Övervoader Stikelstakken
Een Fischkfamili wiest een eenmoaliged Brööd- un Trekkverhollen

vun Franz Dreidax

De krägeln, to use Landschkupp as Diek un Penner tohörenden Dreestikeligen Stikelstakken un ok de lütji'n Seepeer bedriven dat beste Kinnerverwachten van aal us Fischkers.

Dreestikelige Stikelstakken. Bild Ron Offermans/Wikimedia Commons

So as de Seepeerdvoader sien warden Kinners so laang in sien Bösttaaschke verwoahrt un futtert, bit see sükk sülven wat söken köänt, boot de Stikelstakkenvoader — hoast netso as en Voagel — en Nüst an de Woatergrund. Disse beid Voaderfamilis sünd föör de Weetenschkupp van gewaltich Bedüüdung. Bi de Gelehrden un in d' Schoolverkloaren gellt de schloaten Kring üm dat Brööden un Uptrekken as Bispill föör Instinkthaftichkeit.

In d' Vöörjoahr word dat Stikelstakkenmannsbild lüchtend blau un sien Böst faarvt sükk rod. He boot een Nüst ut Grööntüüchs, dat in d' Woater wassen deit, un kliestert dat mit Nierensekret fast tosoamen.
Dat Nüst word tomeist in en Bucht ov Kuul an d' Woatergrund anlächt un van de Stikelstakkenkeerl wööst tägen Angriepers ovriechelt.

Up düsse Breefmark vun de Färöer-Inseln sühst den dreestikeligen Stikelstakken in't Hochtiedskleed

Üm Hochtied to hollen, versöcht he mit Hen- un Herdanzen de Wiefkers in sien Nüst to lokken. Wenn en Wief binnen is, denn trillert he mit sien Schnuut tägen hör Steertwuddel, sodat see anfaangt, Eier in dat Binnerste to lärgen. Noa d' Eierlärgen is dat Stikelstakkenwief futt wäch un hett mit dat Jungfischkergood, wat dor nu ranwassen deit, niks mehr an d' Hoot.

De Stikelstakkenkeerls köänt oaber ok schiens nich genooch kriegen van de Froolüü, denn dat Spill mit dat Eierlärgen kann sükk mit anner Wiefkes noch en poarmoal so avspeelen. De Stikelstakkenfroolüü sünd oaber schiens netso potent as de Mannsbiller, denn see köänt dat in een Früchtboarkeitstied noch mit bit to särß anner Stikelstakkenkeerls drieven. In een Nüst köänt bit to veerhunnerd Eier lirgen.

Noa d' Früchtboarmoaken verdrifft de Keerl dat Wief ut sien Karteer un woakt as en Scheethund över sien Nüst. Bit ut de Eier Fischkers warden, dat düürt bit to twalf Doach. Een tiedlang hett de Voader noch en Ooch up sien Kinnergood, bevöör he wäär anfaangt to rusen un dat ole Spill wäär van vörn losgeit.

Ünnerscheedlich Stikelstakken. De Dreestikelige is rechts nerrn. Bild: Ghegeman/Wikimedia Commons

Stikelstakken köänt sass in Soalt- as ok in Söötwoater lääven. See trekken van d' Butenwoater vöör de Dieken dör de Sielen in de Deepden, Toochschlööt un Leiten, üm binnerwendich in d' Land föör Noawuchs to sörgen.

De Dreetakkenstikelstakken worden bit to een Handbrett lang. See letten sülverwitt mit en anlopen gröönschen Pukkel up de dree Takken sitten, mit de see grötter Fischkers, de hör an d' Liev willt, düchdich säär doon köänt. Sülven frääten see aal dat, wat lütker is as see un nich flink genooch vöör hör utneit.

Stikelstakken. Histoorsches Schoolbild