"Langfühlerschreck" stimmt wirklich!

Gemeine Strauchschrecke — Buschhüpper
— Pholidoptera griseoaptera —

vun Antje Heßler

De "Gemeine Strauchschrecke", de Buschhüpper, is en Langfühlerschreck un höört to de Familie vun de Laubschrecken. De Naam "Gemeine Strauchschrecke" klingt veel to veniensch för düt harmlose Deert, dorüm schall he hier bloots Buschhüpper heten.

De Buschhüpper kann nich flegen. Dorför kann he aver mit Hölp vun de groten Achterbeen wiet un hoch hüppen.

Ganz lütte Stummel vun Flünken kiekt blots ünner't Halsschild rut. De reckt nich to'n Flegen. He hett wohl mal flegen kunnt, aver dat hett de Evoluschoon em afwennt, un de Flünken sünd lütter un lütter woorn — un de Achterbeen knöviger un knöviger.

De Farv vun de Buschhüpper is bruun bit düsterbruun. He lött sik geern vun de Sünn beschienen. Fröh an Moorn liggt he regelrecht in de Sünn un lött sik upwarmen. Ümmer mit den Kopp in Richt vun de Sünn. Eerst dorna bewegt he sik un kümmt in de Gang.

Denn hüppt de gemeen Buschhüpper in dat dichte Gröön un söcht sik wat to Freten. He fritt in de Hauptsaak Grööntüüg. Aver ok Blattlüüs un anner lütt Insekten staht mit up sien Spiesplan.

Fru oder Keerl? Hauptsaak Sünnschien!

An de Leggröhr achtern kannst kennen: Dat is en Fru

De Fru is gröter as de Kerl. Se is mit de Leggröhr föfteihn bit twintig mm lang. De Leggröhr süht as en lütt Sichel ut. Mit de Leggröhr leggt se ungefähr 200 Eier in de Eer. Ut de Eier kruupt lütte Larven. Dat duurt twee Johr, bit se utwussen sünd. In de Tiet wesselt se söven Mal ehr Huut. Överwintern doot de Buschhüpper as Larven in de Eer. In't drütte Johr sünd se denn von Juni bit in den November för uns as utwussen Buschhüpper to sehn.

In Sommer höört wi oftins denn dat "zizizi" vun de Buschhüpper. Singen kann aver blots de Mann. He singt von Nameddags bit lat in de Nacht. Den Gesang möökt he mit de korten Flünken. De rifft he gegeneenanner. Dormit grenzt he sien Rebeet af.

In de Balztiet lockt he mit sien "zizizi" ok de Fruunslüüd an. Bi de Kopulation stiggt de Fru op dat Männchen. Mitünner blifft he ünner de Fru, dreiht sik aver oftins ok na achtern weg un kleevt de Spermatophore an ehr Genitalöffnung. De Poorung duurt blots wenig Minuten. Denn trennt sik dat Poor wedder. Un twee Johr wieder gifft dat niege Buschhüpper.

De Achtersteven süht ja meist to'n Förchten ut, is aver för't Eierleggen da

Hopps, hier bün ik! De Buschhüpper!

De schaarp Oostwind feeg dörch den Goorn. De letzten bunten Bläder wirbeln in de Huuseck ümeenanner un bleven ünner de Anemone Japonikum liggen. Vör den Winter müss ik de Bloom noch afsnieden un de letzten Bläder tosamenraken.

De Buschhüpper peilt de Laag

Dor wöör ik up dat en Blatt vun de Bloom en brunen Placken wies. Dat weer en lüüt Deert. Seet dor in de letzt Novembersünn un wull sik wull n'beten upwarmen. Graad wull ik em knipsen: Aver hopps, weer he up en anner Blatt sprungen. Dat weer ja en Buschhüpper! Un de weer bruun. Bit dorhin harr ik blots gröön Grashüpper in mien Goorn sehn. Ik versöch dat nochmaal. Dittmaal hett dat mit dat Knipsen klappt. Denn möök he wedder enen groten Hoppser! Weer mi meist in't Gesicht sprungen. Ik bün richtig in Dutt schaten. Aver denn harr ik em ut de Ogen verloorn.

Annern Moorn möök ik de Terrassendöör up. De Lünken schülpen al luuthals un töven up ehr Foder. As ik wedder in't Huus wull, wöör ik an de Terrassendöör den Buschhüpper wies. Seker weer dat door över Nacht warmer as mank de Planten.

Op den Korfrand

Nu güng för mi de Fotosafari los. Dat müss doch en goot Foto geven. Aver ümmer wedder, wenn ik meen: "Nu sitt he richtig, dat gifft en goot Foto! Nu drück up den Utlöser", möök de Buschhüpper enen groten Hoppser un seet an en anner Steed. Ik geev aver nich up, ik bleev em up de Fersen. Vun den Hocker sprung he mit de langen un groten Achterbeen up den Korfrand. Dor balanceer he hin un her un full toletzt up de Eer hindaal. Geev aver keen Rooh un hopps mit enen Riesensatz up de Appeltasch. De harr ik den verleden Avend na buten stellt. Dor gefull em dat. De Stoff vun de Tasch weer schöön week un warm.

Endlich kunn ik mit klamme Finger noch en poor gode Biller vun den Buschhüpper maken. In mien Goorn is he mi dat eerstmaal in de Mööt kamen.