Neikimmen
"Neikimmen" knipset den lüttken Planet Pluto

van Ludgerd Lüske



In'n Januor 2006 hätt dei Nasa dei Sonde Neikimmen ("New Horizons") nao den Pluto schickt. Nu, in'n Sommer 2015, is sei dicht an'n Pluto vörbiflaogen un hätt den lüttken Planeten knipset.
Pluto wörd bit 2006 as dei bütste Planet in use Sünnensystem anseihn, dornao köm hei in dei Klasse van dei "Dwargplaneten".


Nasa-Teiknung: Neikimmen un Pluto mit dei Maonde. Bild-Daoten


Neikimmen werd in't Labor tausamensett. Bild-Daoten


Nasa-Teiknung: Neikimmen, Pluto, ein Maond un dei Sünn. Bild-Daoten

Väl Gägend un Barge ut Ies, dei bold 3500 Meter in dei Höchte gaoht, süht man up dei eiersten Biller van dat Ruumfohrtüg Neikimmen. Dat sünd beste Fotos, dei väle Deile van den Pluto-Bodden nau wieset. Hier ein Link tau den Överfloog.


Landschkup up Pluto. Bild-Daoten

Neikimmen bring nu all wohrhaft gaue Resultaote. Dit Ruumfohrtüg is an'n 14. Juli 2015 as eierste Apparaot an Pluto vörbiflaogen.
Pluto is deilwiese aohne Inschlagg-Kraoters. Dorbi kunnen üm in dei Milliarden Johre nao sien Entstaohn väle Objekte draopen. Dei so upträen Kraoters sünd wohrschienlick dör vulkaonischke Prozesse wedder verschwunnen.


Pluto, knipset van Neikimmen. Bild-Daoten

Dei Direkter van dat Max-Planck-Institut för Sünnenforschkung in Göttingen, Professor Ulrich Christensen, glöwt, dat dei Schaole, dei üm den Steinkarn van Pluto ligg, nich blots Waoter-Ies binnen hätt, sünners uck fleeten Waoter. Dorvan is vellicht wat up den Bodden loopen un dor denn wedder tau Ies froren.


Frost-Formen up den Pluto-Bodden, bold so as up Iespütten up dei Eern. Bild-Daoten

In dei Atmosphäre van Pluto giff et Stickstoff, Methan un Käöhlenstoffdioxid. Dei Sonde funkde uck Verdeil-Daoten van dat Methan un dat Käöhlenstoffdioxid.


Vörkaomen van Methan up Pluto. Bild-Daoten (affännert)


Vörkaomen van froren Käöhlenstoffdioxid up dat "Harte" van Pluto. Bild-Daoten


Dat "Harte" van Pluto. Bild-Daoten (affännert)

Uck van Pluto siene fief Maonde kann dei Nasa hoch uplöste Biller vörwiesen. Up den gröttsten Maond Charon fünnen dei Forschkers uck deils nägen Kilometer deipe Gröbens un eine düster farwde Stä. Worümme dei so farwed is, weit noch nümms.


Pluto un sien Maond Charon. Bild-Daoten


Dei Bodden up den Pluto-Maond Charon un dei düstere Stä,
lünker Hand baoben up dat Bild. Bild-Daoten


Pluto mit Charon in'n Vergliek mit dei Eern. Bild-Daoten


Pixelbild van den Pluto-Maond Hydra

Uck van en annern Pluto-Maond, Hydra, mök Neikimmen Fotos. Ut disse Pixelbiller kann man affläsen, dat dei Maond rund 43 maol 33 Kilometer groot is. Wenn disse Biller uck pixelig utseiht, so häbbet dei in'n Vergliek tau Pluto eine hoge Uplösung: 3 km up ein Pixel. Hydra is man ein orig lüttken Maond.

Neikimmen is tüschkendör all einen heelen End wiederflaogen. Dei Sonde suust mit 50000 Kilometer in dei Stünn (km/h) up den Kuiperstriepen tau. Mit den Link "Wo is Neikimmen?" kann man naokieken, wo dei Sonde jüst flügg, wenn man dissen Bidrag läsen dait.


Fleigbaohn van Neikimmen an'n 19. Juli 2015 Üm 21 Uhr (UTC). Bild-Daoten


Biller: Nasa
Südollnborger Platt: Ludgerd Lüske, 22.7.2015

 


na baven