Nevelmaand — de Minsch in de Wedderköök

Miene leven Plattsnackers!

 

 

 

 

 

natte Bläder, Harvst, Regen...

Is dat würklich wohr, hebbt wi all November, den Nevelmaand? Mann o Mann, so gau is dat gahn! Denn möt wi ja nu över de Wiehnachtsgeschenke nadenken.
De Klock is ok trüch stellt worrn. Avends warrt dat fröh düster un wi sitt in'ne warm Stuuv.
Och, wat segg ik, warrt gor nich mehr richtig hill an Dag. De Bööm hebbt keen Bläder, de Eer is swatt un kahl. De Planten hefft all ehr Knööf bit anner Fröjohr in'ne Wotteln torüchtrocken. So kann de Frost jüm nix dahn.
Uns Wedderköök bi Grönland speelt meist verrückt un kakt groote Regenwulken un Störm, allns in eenen Pott. Wenn't nich regent, gifft dat Frost, un wenn na Regen Frost kümmt, gifft't Glatties un so'n Vergneugen. Dor kregen de Krankenhüüs un de Automonteurs veel to doon.
Ok de Oostwind is nu richtig ungemüütlich. He bringt Küll ut Sibirien un Skandinavien. De Wind snitt een mächtig in de Nees. Dor is all mehr as een Holunnergrog neudig, üm wedder optodauen.
Mennichmol sniet't ok noch, avers de Snee blifft nich lang liggen un't warrt allns to Water, wieldat de Westwind sik meist wedder dörchsett. Slimm sünd ok de Harvststörm ut Noordwest un Süüdwest. De hebben woll mennig een Fohrensmann op See dat Förchten bibröcht un ok in'n Land mennigeen Schoden anricht't.

Quiietsch! Op natte Bläder maakt dat Bremsen richtig Spaaß

 

Harvst, Regen, natte Bläder...

 

 

 

 

 

natte Straten, natte Bläder - Gefohr!

 

 

Ne, dat is keen scheune Tiet. Dor mutt een veel Sünn in Harten hebben, denn de steiht bloots noch deep an'n Heben un geiht jeden Dag fröher to Bett.
Wenn denn ok noch veel warme, natte Luft op de koole stött, un de Sünn hett, deep, as se steiht, keen Knööf, so dat se't nich utglieken kunn, is de Nevel bald so stappendick, dat een sik dor in versteken kann. An'n Dag warrt't denn to'n Glück de meiste Tiet lichter, wenn't nich regent.

Noch düüster, avers bald......kann't so scheun utsehn!

 

 

 

An kloore Daag kann morrns de Dau op de Wischen nich mol mehr opdrögen un stiegt op. Dorbi kondenseert he to heel fiene Waterdrüppen, warrt to Nevel. He is dor, wo veel Water is, oder ok in Holt, besünners slimm. Oftins gifft't ok noch Fieselregen.
Eklig warrt dat, wenn't nu ok noch früst, dennso warrt de Straten spegelblank. Dor kann een bloots höpen, dat sik dat Warms gau dörchsett.

Noch een wichtige Saak: Passen Se op, wo dat Wedder vun 21.-25. November is.
Is't warm, dennso fangt de Winter heel laat an. Dat is dörch de Bank Rejalität.

 

Een nette Doktersch maakt de Krankheit lichter

 

 

 

 

 

 

Dissen Maand heff ik Se verspraken, över de Wedderföhligkeit to snacken. Mennigeen gläuvt, dat de armen Lüüd, de dor ünner lieden, sik dat inbillen. Ne, dat is eenfach nich wohr! Se hebbt dreemol recht!

De Minsch is ja een Natuurwesen, de heel to de Eer höört, ja een Deel vun ehr is.
De Maand makt Floot un Ebbe, de Storm lett de Willen in de See hochgahn, de Sünn lett de Blomen blöhn.
Dat Barometer fallt, wenn Regen un Storm kümmt, un stiggt, wenn kloores Wedder kümmt. De Luftdruck ännert sik un so kümmt dat ok bi'n Minschen an.
Mit dat Barometer un de Temperatur stiggt un fallt sien Gesundheit, sien Lachen un sien Weenen, ok de Gefohr, in Stratenverkehr to Schoden to kamen.
Dat gifft Minschen, de geiht dat bi jedeen Wedderännerung slecht. Meist sünd se sowieso nich recht op'n Damm, villicht sogoor all richtig krank.
Avers de Dokters köönt ok'n Leed dorvun singen. Ne Operatschoon bi Hitt kunn recht bleudig utgahn, ok bi'n Teendokter. Herzinfarkt un Slaganfall sünd grad bi Hitt ne Gefohr. Bi Küll gifft dat geern Nieren- un Gallenkoliken. Wenn Se sik en Arm oder Been broken harrn, bi Storm un Regen deiht dat besünners weh, johrlang noch. Dat Rheuma un de lahmen Knoken piesackt Se allermeist bi Storm, Regen un Snee. Vun Koppien brukt wi gor nich eerst to snacken, un in düstern November sünd veele Lüüd meud un trurig. Da köönt wi nich veel bi maken. Dat mööt wi uthollen. De neegste Sommer kümmt wiß.


 

 

 

 

 

 

 

un dat hebbt wi nu dorvun!

De neegste Sommer...

...kümmt wiß!


För mien Lesers, de sik sülven faken mal snaaksch föhlt, heff ik hier en lütte Tabell opstellt, dat Se verglieken köönt, wat dat villicht mit dat Wedder to doon hett:
Wedderphase
Kennteken
woans sik dat anföhlt
gewöhnliches Scheunwedder dröög, köhl bet mild good, een föhlt sik frisch un lebennig
utnahmen godes Scheunwedder dröges, mildes bet warmes Wedder, komodig un angenehm good, gifft keen Gesundheitsrisiko
unbanniges Scheunwedder heel warmes, dröges (Föhn) un daldrücken Wedder Krinkloopstörungen, Unkomodigkeit, Kettelhorigkeit, slechten Slaap
Wedderümslag 1: Warmfront klammhittes, swöles, daldrücken Wedder ringere Knööv un Konzentraschoon, Hibbeligkeit, Unfallgefohr, faken Komplikaschoonen na Operaschoonen (Blöden, Embolien, Hartversagen)
Wedderümslag 2: Kooltfront klammkoles, unkomodiges Wedder, mitünner fröstelt dat Klöterigkeit, langsame Reakschoonen, Unfallgefohr, Slaapstörungen, Depressionen, Krinkloopkollaps, högeres Infarktrisiko
Wedderbegööschen (achter de Kooltfront) külles, klores, ruges Wedder, quicken, smödige, dröge Luft düt Wedder strapseert nich so, avers noch rheumatische Leegnis, Nieren- un Gallenkoliken meuglich

Truut Se sik avers ok in'n November man ruhig in de Natuur rut! En Spazeergang is 'ne Wunnermedezin för Lief un Seel. Een mutt sik bloots verstännig för antrecken.

Noch een Storm, denn sünd alle Bläder rünner...So is dat richtig: good inmummeln un denn wannern dör de Alleen in'n Harvst

 

 

 

Man dat gifft avers kloke Lüüd, de seggt, muttst bloots hilles Licht anmaken, dennso warst nich so trurig. Wat dat geiht? Uutprobeern!

Nu fohrt ja ok mennigeen in Süüden, wenn he noog Tiet un Geld hett. Avers wenn dat dor ok keen Snee gifft, Sünn un Regen gifft't ok, un wenn se dann na Huus kamen, denn warrt se oftins eerst richtig krank, wieldat se an ehr Heimaatwedder gor nich mehr wennt sünd.
Ik meen, an besten is dat, mit veel Gedüür un Humor op dat Fröjohr bi uns to täuven.
Opa Harms seggt jümmers:

Opa Harms un sin Hus

Bliev tohuus
as Katt un Muus,
denn bliffst du 'sund
as'n jungen Spund.

Opa Harms mit Hoot. In Hus hett he avers nich jümmer een op.

In Oktober is he nu negentig Johr olt worr'n. Mann, weer dat 'ne Fier! Bit in de Nacht hett Opa sungen un tereleert.
Wat een Dokter is, weet he bloots vun Hörensagen, un Medezin kennt he nich, bloots Kamillentee un Baldrian un natüürlich sien Piep. Dor swört he op. Sien Krückstock brukt he nich anners as to'n Rümfuchteln, wenn he een wat verklorn will.
Wenn he de Minschen mit sien blage Swiensoogen ankiekt, dennso kiekt he se bit in't Hart.
To Werner, uns Nahber, hett he letzten Maandag seggt: "Wenn du di nich goot föhlst, dennso is dat keen Wunner. Laat du den Koorn stahn un drink lever Melk, dat is beter för di. Un denn is ok dien Nees nich so root."
All Nahbers hefft lacht över den gooden Raat.

Ja, Alkohool is woll nich de richtige Redder vun de Trurigkeit, avers wi wullt uns in'ne Stuv tosamen setten mit Frünn un veel nette Minschen un so den Nevel, dat Düster un den Regen överstahn. In Neevel kann een ok Versteck speelen un mennigeen Spijök maken.
Un avends eet wi denn de roden Bratappels mit Zucker un Caneel, mit Nööt un Honnig un "Familjensooße".
Tokamen Maand is Wiehnachten.
Ik frei mi all!

Een gemeutlichen November wünscht

Se Ehr Sünnschienkieker.


na baven