Morgenspazeergang vun Katja H. Renfert |
|
Hüüt nacht heff ik dröömt, ik wull na Hamborg-Allermöhe.
Na'n Fröhstück op mien Balkon Klock söven heff ik
denn dacht: gau noch'n Buddel Water un poor Kekse in'n Rucksack, un
denn fix af na'n Bahnhoff Dammtor. Dor keem al de S-Bahn, un 20 Minuten
later weer ik an mien Teel, Bahnstieg Allermöhe.
De beiden (dat Foto heff ik in Februar maakt) staht dor Dag un Nacht, bi Wind un Wedder un töövt op de Iesenbahn. He steiht allerdings op de een Siet, se op de annere Wat dat wull to bedüden hett? Een Fru vun den Kommunikations- un Kunstvereen Allermöhe e.V. hett mi vertellt, de Künstler Frank Voigt ut Pinnewitz hett de beiden Skulpturen 2008 maakt.
Ik gung nu de Trepp rünner, un statt na rechts to de Hüüs gung ik dütmal na links, rin in'ne Natur, de ik al vun baven vun'n Bahnstieg sehn heff. Eerst weer dat noch'n beten an Drüppeln, aver denn: de pure Sünnschien, un so kunn ik mien Rucksack mit'n Opklever vun Robin Wood "Gegen Atomkraft! Für erneuerbare Energie!" spazeeren dregen. Ofschoonst, op'n ganzen Weg heff ik man een Joggerin un twee Mannslüüd op'n Fohrrad drapen, de villicht dorop kieken kunn un över de Bottschap nadenken. Ansünsten weer ik alleen mit de veelen Vagels, de jümmerloos an singen weern. Un vör luuter Freud heff ik uk anfungen to singen: "Ich bin hinausgegangen, den Sonnenschein zu
fangen,
Nee, Bargen gifft dat dor nich, aver mi keem jüst dat Leed in'n Sinn. Wat mi besünners gefallen hett: dat Water links vun den Weg, mit Seerosen op.
Rechts kunn ik op de Feller kieken, un vör'n Tuun weern Appelbööm. Wenn de Appels riep sünd, kannst hingahn un se opsammeln!
Op mien Weg heff ik uk'n lütt Huus entdeckt Platz för Graffiti is wull överall. Baben op dat Foto is de S-Bahn to sehn, de scheet jüst achter de Bööm langs. Eerst kort vör de neegste Bahnstation, Mittlerer Landweg, weern wedder Lüüd. Vun "Hamburg-Wasser" weern se an't Arbeiden. Se wüllt Leddern in de Waterschachten anbringen, hett een vun de beiden Mannslüüd mi vertellt.
As ik denn wedder in'ne S-Bahn seet, heff ik dacht: Wo schöön is doch de Welt, wo schöön is doch mien Hamborg. |
|
3.7.2011 |