Marssonde Maven
Biller van dei sick uplösen Atmosphäre

van Ludgerd Lüske


Dei neien Sonde Maven hätt Biller tau dei Atmosphäre van den Mars schicket. Dei wieset einen Planet, dei staodig wat van sien Materiaol verlüß.


Maven över den Mars. Klick op tau'n Vergröttern!

Dei Marssonde Maven hätt dei eiersten Biller van dei Atmosphäre van den anstüerten Planet schicket. Dei wieset, wo dei rode Planet staodig Waoterstoff un anneret Materiaol ut siene Atmosphäre verlüß. Dat Mäten van disse Vörgänge is dei Upgaobe van dei NASA-Mission, ehr vulle Naome is: "Mars Atmosphere and Volatile Evolution".

Dei mit den Ultraviolett-Spektrograofen upnaohmen Biller sünd van den 21. September, as dei Sonde in einen orig hogen Ümloop was. Dei wieset dat Verleisen van Waoterstoff, wat up den Mars alltied passeiert. Dit Wark sorget dörför, dat dei Mars groote Deile van sien vörmaoliget Waotervörkaomen verleisen dö un äöwergüng in ein dröget Ödland. In dei bäöweren Atmosphärenlaogen deilt dei Waoterdamp sick up in siene Element-Atome. Dornao sorget dei Sünnenwind un annere Ümstände dorför, dat ein Andeil van den lichten Waoterstoff för immer in dat All affdriff. Aower dei Suurstoff bliff meist in dei Atmoshäre äöwer.


Klick op tau'n Vergröttern! © University of Colorado / NASA, verännert

Anduuren Verlust

Dei Marssonde Maven glückden nu dei eiersten Upnaohmen van dei bäöweren Marsatmosphäre. Dei rode Planet verlüß staodig atomaren Käöhlenstoff (lünke Hand), atomaren Suurstoff (middig) un atomaren Waoterstoff (rechte Hand).

Aower uck Suurstoff- un Käöhlenstoffatome käönt dei Marsatmosphäre verlaoten, dat wieset dei Upnaohmen. Up nauere Resultaote äöwer disse Vörgänge haopet dei Missionsforschkers dör dei neien Upnaohmen, dei dei Sonde ut einen lüttkeren Affstand tau den Planet upnähmen schall.

Up ein besünneret Beläwen teuwet dei Bedriewers van Marssonden an den 19. Oktober. Denn trecket dei Komet Siding Spring an den Planet vörbie un bütt för Maven wohrhaft besünnere Indrücke.

Aale drei Mars-Sonden, Mars Odyssey, Mars Reconnaissance Orbiter un Maven schäöllt den Komet Siding Spring mit aale ehre passen Instrumente ünnerseuken. Wat dorbie aals afflöpp, kann man bekieken up disse Websiete: Siding Spring.


Link-Tipp: youtube.com/watch?v=FG4KsatjFeI
Originaol-Artikel van Jan Dönges hier; Südollnborger Platt: Ludgerd Lüske

19.10.2014


na baven