Rhodochrosit

Vörstellt vun Anke Nissen

MnCO3 = kohlensaures Mangankarbonat

3,3 - 3,6 g/Kubikzentimeter (To'n Vergliek: Diamant 3,32 - 3,54, Bernstein 1,05 - 1,09).

Dat spezifische Gewicht (Dichte) kenntekent, wa swaar en Materiaal in Vergliek to sien Volumen is. 1 kg Watte un 1 kg Granit sünd ja gliek swaar (nämli 1 kg ), aver 1 Kubikzentimeter Granit is denn doch swarer as 1 Kubikzentimeter Watte. Dat beschrifft dat spezifische Gewicht.

Natuur un Geschichte

Rhodochrosit is ein rosafarven Steen, he is meist dörchscheinend, glasglänzend, kristallin.
He kümmt aver ok undörchsichtig mit witte Wellenlinien vör.

Mit de hellen Striepen in den Rhodochrosit is dat liekso as bi den Achat: Dat Material is dor gauer un dordör slechter kristalliseert, hett lütte Luftblasen inslaten un is nu undörsichtig. (Vergliek: reines Ies is dörsichtig; wenn aver in dat Ies massenhaftig lütte Luftblasen inslaten sünd, warrt dat witt un undörsichtig. Water is klaar; aver Schuum is undörsichtig dör de Luftblasen binn.)

De Foorm vun de Striepen lett ok erkennen, in welk Formen dat Gesteen rinlopen un kristalliseert is (süh ok bi Geoden). Bi Rhodochrosit is dat faken rund.

In't olle Griechenland weer dit Mineral wohrschienlich noch nich bekannt, man sien Naam, de kümmt ut dat Griechische:

• rhodon = Roos
• chrosis = Faarv
• also: rhodochroos = rosenfarven.

En düütsche Mineraloog (Hausmann) hett den Manganspat sienen Namen geven.

In't Argentinien vun hüüt hebbt de ollen Inkas Kopper un Sülver afbuut. In't dörteihnte Johrhunnert sünd se dormit uphollen. Un denn hebbt de Minen still legen, bet se 1938 wedder entdeckt worrn sünd. Un dor harrn sik in disse Bergwerke in de lange Twischentiet — dat weern 700 Johr! — gewaltig Tropfsteengebilden ut Rhodochrosit bildt. De Indios ut de Anden glöven — un villicht glöövt se dat hüüt noch —, dat dat Bloot vun de Herrscher in ehr Inka-Riek hier to Steen worrn is.
So is de Naam "Inka-Roos" för dissen Steen tostannen kamen.

Ut Rhodochrosit — un dor besünners ut de fienkristalline, bänderte Form — warrt hüüt Smuck un anner kunstgewerblich Saken maakt. Aver ok Mangan warrt ut düt Mangan-Gesteen wunnen. Nich ut de schöönsten Stücke, is to höpen!

De kristalline Steen warrt geern as Meditationssteen nahmen. He warrt up dat so nöömte Dritte Oog leggt, also mank de Ogenbruun.

De Rhodochrosit symboliseert: Apen sien för un gegenöver anner Lüüd.

Sien angenehm, rosa Farven warmt dat Hart un köönt dordörch week un leev-vull Föhlen in uns Denken bringen.

Ik mag den Rhodochrosit. He is mi sympathisch.
Besünners schöön find ik den nich-kristallinen Steen, de mit witte Wellenlinien dörchtrocken is.