Rosetta

Philae bruuket Sünnenenergie


Se köönt de Biller per Klick vergröttern.
Trüch kaamt Se denn mit den Zurück-Knoop op de Browser-Symboolliest.


Philae: Unnersiete. Bilddaoten

Dei Rosetta-Philae-Mission ist ein interessantet un uck ein rutfördern Unnernähmen van dei europäischke Ruumfohrt. An'n 12. November 2014 lösde sick dei Landeapparaot Philae van dat Mauderschipp Rosetta un dö up den Komet "Tschuri" landen. Beide, Rosetta un Philae, flögen Siet an Siet mit den Komet un sien Koma up den einige Maonde duuren Weg nao den sünnennaohsten Punkt.


Rosetta kapselt Philae af. Bild: DLR

Dei Landeapparaot Philae settde sick an'n 15. November 2014 üm 1:36 Uhr in den Schlaoptaustand.

Staodig sammelde Philae 56 Stünnen lang Wätenschkupdaoten up den Kometbodden. Don was dei Systembatterie sowiet los, dat dei Bordelektronik nich mehr warken kunn; Philae güng in den Ruhetaustand. Dei Projektbaos, Dr. Stephan Ulamec van dat Dütschke Zentrum för Luft- un Ruumfohrt (DLR), sägg: "Philae hätt mit einen groten Erfolg warket."


Dat Landemanöver van Philae. Bild: DLR

Siet 23:30 Uhr was Philae mit sienen Kontrollruum in dat DLR in Köln verbunnen un schickde dei Wätenschkupdaoten för den Bohrer SD2 un dat Instrument COSAC. Forts bi dei Kontaktupnaohme schickden dei Ingenieure in dat Lander Control Center van dat DLR neie Kommandos nao Philae. Dei Landeapparaot hüllt sick gaut, uck as dei Funkkontakt mit dei Eern fäökener affbrök: Immer wedder fraiden sick dei Forschkers van dei Mission däget, wenn staodig neie Daoten ut dat All ankömen.


Dei Fäut van Philae schullen sik bi't Upkaomen fast in den Kometen bohren —
dat leip nich ganz richtig. Bild: DLR

So dö dei Landeapparaot noch in dei Nacht mit dat Instrument PTOLOMY mäten, un Philae knipsde twei Biller mit dei ROLIS-Kamera. Tausaome mit dei Maudersonde Rosetta (is in den Ümloop üm den Komet) werd dei Komet van dat CONSERT-Instrument unnersöcht. Taudem kunnen dei Forschkers in dat LCC den Kassen van Philae mit dei Solarpaneelen üm 35 Graod dreihen laoten (süh disse Animation). Philae nimmp so mehr Sünnenstraohlung up. Dordör schall sick dei Batterie dröcker wedder uplaoden, uck wenn dor väl Schadden is.


Laog van Philae. Bild: Ludgerd Lüske, 19.11.2014

Philae sien Ruhetaustand bring uck för dei Mannschkup in dat LCC (Lander Control Center) eine Ruhepause. Dei DLR-Ingenieur Koen Geurts sägg: "Nao eine orig anspannte Wäke mit grooten Erfolg nimmp Philae sick eine Ruhetied — un uck dei Manschkup kann maol wedder Luft haolen." In dei leßten Daoge har dat LCC rund üm dei Uhr weg warket, dei Lander bruukde neie Kommandos un dei Tied van dei so neumte "First Science Sequence" — dei eierste Phaose för dat Wätenschkupwark — wörd best nützet.


Wiesteiken för Köhlenstoffdioxid in dei VIRTIS-H-Spektren van dei Koma
van 67P/Churyumov-Gerasimenko. Klick = Vergröttern! Bilddaoten (affännert)

Dei Mätkurve wiest dat Faoten van Köhlenstoffdioxid in dei Koma van 67P/C-G. Dat Diagramm wiest dat Mäten (witt) mit den Kanaol H van dat Spektrometer VIRTIS up Rosetta in den Vergliek tau dei Simulation (Modell, blaw), wobi beide Graphen gaut äöwerinstimmt. Dei faotden Molekülbanden wiest dei typischke Struktur van eine Kombination van Rotationsschwingungslinien. Dit Gas flügg weg bi dat Upwarmen van den Komet, wenn dei Karn aktiv werd.


Wiesteiken för Waotermoleküle in dei VIRTIS-H-Spektren van dei Koma van den
Komet 67P/Churyumov-Gerasimenko. Klick = Vergröttern! Bilddaoten (affännert)

Dat Spektrometer VIRTIS up Rosetta hätt Waotermoleküle in dei Koma van den Komet faotet. Dat Diagramm wiest dat Mäten mit den Kanaol H (swatt) in'n Vergliek tau dei Simulationen (Modell, rot), dei orig gaut äöwerein stimmt. Dei faotden Molekülbanden wiest dei typischke Struktur van eine Kombination van Rotationsschwingungslinien. Dat Waoter flügg in Gasform weg bi dat Upwarmen van den Komet, wenn dei Karn aktiv werd.


Junglüe bastelt ein Philae-Modell ut Lego. Bild: DLR


Dat Modell. Bild: DLR


Dei Kometaniers sünd misstruusch. Bild Ludgerd Lüske, Klick = Vergröttern!


Nao dat DLR-Portal
Südollnborger Platt: Ludgerd Lüske

Aal Biller van de DLR sünd unner dei Lizenz CC-BY 3.0 tau bruken.

23.11.2014


na baven