vun Berthold Cordes

Dat ward seggt:
Fleddermüüs sünd de eenzigen Söögdeerten, de flegen köönt.

Dat schall woll stimmen, aver se hebbt noch mehr Sünnerheiten. Se sünd in de Hauptsaak nachts in Gang, un hier jaagt se meist Insekten. "Denn mööt se ja goot kieken könen", kunn een menen. Aver dor geiht dat al los; denn in Wohrheit köönt se mit jümehr meist lüürlütten swarten Ogen blots en beten swart-witt sehn. Fleddermüüs hebbt aver bito en Magnet-Sinn, wobie se sik an de Linien vun dat Erdmagnetfeld torechtfinnt.

De Flatterdeerten schickt jümmer un jümmer Bülgen vun Ultraschall in jümehr Ümgegen. Dröppt en Bülg dorbie op en Ding, ward se trüchstrahlt — un de Fleddermuus fangt dat mit ehr Ohren op. Dat all'ns löppt af so snell as'n Blitz. Dorüm is dat ok nich verkehrt, wenn een seggt: Fleddermüüs kiekt mit jümehr Ohren, un jümehr Hart sleiht 800 mal in'e Minuut, wenn se dörch de Luft düüst!

Uns Wandrelief, dat achtern holl is — dor hebbt de Fleddermüüs wahnt

Liekers dat dat Fleddermüüs woll al mehr as 50 Millionen Johren geven deiht, sünd se doch stark bedrauht. Jümehr Hauptnohren — nämli Insekten — un ok de Levensruum ward jümmer minner. Bi uns an de Huuswand hangt en Bild, dat achtern holl is. En Poor Fleddermüüs weer dor achter kropen un harr sik dor jümehr Wahnung inricht. Enes Daags legen op den Footbodden twee lüttje Fledddermüüs. As ik jüm nöger keem, kuscheln sik beide tohoop. Ik heff jüm tofreed laten — un anschiens hebbt se jümehr Quarteer ok wedderfunnen.

Sooo hülplos, de lütten Fleddermüüs! Welk Aart dat is, lett sik swoor seggen — villicht Lütte Avendsegler? En Översicht över uns heimische Fleddermüüs gifft de Nabu.

Dat gifft also veel Egenoorden bi disse Deerten. En Fraag blifft bi mi aver noch open: Köönt Fleddermüüs ok lesen oder Verkehrswiesschiller verstahn?

En idyllische Weg...

Körtens sünd mien Fro un ik mal mit uns Fohrrööd in de Natuur föhrt. An en apen Feldweg steiht dor en Verkehrswiesschild, rund mit rode Ümrannung, merrn binnen dat Bild vun en Fleddermuus. Wat darünner stünn, heff ik verstahn: För Buerns un Förster is de Weg free un ok Fohrröder dröft wiederfohren. Aver wat schöllt de Fleddermüüs maken?

...un en Problem för de Fleddermüüs

Nu, sehn köönt se dat Schild twoors as Objekt, de Opschrift lesen köönt se avers woll kuum, un ok jümehr Ultraschall-Sinn ward jüm kuum helpen. Schietegaal — wi warrt uns woll nich in de Mööt kamen, un sönst ward wi uns woll vergahn!