Pottblööm — Wat för't Hart in de Wintertiet!

vun Antje Heßler

De mehrst Tiet is dat in Januarmaand buten düster und gries. De Sünn möökt sik böös roor un schickt blots för wenig Stunn'n ehr warmen Strahlen up de Eer. Oftins verhangt düster Wulken ehr Gesicht. All de lütten Blööm mütt freer'n un sünd dorüm ünner de Eer krapen oder hebbt ehr'n witten Wintermantel antrocken. Du kannst se nich wies warrn.

Wenn ik denn gor nich mehr gegen de düster un griese Welt ankann un kruse Gedanken Överhand nehmt, föhr ik in en groot Goorneree. Dor giff dat Drievhüüs, de sünd vull mit smucke Pottblööm. De wunnerbare Ruuch vun dusend Fröhjahrsblööm kümmt di glieks in de Mööt. Un wat de för smucke un bunte Farven hebbt! Över Rot, Geel, Blau un Gröön sünd all de Klöörn to sehn. De Blööm sünd in lütte Pött plant. Fien sorteert na ehr Oort un Farv staht se up de groten Plantendische. Kannst di blots noch freu'n över de Pracht!

Dor stell sik bi mi de Fraag: Siet wann gifft dat egentlich Pottblomen? Bi mien Modder un ok al bi mien Oma heff ik ümmer Pottblomen in enen smucken Överpott up dat Finsterbrett stahn sehn. Geev dat in'n Winter denn grote Küll, wöör en Zeitung twischen Finster un de Blomenpött packt. In besünners kole Nächten wöörn se sogor merrn in de Wahnstuuv up den Disch stellt.

Aver wo weer dat fröher, noch wieder torüüch? Dor geev dat tominnst in'n Winter wull blots Iesblööm an de Finster. De Hüüs harrn noch keen Avens in de lütten Kamern. Blots de Kaakstell up de groot Deel geev Warms af.

Mit de Fraag na de eersten Pottblomen heff ik mi nu wat genauer befaat. Planten in enen Pott groot trocken hebbt al de olen Ägypter. Ok vun de Griechen un Römer weet man, dat se Lorbeerbööm un anner Grööntüüch in irden Pött plant un tücht hebbt. Dor weer dat buten aver ok warm noog un de Planten kunnen in Pött buten stahn un ranwassen.

Bi uns in Westeuropa hett dat bit twüschen dat 17. un 18. Johrhunnert duert, bit dat Pottplanten geev. Dorför hett man grote Drievhüser, Orangereen buut. De harrn en Heizanlaag. Sowat kunnen sik aver blots rieke Lüüd leisten. Vun de Tiet an geev dat ok ut ferne Länner Pottblööm, Exoten sotoseggen. In de Botanischen Goorns hett man den later ok Orangereen buut.

De eenfache Mann un de eenfache Fru müssen noch lang töven, bit se sik Pottblööm in't Huus uptrecken un hollen kunn. In de kole Johrestiet weern de Pottblööm ganz eenfach kaputt froren. Dörch de lütten Finster vun de olen Hüüs keem ok to wenig Licht för de Planten.

Eerst üm 1900 füng dat bi uns hier mit de Pottblööm an. Düsse Blööm müssen ok noch de Warms vun en Aven afkünnen. Farne un Efeu weern wull de eersten Planten, de in de mit Avens inbööt'ten tochigen Stuven wassen kunnen. Denn kemen Begonien, Azaleen, Fuchsien un ok Alpenveilchen dorto. Dat weer nu en groot Mood, sik de Wahnstuuv mit Gröönplanten un Blomen to smücken. Jede Fru wull de mehrsten un smücksten Planten ehr Egen nennen.

Siet dat nu meist överall Zentralheizung in de Hüüs un Wahnungen gifft, de Finsterfronten mit Duppelschieven utstaffeert un gröter sind, is de Tall un de Oort vun Pottblööm ümmer gröter woorn. För jedeen Ruum gifft dat en Plantenoort. De Luftfeuchtigkeit is dörch Waterdamp höger woorn. So köönt hüüt ok tropische Planten, as Orchideen, Bromelien un vele annere Blööm, goot ranwassen. De Pottbloom hett ehr'n Siegestoog antreden. Se sorgt sogor för betere Luft un so ok för uns Wohl.

Un vun de velen Planten hal ik mi al ümmer in den Januarmaand de eersten Fröhblöher, meisttiets de lütten bunten Primeln, ok Karkenslötel nöömt. Aver Zittlööschen un Hyazinthen sünd ok mit up mien Inkoopswagen. De köönt de Küll al ganz goot verdrägen. Se staht bi mi buten up de Finsterbank. De bunten Blöden lüücht in dat Stuvenfinster, so as wull'n se al dat Fröhjohr anseggen. Wenn ik dat sehg, freu ik mi un mi warrt lichter üm't Hart!