"So'n Schiet!", denkt de Vagel

Wo blifft dat Fröhjohr?

vun Antje Heßler

Vör en gode Week sehg dat so ut, as weer dat Fröhjohr al dor. Överall keken de lütten Fröhblöher ut de Eer. Aver denn hett sik de Winter dat anners överleggt un nöhm allens wedder in de Hand. Mit luut Hulen puus he den Snee vör sik heer un weih em dörch Knicks to grote Hupen tosamen. Dichtes Sneedrieven nehm jede Sicht. Knackigen Frost in de Nachten leet allens vör Küll ümfallen. So dreev he dat över twee Daag. De Landstraten weern nich mehr to passeern un müssen afsparrt warrn.

Ok dat Water vun de Oostsee drück de Storm in de Bucht, dat geev Hochwater. De Steege stünnen all ünner Water. De Storm harr dat Water üm un ümwöhlt, harr dat Ünnerste na Baben bröcht. Eerst as na twee Daag dat Water aflööp, kunn man den Schaden sehn denn he anricht harr. Ok de toweihten Straten weern goot antosehen. De tosamen weihten Hupen weern oftins ganz smucke Gebild. Ünner en blagen Heven möken se sik ganz besünners goot.

De lütten Deerten, besünners de Vagels, harrn ünner den Winterinbruch to lieden. Se kemen ümmer neger an de Hüser. So mennig fremden Gast weer ünner de Vagelwelt uttomaken. De Wachholderdrossel un de Birkenzeisig weern wedder mal up mien Terrass to Beseuk.

"Schietweder, segg ik!"

As nu vunmoorn de Sünn vun blagen Heven strahl, weer ik nich mehr to hollen. Ik müss na de Küst un övert Water kieken. Wat weer dat för en Freud. Dat Water leeg still as en Spegel un de Luft weer kloor. Dat Över vun de Meckelnborger Siet weer goot uttomaken.

"Avers würklich, wat för'n Schiet!"

Watervagels trocken ehr Kreise. En lütt Mööv wies mi den Weg na den Mövensteen. An't Över in den Windschatten mank de groten Steen seet en Antenpoor in de Moornsünn.

Up den Trüüchweg wöör ik an unsen Badesteeg seltsame Figuren ut Ies wies. Wat weer dat? Weern dat Watergeister? Harr de Storm dat Water so ümwöltert, dat de na Baben kamen weern un sik nu up den Badesteeg uphöllen?

De een Figur sehg en Fru liek, meist as en Madonna. De annern twee weern seker Kerls, de up de Fru uppassen sullen. De Hoor vun de Kerls weihn noch richtig in den Storm. Dat weern richtig Kunstwarken. De Winter harr sik as Künstler wiest!

Düt is nich de Pietá vun Michelangelo!

Wat wull ut de Figuren warrt, wie lang se wull de Sünn utholt? Vun lange Duur weern se nich!