De Ingang na den Hoff. Na wenn dat keen Inladen is!

Opas Buernhoff "Bioland"

vun Antje Heßler

Frisches Grööntüüch un Kantüffeln weern bi uns al worrn. Wi müssen mal wedder in den Klützer Winkel na Opas Buernhoff "Bioland". Vörbi an en groten, lüchend gelen Slaag güng uns Fohrt na Neuenhagen. "Dat sehg ja meist en Rapsfeld liek", meen mien Mann. Aver dat weer en Sempfeld. An de Dassower Straat wies uns denn en grotes Schild "Bauernhof Bioland" den richtigen Weg.

Nanu, Raps? Nee, Semp!

Hallo Opa, di besöökt wi doch glieks mal!

Dat fangt ja good an!

To geern kiekt wi uns ok up den Hoff üm. Wi dükern ümmer in en anner Welt. Dat Veehtüüch, de Goorn un allens ümrüm möök uns groten Spass. Al vun Wieden wöörn wi vun de schnatternden Göös begrööt.

Achter den Stall leeg en Sau mit lütte Farken. De kregen jüüst ehr Melk. Wi kunnen uns vun den Anblick gor nich trennen.

De Gössel sünd ja gans good...

...aver de Söög mit de lütten Farken is doch allerleevst!

Mahltied!

Aver denn güng dat na dat Huus un in den Laden. Dor geev dat frisches Grööntüüch ut den Kruutgoorn un meckelnborger Kantüffeln legen in en Holtkist, de harrn wi nülich al köfft. De smeckten uns besünners goot. In en Regal leeg sülvs backtes Broot.

Dorto de frischen Eier vun "freilaufenden Hühnern". För de Höhner, dat weern wull an föftig Stück, geev dat enen Höhnerhoff. Meern mank de stolte Hahn!

De Hahn kümmt mal wedder to laat!

De roden Tomaten, de Appeln un Birn un groten Körbis stünnen al an den Huusingang. De Körbis weern even mit Peerd un Wagen vun't Feld halt woorn. Se lüchen goldgeel in den Sünnenschien.

Un in den Laden stünnen up en Schapp ok noch Gläser mit Plummenmuus, so as mien Modder dat maakt hett. För uns weer de Inkoop ümmer en Festdaag.

Dat letzt Mal full uns bi unsen Rundgang över den Hoff achter den Stall en groten Slaag mit roden Kleever up. Wat dat up sik harr, müssen wi Opa fragen. He hett uns denn verkloort, dat de Kleever as Grööndünger ünnerplöögt warrd. Dat is goot för den Bodden, dat lockert em up un föhrt em ok Stickstoff to. De Kleever hett ok veel Eiwitt un is dorüm noch as tosätzlich Foderquell för dat Veetüüch goot. Ok de Immen kaamt un halt sik Nektar vun de Blööm.

Wat'n Pracht!

Sempfeld

Opa hett uns en richtig Nahölpstunn in Saken Landwirtschaft geven. Uns güng en Licht up. De Feller mit Phaselia un Semp deenten för de Verbetern vun den Bodden, weren ok Grööndünger. Sogor de Sünnenbloom deenten to'n Verbetern vun den Bodden, lockerten mit ehr Wöttelwark den sworen Lehmbodden up. Un eens harrn noch alle Grööndüngerplanten gemeensam: Se harrn smucke Blöden un locken dormit de Insekten an. Besünners de Immen hebbt dorvun profeteert.

Phaselia

Phaseliablööt mit Imm

Sempacker in de Morgensünn

Dor lüüd en lude Handklingel de Meddagstiet in. Opa müss to'n Meddageten. Wi hebbt Tschüüs seggt un uns bi Opa bedankt. Wi harrn ok Hunger kregen. Up uns Wiederfohrt hebbt wi noch Opas Peer bewunnert. De stünnen in Schadden vun en olen Appelboom. Se harrn ok Meddagstied.

De Bookwetenplant

Na Huus hebbt wi enen annern Weg inslagen. Dor kemen wi noch an en Sünnenblomenfeld un an en Phaseliafeld vörbi. An Rand vun dat Sünnenblomenfeld stünn Bookweten. Ok de is en Grööndüngerplant. Wi hebbt nich blots wat to Eten halt, wi hebbt up uns Fohrt ok en Barg vun de Landwirtschapp lehrt.

Sünnenblööm mit Bookweten

Opas Peer seggt Adjüs!