Neiwind* schall den Mars anbohren

van Ludgerd Lüske


To'n Anhören hier klicken:

Lesen deit Ludgerd Lüske in südollnborger Platt.

Se köönt de Fotos per Klick vergröttern. Trüch kaamt Se denn mit den Zurück-Knoop.

Dei ganze Neiwind-Mission op Platt: hier

Lange schall et nich mehr duuren. Neiwind hett tau'n eiersten Maol sienen Bohrer up einen Stein settet un sachte andrücket. So wull man fastestellen, of dei Kräfte, dei dorbi up den heelen Apparaot wirket, so sünd, as man dat uträket harr.

Nao dei Landung van Neiwind up den Mars dö man aale Instrumente an Bord utprobeieren. Nu is dei Bohrmaschine an dei Riege. Dei lüttke Schlagbohrer an den Roboterarm kann in den Stein bohren un denn dat Steinpulver tau'n Unnerseuken upnähmen.

Eine utsöchte Stäe kreeg den Naomen "John Klein". Dit Felsenwark schall pass wän för dissen Test. Dei Nasa-Lüe werd bi disse technischke Aktion orig rutföddert. Dat Rüsten tau dit Wark löpp up't üppste. Bi den Vör-Test wörd dei Bohrer so up den Stein drücket, as wenn dei bohren schull, dorbi gewünnt man dei nödigen Daoten van dei Kraftwirkungen. Dornao schall noch ein Vör-Test in dei Nacht afloppen. So krieget dei Mars-Forschkers uk Daoten tau dei Temperaturunnerscheide tüschken Dag un Nacht. An disse Stäe fallt dei Temperatur van näömdaogs 0° Celsius up minus 65° Celsius in dei Nacht af.

Dör disse Temperaturunnerscheide ännert sik dei Maote van dat Fohrgestell un van den Roboterarm. Dei Technikers schätzet, dat et bold 2,4 Millimeter utmaoken kann. Et schall noch mehr up disse Ort unnersöcht wern, üm mehr Künne tau kriegen äöver dat, wat dei Rovertechnik uthollen kann. Dat kann wichtig wern, wenn dei Bohrer bi dei taukaomen Aktionen eis äöver Nacht in den Fels sitten bliff. Ansik schall dat nich passeiern, Vörsicht steiht an eierste Stäe. So willt dei Nasa-Lüe uk noch mehr äöver den Taustand van den"John-Klein-Stein" rutfinnen.


Bi den Äövergang van dei Grenze tau dei "Yellowknife Bay" an'n 08. Dezember 2012 (Sol 121) kunn dei Rover don eine düütlik leeger liggen Boddentemperatur mäten.
Bild: Nasa, JPL-Caltech, University of Arizona, CAB(CSIC-INTA), FMI, afännert


Neiwind hett den Bohrer hier upsettet. Bild: Nasa / JPL-Caltech [Wietwinkelbild]

Dat Bohrexperiment geiht denn los nao einen nau fasteleggten Plaon. Tau eiers werd mit eine 2 cm deipe Bohrung dei Schlagapparaot utprobeiert. So kump noch kien Steinmähl in den Probenupnähmer van den Bohrer. Aover so käönt dei Forschkers naokieken, of dat Bohrmähl uk so utsüht, as man vörutseihn deit.

Eiers midde Februar is dei Tied pass för den Daotenverkehr tüschken Neiwind und dei Nasa-Stationen. Dat ligg doran, dat up dei Eern un up den Mars dei Daoge nich glieker lang sünd. Ein Marsdag is 40 Minuten länger as ein Eerndag. Wenn dei Daogestieden halwegs synchron loopet, denn is naug Tied dor för dei Kommunikation daogsäöver tüschken Neiwind un Nasa/JLP-Stationen. Dorup teuvet dei Nasa-Lüe mit Spannung.


Test-Bohrlock up den Mars: Neiwind hett an SOL 180 dit Lock bohrt. Dit Lock hett einen Dörmäter van 1,6 cm un et is 2 cm deip. Dat Foto wörd mit dat MAHLI-System knipset.
Bild: Nasa / JPL-Caltech / MSSS /725359main_pia16761-43

 

Farvbild van den John-Klein-Felsen. Bild: Nasa / JPL, afännert


Neiwind mit den Apparaotekopp an den Roverarm. Bild: Nasa / JPL, afännert


Apparaotekopp mit Schlagbohrmaschine un Probenbohrer. Bild: Nasa / JPL, afännert



Dei Mars-Lüe staht tau'n Helpen praot


*Neiwind = Curiosity

SO-Platt: Ludgerd Lüske
Biller: NASA
Links:
Animation
spiegel.de/flash/flash-29277.html
NASA-JPL-Original-Information


10.2.2013


na baven