vun Berthold Cordes

"Weest du egentlich, dat Störk en Flögelspannwiet vun bit to twee Meter hebbt un dat se op jümehrn Floog ut dat Winterquarteer in Afrika bit to 10.000 km fleegt? dat en utwussen Stork jeden Dag so wat 700 Gramm Nohren bruukt, Jungvögel dorgegen mehr as dat Duppelte? Un weest du egentlich, dat Störk or Aadboors, as welk seggt, so bi 32 Daag bröden doot un twee bit dree Jungstörk bit to 60 Daag lang düchtig fodert un groottogen warrn mööt un denn Merrn August twee Weken vör jümehr Öllern na Spanien or Afrika fleegt? Aver dat Störk en Sünnensaalv herstellt, üm jümehr Been vör Sünnenbrand to schulen, dat weetst du doch gewiss?"

Wat? Dat mit de Sünnensaalv kann doch bloots en Legende ween, so as dat mit de Babys, de de Stork angeevlich ok bringen deit?! Orr is dat etwa wohr? Ik mutt faststelln, dat ik man blots ganz wenig Ahnen vun disse groten, swatt-witt-fedderten, langbeenschen Vogels heff un dorüm ok kuum op en Fraag vun Marion, de "Störken-Mama", mit "ja" antern kann. Dorüm frei ik mi ok, dat ik bi Marions "Storkenfamilie" Nahülpünnerricht krieg.

De Pottkiekers sünd Nestkiekers! Se beringt de Jungstörken

Al 20 Johren is dat her, as Marion mit ehren Keerl Joachim dat Störkenneest op en Lanteernpahl obstellt hebbt. Vun dor an harrn se meist jedet Joohr vun dat Störkenpoor Besöök — un de nöhmen op jümehr Trüchreis na Afrika elkeen Johr twee or dree lütte Aadboors mit. De Lütten kregen meist vun NABU-Mitarbeider en Ring övertrocken, dormit jümehr Reis un Verblieven beluert warrn kann. Bi disse Arbeid stellt de Lütten sik, as weern se doot. Dat is bekanntlich een vun de anboren Reflexe, mit de Deerten — ok Minschen — op en Gefohr reageert. De annern Mööglichkeiten sünd Flucht un Kampf, man wenn en Wesen sik gegenöver de Gefohr lütt un hülplos föhlt, is de natüürliche Reflex dat Doodstelln. Dor mööt se gor nich över nadenken, dat kümmt vun sülvst.

Och Gott, de Lütten sünd ganz fix un all vun't Doodstelln —
un den lüttjen Moors hebbt se sik doch vullschietert!

Marion, Joachim un jümehr Kinner hebbt sik düchtig freit, dat uk dit Johr wedder de beiden Störkenöllern twee Jungstörke op de Reis na Afrika schicken ward. Se hebbt sik al mit anner Jungstörk tosamendaan un sik to'n Afscheed nochmal op't Huusdack daalsett: neegen Aadboors!! Na denn — goden Floog alltohoop!

Un nu hett mi Marion uk noch över de Geschicht mit de "Sünnensaalv" opkloort: De Störk besprütt de Been mit jümehr Schiet un schuult sik so vör de hitte Sünnenstrahlen. Fraag mi aver nich na'n Lichtschuulfakter.

Allns kloor?!