Mars-Mission InSicht (InSight): Landung steiht bevör! van Ludgerd Lüske Plaont is, dat Mars-InSicht an'n 26. November 2018 up den Mars landet. InSicht is eine Mars-Mission, aower et is noch mehr at dat. Dei Wätenschkup kann so bäter verstaohn, wie dat freuhe Entstaohn un dei freuhe Entwicklung van aale felsigen Planeten afflöp. Bi InSicht flügg extrao eine Technologie-Demonstration mit, dei werd Mars Cube One (MarCO) neumt. Dorbi werd eine neie Oort van Daotenäöwerdrag van einen anneren Planet her utprobeiert. Dei InSicht-Mission kann uck aohne MarCO affloopen.
Fief Saoken äöwer dei Landung: 1. Dei Landung up den Mars gaiht stuur. Blots 40 Prozent van aale Marsmissionen löpen gaut aff. Dei
USA is dat einzige Land, dat ehre Marslandungen an'n besten henkreeg.
In dei dünne Atmosphäre kann ein Ruumfohrtüg sick
blots minne an dei Gasdeilkes riewen un so nich naug affbremsen.
Doch dei NASA hätt eine lange Riege van Marsmissionen mit Erfolg.
Siet 1965 flögen Sonden nao den Mars, güngen in einen
Mars-Ümloop, dön dor landen un feuherden up den Bodden
van dissen Planet.
2. InSicht landet mit eine gaut utprobeierte Technologie In dat Johr 2008 löt dat Jet Propulsion Laboratory (JPL) van dei NASA dei Phönix-Sonde naohe bi den Mars-Nordpol landen. InSicht is so bawed at dei Phönix-Sonde, dei Lockheed Martin Space bawde. Wenn et uck Ännerungen geef an dat Hitteschild un an den Fallscherm, so is dei heele Landungstechnik noch meest dei süftige: Nao dat Affspringen van dat Reisemodul gaiht et eiers in eine Schutzkapsel dör dei Atmosphäre daol. Dornao bremset ein Fallscherm un Bremsraketen dei Sonde aff, un utfeuherte Beine feddert dat Upsetten aff.
3. InSicht werd up den "gröttsten Marsparkplatz" landen. Dei Forschkungsinstrumente van InSicht häbbt den Vördeil,
dat sei beste Daoten upnähmen käönt, bold egaol,
wor dei up den Planet sünd. So bruuket InSicht blots einen
lieken, stabilen Bodden, wor blots aff un an ein poor Steine off
Felsen ligget. Dorümme hätt sick dei Missionsmannschkup
dat Elysium Planitia, at den "gröttsten Parkplatz"
up den Mars utsöcht.
4. InSicht kann in einen Sandstorm landen. Dei Ingenieure van dei InSicht-Mannschkup häbbt ein stabilet Ruumschipp bawt, dat uck bi einen Sandstorm heele landen kann. Dat Hitteschild is dick naug, dat et den "Sandstraohl" van den fleigen Stoff uthollen kann. Dei Sonden-Fallscherm wörd so van dat Phönixmodell affännert, dat dei mit eine gröttere Gägendrifft fardig werd, dei bi sükke atmosphärischke Sandstorm-Bedingungen upträen kann. För dat Inträen in dei Atmosphäre, dat Affstiegen
un dei Lande-Sequenz giff et ein flexiblet Programm, dat mit ein
wesseln Weer ümmegaohn kann. Dei Inspektionslüe krieget
in dei Daoge vör dei Landung staodig neie Weer-Daoten van dei
NASA-Mars-Erkundungssonde. So kann sei bi dat Fallscherm-Utstöten
dei Radar-Anlaoge anpassen, dat dei Affstand tau den Marsbodden
uck pass mäten werd.
5. InSicht kann us wat lern äöwer dat Binnenwark van den Mars un van use Eern Dei InSicht-Mannschkup räket dormit, dat wi dör dat Studeiern van dat deip liggen Mars-Binnenwark lern käönt, wie annere felsige Welten, uck dei Eern un dei Maond, sick upbawden. Eern un Mars entstünnnen vör mehr at 4,5 Milliarden Johre, aower läöterhen wörd et heel anners. Worümme häbbt dei nich dat glieke Schicksaol?
Bi dei Steinplaneten häbbt wi blots dei Eern nau studeiert. Dör den Vergliek van den Eerd-Upbau mi dei Mars-Binnenlaogen dör dei InSicht-Lüe willt wi use Sünnensystem bäter begriepen. Wat dei rutfinnt helpet vellicht sogor bi dat Seuken nao eerdähnlickeExoplanten. För dei Utwaohl van sükke Exoplaneten, wor et vellicht Läben gäben kunn, is et woll uck eine Hülpe. So is InSicht woll eine Mars-Mission, aower uck väl mehr at eine reine Mars-Mission. Nu sünnt wi spannt, off uck aals klappet! |
|
Originaol NASA-Artikel hier SO-Platt: Ludgerd Lüske 25.11.2018 |