van Ludgerd Lüske

Äöwersicht äöwer dei Rosetta-Bidrääg

So moje schull Philae ansick up den Komet "Tschuri" staohn.
(Bild-Simulation, Bild-Daoten — DLR-Portal Rosetta)

Kontaktprobleme mit Funkpausen

"Dat dei Philae-Lander sick nu schiens nich mehr melden dait, kummp dorvan, dat siene Energie verbruuket is un dei Elektronik tau kold worn is", sägg dei Philae-Projekt-Baos Dr. Stephan Ulamec. In dei leßten Maonde kömen kiene Funksignaole van Philae. Sien Schwiegen in'n August 2015 leeg aower doran, dat dei Rosetta-Sonde an den sünnenduunsten Punkt (186 Mio km tüschken Sünne un Komet 67P/C "Tschuri") tau wiet van den Komet wäge was (300 km Affstand). So kunn Rosetta kiene Signaole van Philae upnähmen un harr so nix tau'n Wiederleiten nao dei Eern.

Rosetta mit 300 km Affstand tau den Komet (Bild-Simulation)
Bild: Ludgerd Lüske, nao dat Originaol-DLR-Bild,
süh uck hier

"In dat vergaohn Johr verstünden wi uck tiedwiese nich, worümme et kienen Kontakt mit Philae geef." Philae mellde sick woll an'n 13. Juni 2015 un schickde blots Daoten äöwer sienen Gesundheitstaustand. Tausaome harr dei Lander wiederhen säben Maol Kontakt mit dei Boddenmanschup — man et bleef unegaol un man kunn et nich vorutseihn.

An'n 9. Juli 2015 kömen tau'n leßten Maol Informationen. "Wi dön faoken naug Kommandos senden, dormit dei Kontakt stabiler wörd. Denn harrr man mit dei Instrumente wat mäten kunnt. Aower wi kreegen dat nich hen."
Dei Ingenieure van dit Projekt meent, dat dör Kortschlüsse an dei Senders dei Kontakte unegaol wörden un tauleßte affbröken un Philae so schwiegen dait.

Positive Resultaote för disse Premiere

För dei Ingenieure un dei Forschkers is disse Mission mit den Landeapparaot ein positivet Ünnernnähmen. "Wisse Mät-Aktionen kunnen nich as plaont affloopen, aower dörweg was dei Philae-Mission ein Erfolg", sä taufrä dei DLR-Planetenforschker Dr. Ekkehard Kührt. "Wi mössen an eine heel unbekannte Stä landen un kunnden tau'n eiersten Maol Wätenschkup-Daoten van einen Kometbodden upnähmen, dei dei Mät-Daoten van Rosetta komplett möken." Dei Rosetta-Philae-Mission wieset, dat dei Aktivität van einen Komet dütlick komplexer afflöpp, as man dachde. "Wi kreegen väle neie Wiesteiken, aower van ein vullet Verstaohn sünd wi noch wiet aff."

Uck wenn bi dei Arbeit mit Philae nich aals pass afflöp — as Bispill dat chemischke Ünnerseuken van eine Boddenprobe off mehr Tied tau'n Faoten van Wätenschkup-Daoten: "Sükke hochuplöste un wunnerbore Biller van dei Rolis-Kamera an dei Unnerkante van Philae un uck van dei Philae-Panoramakamera Civa werd wi eine heel lange Tied nich mehr kriegen."

Rolis-Instrument up Philae; Bild-Daoten — DLR

Rolis-Kamera mit Thermo-Schutz-Mantel; Bild-Daoten — DLR

Rolis-Kamera aohne Thermo-Schutz-Mantel; Bild-Daoten — DLR

Taudem fünd man mit ein Massenspektrometer orgaonischke Moleküle up den Kometenbodden. Mit dei Thermalsonde Mupus un dat Seismometer Sesame bestimmde man dei physikaolischken Eigenschkupen van den Kometbodden. Den Kometkarn dö man van Sonde tau Lander mit Radar-Straohlen dörlüchten, wobi man Resultaote äöwer siene Struktur kreeg. Ein Magnetfeld kunn man an den Komet nich mäten. Väle Resultaote staoht middelwiele in dei Wätenschkup-Journaole. "Dat Utwerten van dei välen Daoten werd noch Johre duuren", sä dei DLR-Planeten-Forschker Dr. Ekkehard Kührt mit Bedacht.

Resultaote för Missionen in dei Taukunft

Mit dei Rosetta-Mission fierde man nich blots eine einkelne Premiere in't All. Maläwe nich flög vördem eine Ruum-Sonde Siet an Siet mit einen Komet up den Weg üm dei Sünne. Noch maläwe nich kunn ein Apparaot up einen Kometbodden landen un dor Daoten faoten. "Wenn man einen Verlgliek mit annere historischke Missionen seuken will, wören dat vellicht dei Viking-Mission mit dei eiersten nauen Biller van den Mars, off uck dei Voyager-Sonden, mit dei wi dei grooten Planeten in use Sünnensystem bekieken kunnen", sägg dei Philae-Projekt-Baos Dr. Stephan Ulamec van dei DLR. Bi dei Landung mit Philae kunnen wi väl lern: "Wi käönt dei taukaomen Missionen bäter an dei Bedingungen up einen Komet anpassen."

Dei leßten Fotos van Philae kaomt wohrschienlick in'n Sommer 2016, wenn dei Rosetta-Sonde duune an den Komet vörbiflügg un up den Lander kieken kann. "Wenn wi dann seiht, wo Philae nau staiht, käönt wi dei Daoten van dat dat Radar-Experiment Consert noch bäter utwerten." In rund seß Johre werd Philae un dei Rosetta-Sonde, dei in'n September 2016 an'n End van dei Mission up den Komet landen schall, tauminnst wedder duune an dei Eern vörbikaomen — denn hätt dei Komet Tschurjumow-Gerassimenko dei Sünne wedder ein Maol ümrundet.

Nu häbbet dei Kometaoner bold wedder ehre Ruhe.
Bild: Ludgerd Lüske nao DLR-Portal — Rosetta

Südollnborger Platt: Ludgerd Lüske

---