Namen

"Malachit" sall ut dat griechisch Wort för Malve entstahn sien: "malche" orrer "moloche". Anner seggt, "Malachot" kümmt ut dat griechisch Wort " malako", dat bedüüdt week, wiel de Steen teemlich week is.

Anner Namen för den Malachit sünd: Felsengrün, Samterz, Atlaserz, Malvenstein.

Malachit as Dekoration

As ik in de Tiet, as dat noch de Sowjetunion geev, mal in Leningrad weer, dor kunn ik mi gor nich satt sehn an de groten Malachit-Vasen, de in de Eremitage stünnen. Ok Dische heff ik sehen, de weern mit poleert Malachit utleggt, ja, ik sehg enen Malachitsaal in den Winterpalast, de mi staunen leet.

Foto: A. Nissen

Nu besöchen wi de Stadt wedder, de nu wedder St. Petersburg heet. Överrascht — villicht sogoor enttäuscht — hebbt mi ditmal de prächtigen Malachit-Vasen. Ik heff jümmers dacht, de sünd total ut Malachit, so dörch un dörch. Aver so is dat nich. Se sünd ut Bronze un denn "blots" mit Malachit beleggt. — Man wenn ik dor so richtig över nadenk, denn is dat doch wohl allerhööchst Kunsthandwark, un ik füng an, de groot Kunst vun de Handwarkers to bewunnern, de den Malachit so wunnerbor bearbeiten köönt.

Nu heff ik ok en ganz anner Verstahn för Malachit-Schmuck (Armriepen, Anhänger, Ringe, ok Teller, Schalen), de ut Metall bestaht un heel dünn mit Malachit beleggt sünd.
Ik heff in St.Petersburg denn mal nafraagt, un richtig, ok de Malachit-Sülen in de Isaak-Kathedral sünd "blots" ümmantelt.

Foto: A. Nissen

De polnisch Dichterin Janina Brzotowska schreev en Gedicht "Malachit", in enen Utsnitt dor ut heet dat:

Up de Toppen vun de Kirchtorms? — Glieks müß ik an uns Kirchtorms in Lübeck denken, se sünd mit Kopper deckt, se lüchen wiethen in ehre gröne Patina. Patina is en dünne hellgriesgröön Schicht up de Oberfläche vun Kopper (orrer Kopperlegieren). De kaamt dörch Korrosion tostann.

Foto: A. Nissen

Man hett faststellt, dat an bannig oll (vörgeschichtlich) Kopper- un Bronzegegenstände de Hauptbestanddeel vun de gröön Patina ut Malachit besteiht. So ok bi de "Himmelsschiev vun Nebra". Dat is ene Bronzeplatt — binah kreisrund, 2 kg swoor un en Dörchmeter vun so 32 cm — mit güllen Inlagen, de wohl Sünn, Maand un Sterns dorstellen. De Platt is 1999 in en Steenkamer up den Mittelbarg bi de Stadt Nebra in Sachsen-Anhalt funnen worrn. Dit is en wichtig archäologisch Fund ut de Bronzetiet. Bronze is en Legieren ut Kopper un Tinn. Dörch dat lang Liggen in de Eerd is de Platt vun en gröön Korrosionsschicht ut Malachit övertrocken. Sogoor över de güllen Applikationen harr sik de gröön glashart Malachit-Övertog utbreedt.

Himmelsschiev vun Nebra, digitaal nabildt vun Ludgerd Lüske. Klick op to'n Vergröttern!

Foto: A. Nissen

Malachit is meist vun en wunnerschöön satt Gröön, dat bannig dekorativ utsüht, wiel dörch den Steen meist helle — man ok mal düüster — Bänder loopt. He glänzt siedig bet matt un is undörchsichtig. Kristalline Utbilden — de glänzt as Glas — gifft dat blots selten.

Geschichte, Wirken un Legenden

Disse deep-gröön Steen mit sien ünnerschiedlich Teknungen warrt al siet Dusende vun Johren as Schmuck verarbeidt. Ok as kraftvull Heilsteen wörr he al in de Antike bruukt. Siene wellenförmig Biller in vele Formen — männichmal seht se ut as en Oog — faszinieren de Minschen al jümmers.

De ollen Griechen un ok de Römer stellen Amulette ut Malachit her. De sullen vör allen en Schutz för Kinner sien. In 't olle Ägypten weer dat en kosmetisch Mittel to 'n Schminken vun de Ogenlider (Lidschatten).

77 n. Chr. hett Plinius vun den "Molochitis" schreven. He beschrifft em as undörchsichtig, sattgröön Mineral. He hett dat to Pulver stött un so to 'n Reinmaken vun Wunnen bruukt, also "entzündungshemmend". De Wetenschaft vun hüüt hett nawiest, dat in Malachitgefäße Krankheitserreger doodblievt. Dat kümmt vun den Gehalt an Kopper (57%) in'n Malachit.

Foto: A. Nissen

In'n Middelöller wörr Malachitpulver bi Koliken anwendt. In Süd-Düütschland kennt man dat "Wehenkrüüz" — dat is en Krüüz ut Malachit — dat sall de Fruun bi de Geburt de nödige Kraft geven..

De Malachit symboliseert: Verständnis.
Disse Eigenschaft kann he — so seggt miene kloken Böker, vun de mien leef Mann seggt, dat sünd Hexenböker — up de Minschen utstrahlen.

De Malachit kann Energie upnehmen, he kann also negative Energie ut uns ruttrecken.
Dörch sien reinmaken Kraft is de Malachit goot to bruken to 'n Upleggen up Stellen an'n Körper, de vull Smarten sitt. De Steen treckt de krankmaken Energien rut.

Digitalbild: L.Lüske. Klick op to'n Vergröttern!

De Malachit mütt mit klor Water rein maakt warrn, anners warrt he licht stump, matt, un süht nich mehr goot ut.

Ik heff enen dreekantig Malachit, den drääg ik geern an en lellern Band üm 'n Hals. Ik heff em schenkt kregen vun ene Fru, de dat goot mit meen.

En Fründin vun mi, de hett sik ut Afrika en Malachit-Ei mitbröcht, groot as en Goosei un dörch un dörch ut Malachit. Jümmers wenn ik bi ehr bün, denn nehm ik dat Ei in de Hannen un speel dor mit rüm. Dat deit mi goot — un miene Hannen ok.

Foto: A. Nissen