Rosetta

Philae unnersöch den Komet Tschuri (67/T-G)


Se köönt de Biller per Klick vergröttern.
Trüch kaamt Se denn mit den Zurück-Knoop op de Browser-Symboolliest.

Philae steiht nich up dei vörseihn Landestä Agilkia, dei Apparaot is wat wiederhüppket. Wat in'n Weltruum, wietaf van grote Massen, so "Hüppen" heit! Ein Animation käönt Sei hier seihn. Dei Tied is dorbi dull tausaomentrocken — aallns leip in Wirklichkeit veel langsaomer.


Philae so allein. Bild Ludgerd Lüske

Iewerig anaolyseierden dei Kontrollruum-Manschkup un dei Forschkers den Daotenstrom van Philae. Tauleßte stünd faste: Dei Landeapparaot was nao dat eierste Upsetten wedder affprallt un eiers nao knapp twei Stünnen — üm 18:25 Uhr — van neien landet. Denn köm noch ein acht Minuten duuren Hüppker, nao den Philae üm 18:32 Uhr up den Kometbodden staohn bleef.


Philae sien eierstet Panoraomabild van den Kometbodden. Bilddaoten

Mit dei Landestäe Agilkia was et nu vörbi. Äöwer 500 Millionen Kilometer is dei Affstand van dei Eern un dei Apparaot steiht nu up eine Stä, dei man noch nich kennt. Rund üm dei Uhr befaotde sick dei Manschkup in dat Lander Control Center mit dei ankaomen Daoten. In dei Nacht was denn klor — hei hätt dei sünnerlicken Landesprünge aohne grooten Schaoden äöwerstaohn un hei warket nao sienen Arbeitsplaon. Forts passde dei Kontrollruum-Manschkup dei Kommandos för Philae an dei neie Laoge an.

Dit eierste Panoraomabild van den Kometbodden (Bild rechterhand) mök dat CIVA-Kamerasystem un et wiest eine 360 Graod-Ansicht van dei Landestä. Dei Landbeine süht man up wecke Biller.


So süht dat eierste Panoraomabild van den Kometbodden ut,
wenn een den Standort van Philae inteikent. Bilddaoten

Dei insette Graofik wiest dei Utrichtung van den Landeapparaot, so as dat Landeteam et tau Tied glöwet. Dat Signaol, dat dei Landung van Philae up den Komet bewiest, köm üm 17:03 Uhr MEZ up dei Eern an. CIVA (Comet Infrared and Visible Analyzer) bestaiht ut dat bildgäben Panoraoma-Kamerasystem tau'n Unnerseuken van dei Landestä un ut Mikroskope tau'n Affbilden un tau dei Spektroskopie van dat mit den Bohrer utbohrte Materiaol van den Kometbodden.


ROLIS-Kamera nimmt den Kometen Churyumov-Gerasimenko up. Bilddaoten

Dit Bild mök dat ROLIS-Instrument an Bord van Philae an'n 12. November 2014 ut einen Affstand van 40 Meter, kort vördem Philae eiersmaols upsetten dö.


Philae werd söcht. Bilddaoten

Disse Montaoge ut fief Biller bruukde man tau'n fasteleggen van dei würklicke Landestä. Dei Biller möhm dei OSIRIS-Telekamera an Bord van Rosetta an'n 12. November 2014 up, as Rosetta rund 16 Kilometer äöwer den Kometbodden was. Wohrschienlick hüppkede Philae twei Maol äöwer den Bodden, vördem dei Apparaot up siene leßte Stä stünd. Dat rode Krüz wiest dei eierste Landestä.

Nu tau Advent fanget jao dei Basteltied an. Sei käönt sik ok ein eigen Rosetta basteln! Druckt Sei einfach disse Modellvörlaogen (hier as PDF) van Rosetta un Philae ut und bawt Sei Ehre eigen "Rosetta-Sonde''. Hier käönt Sei't ok daollaoden. Schwäwen deit dat Modell twoors nich graod, aower Sei käönt dat jao in'n Wiehnachtsboom hangen, denn schwäwet sei ok!


So süht denn dat fardige Modell ut. Bilddaoten


Philae doch nich so allein! Bild Ludgerd Lüske


Südollnborger Platt: Ludgerd Lüske

16.11.2014


na baven