Langs den Drägerweg

vun Antje Heßler

De Drägerweg is en Rad- un Wanderweg an de Wakenitz. Rechts un links blang den Drägerweg breden sik wiede gröne Wischen ut. Unsen Spazeergang güng dörch bunte Sommerblomenfeller. Immen un Hummeln un anner lütt Insekten summen ümher.

En lütt Wanzenfleeg seet up en witt Doldenblööt vun de wilde Möhr un leet sik dat goot smecken. Se keek uns mit ehr groten roden Ogen an. Se weer nich to översehn! Dat is en Schmarotzerfleeg un se höört to de Familie vun de Raupenflegen. Se leggt ehr Eier op Raupen un de Larven leevt vun de Raupen.

Grashüppers sprüngen uns vör de Fööt. Bottervagels gaukeln vun Bloom to Bloom. Dat Waldbrettspeel harr to Recht sien Naam. Dat speel mit uns in de Ellernbüsch Versteken! Ik harr mien leve Not, den smucken Bottervagel för en Bild tofaten to kriegen. Ümmer flatter he wieder un wieder un ik leep achterna. Dorbi haken sik Himbeerranken an mien Büx fast. De Beeren lüchen mi rot an. Dor heff ik mi eerst eenmal en poor plückt un in Mund steken.

Dat weer en so richtig schönen Sommerdag. Vun wieden kunnen wi grote Deerten up de Wischen utmaken. Seker weer dat Veehtüüch vun de Buurn ut Groot Grönau. En lütt Watertümpel blenker in warmen Sünnenschien merrn in de Wischen. An't Över seten Graugöös un höllen Meddagsroh. Se harrn den Kopp ünner de Flünken. As se uns wies wörrn, geev en vun de Göös furts Alarm un all recken ehrn Kopp in de Hööch.

Langsam spazeeren wi wieder un kemen neger an de Wisch mit de groten Deerten. Dor reep mien Mann heel verwunnert ut: "Sünd wi hier in Südamerika? Dat sünd ja Nandus!" Un wohrhaftig, dat weern Nandus, en Nanduhehn un en Naduhahn. As se uns wies wöörn, kemen se an den Tuun. Sehg meist ut, as wenn se up Foder töven. Se lepen achter den Tuun ümmer hin un her. Mit ehr groten Fööt harrn de Nandus al enen richtigen Padd in de Wisch pett. Wi bleven lever en Stück achter den Tuun stahn. De Nandus weern bannig groot un harrn brede Flünken un enen langen Hals. Kunnst meist bang vör waarn.

Dor full uns in, dat in en Zuchtgehege in Groot Grönau Nandus to Huus weern. In dat Johr 2000 bröchen de Medien, dat welk utbraken weern. De sünd in de frie Wildbahn heimisch worrn un jeedeen Johr kemen welk dorto. Up de anner Siet vun de Wakenitz in Meckelnborg leevt ca. 200 Nandus. Dat is al sowiet kamen, dat dat Gelege vun de Nandus reduzeert warrn mutt. Sünst besteiht de Gefohr, dat de heimischen Deerten verdrängt warrt.

De Nandu is en Loopvagel. He kann nich flegen. Aver mit sien langen Been is he gau to Foot un kann gefährlich mit sien groten Fööt üm sik petten. Egentlich is sien Heimat Südamerika. He hett sik an uns Klima wennt un is bi uns to Turistenattrakschon woorn. De Nandu dörf hier bi uns nich jaagt waarn.

De Spazeergang langs den Drägerweg hett uns goot gefullen. Wi hebbt veel Schöönes in de Natuur to sehn kregen. Dat is seker nich dat letzt Mal, dat wi dor lang spazeert sünd.