dat Fedderkleed vun de Öllern. De groot Snavel is binah swatt.

Bi't Flegen hebbt se en groot Utduer un hebbt mitünner en Tempo vun 110 km/h. Dat so'n Tempo in slaten Oortschapen gor nich verlöövt is, kümmert se nich, un de Polizei kriggt se nich tofaat, ok nich bi uns an'n Haven. Se köönt bit to 23 Johr oolt warrn. Feenden hebbt se in de Natuur nich. Ehr luud un deep Schreen "ga ga" oder "kau" is nich to överhöörn.

Rümdrieven doot se sik meisttiets an de Küsten vun'n Noordatlantik. In'n Winter treckt se wieder na de Meern vun Europa. In't Binnenland söökt se geern Müllkippen up. De Fischereehavens an de Küst sünd ok beleevt.

Freten doot se meist allens. Affäll, Fisch, lütte Vagels, Eier un anner lütt Deerten staht up den Spiesplan. Se bruukt dääglich ca. 400 g Futter — klaar, so'n groot Deert. Mit ehr egen 2 kg sünd se dorgegen noch slank. Man wokeen jümmers so'n Krawall maakt, verbrennt sachs ok vele Kalorien!

Wenn se veer bit fief Johr oolt sünd, söökt se sik enen Placken wieder in'n Norden to'n Bröden. De liggt meisttiets an en Hang oder en Felsküst. In de Tiet vun April bit Juli leggt se twee bit dree Eier. Na 27 bit 29 Daag kruupt de Lütten ut dat Ei. Bit se flügge sünd, warrt se noch över acht Weken vun de Öllern pleegt.

Un denn dükert dat Jungvolk in'n Winter wedder as Halfstarke bi uns in'n Fischereehaven up!