Schaapsküll

vun Meike Balzer-Fraun

Hüüt weer'k mal wedder bi mien Frisörsche — beten frische Farv un snieden. Seet dor mit de "Bunte" vör de Nees un harr veel to luustern.

"Is wedder bannig koolt hüüt!" Ja, denk ik, harr ok man beter Strümp antrocken.
"Wekenenn schall al wedder verregen!" Al wedder? Mien Grööntüüchland hett Water nödig. "Jümmers düsse Regen!" Hest du denn keen Narichten höört? Wi mööt doch wiss heel dankbor sien, dat wi hier nich ok wedder ‚Land ünner' hefft.
"Klimawannel is dat aver nich, denn weer't ja nich so koolt!" In welk Netwarken büst du ünnerwegens? "Ne, düsse Sommer fangt so richtig schietig an!"

Sommer? Hüüt is de sövente Juni — noch twee Weken bit Sommeranfang. Üm de Tiet is mien Boortsdag. Wo faken kunnen wi as Kinner nich buten spelen, wieldat dat koolt un natt weer! Af un an kreeg ik en lütt Kump Eerdberen ut mien Oma ehr Goorn un oppen Disch stunn en Rükelbusch mit Wischenblööm.

To de Tiet harrn all Goorners de Ieshilligen un de Schaapsküll jedeen Vörjohr in'n Kopp. Vunwegen den Klimawannel beleevt wi düsse Wedderphänomenen blots noch selten.

An de Ieshilligen heff ik dit Johr ok nich dacht un de Bohnen al an'n negenten Mai leggt. Se seht aver prächtig ut un klattert al an de Stangen rop. Ok de Kantüffeln in de Eer hefft de Küll good överstahn. De Appelboom aver hett Frost kregen, un de Immen harrn afsluuts keen Lust na buten. Appeln gifft dat also nich!

Foto Meike Balzer-Fraun. Klick op to'n Vergröttern!

Veel Planten weren wohraftig bannig fröh un in enen Rutsch an't Blöhen, de ganze Goorn op'n Slag kakelbunt.
De Storkeblööm, Steertblööm un de Mahn sünd al oppen Kompost. De Buddels mit Fledderblomensaft hefft de Naverskinner längst leddig maakt. Ok Jasmin, Klockenblööm, Fingerhööt un de Rosen warrt den Sommeranfang nich beleven.

Foto Meike Balzer-Fraun. Klick op to'n Vergröttern!

Keen eerste Roos to mien Boortsdag! Un ok keen Wischenblööm mehr. De Wischen sünd al tweemaal meiht. Eerdberen gifft't satt. Wenn dat keen Klimawannel is!

Na düsse Schaapsküll lücht dat nu bald geel in'n Goorn: Königskarsen, Brannwienskruut, Wievenkruut un Hönnigblööm bruukt blots noch en poor Sünnendaag ehr dat se full opblöhen doot. Lavennel, Salvee un Tiemjaan wasst allerbest, de Rosmarin is afsopen, un de Rucola, de sik johrenlang sülvst utseiht hett, is wegbleven. Worüm ok jümmers?

Bün neeschierig, wo dat in'n Sommer un Harvst dor buten wieder geiht un welk Planten sik op welk Oort an den Klimawannel wennt.