De Sünnenaven

vun Thomas Seemann


To dröög? De Sünn knallt man so? Nütt Se eenfach de Energie vun den Sünnenschien! Maakt Se dat Beste dorut un buut Se sik en Sünnenaven!

Wat is dat? Dat geiht so:

Ik nehm en ole Kommood, en lütt Nachtschapp orr eenfach en Kassen. Een Siet mutt apen blieven.

An een Siet (nich gegenöver de apen Siet, sünnern dorblangen!) bohr ik Löcker un deck ehr mit Flegengitter af. De Löcker sünd to'n Entlüften, avers dor schallt keen Insekten rinkrupen. Dorüm nehm mööglichst fienes Flegengitter.

Mit'n Kleevpistool un lütte Holtleisten warrt dat Flegengitter över de Löcker fastmaakt.

Nu warrt de Kassen an de Binnensieden mit Alufolie utkleevt. Natüürlich mutt de glänzen Siet sichtbor ween! De Belüftenslöcker mööt aver apen blieven, ik heff ehr toletzt nocheens mit en Schruvendreiher dörstött. De Siet mit de Löcker mutt na baven wiesen.

Vör de apen Siet warrt noch en Plexiglasschiev monteert. Plexiglas kannst ok heel good bearbeiten un denn jichenswie bündig maken, dat an de Sieden nich to veel Warms verlarengeiht. Op't best kannst de Schiev mit Metallwinkel fastklemmen. Schöön dicht un togliek licht optokriegen.

Fertig.

Se ahnt dat al: Düt is en Döör- un Dröögaven. Wenn du den na de Sünn dreihst, hett de Aven binnen in Nullkommanix 70°C.

Ik will düsse Krüder drögen un Tee dorvun maken. Dat sünd Minze un düsse japaansche Teehortensie. De Minze is heel aromatisch, anners as de ut't Reformhuus, veel intensiver. Aver ok lecker. — Kannst aver ok Petersilie orr Aavt in den Aven drögen. Allens even, wat geiht.

De Krüder kaamt in lütte Schötteln. De Schötteln kaamt in den Aven, de Plexiglasschiev kümmt dorvör, un denn laat ehr brutzeln!

Twüschendörch kiekt Se af un to mal na. Wenn de Sünn good schient, is in 4 Stünnen allens dröögt. Maakt Se de Krümelproov: Wenn sik de Planten good twischen de Finger terbröseln laat, sünd se fertig.

Hett keen Kilowattsekunn Stroom kost!

Natüürlich köönt Se de Butensieden vun den Aven noch schöön dekoreern.

Nu süht de Aven so smuck ut, dat mien annere Goornfiguren ganz niedsch warrt.


16.8.2022


na baven