So weer dat Wedder in Junimoond

Dat Wedderdaagbook vun Uwe Mohr


De Meteorologen seggt jo, hüüt an 1. fangt de Sommer an. Over no Sommer süht dat nu wohrhaftig nich ut. De ganze Dag bloots düstern Heven, keen Sünnenschien, N-NW-Wind, un mit man bloots 11°C in Dörchsnitt recht koolt. Schuld doran ist Deep Annetraut. Over wenn Hoch Vinko se verjogt hett, koomt sünnigere Utsichten.

Bloots mit Warms mööt wi leider noch beten töwen, denn: "Sall Korn un Wien goot gediegen, mööt beid in Juni Warmes kriegen." Ole Nomen för den Moond sünd Gras-, Brook- un Rosenmoond. De sösste Moond in't Johr hett sienen Nomen von de römische Göttin Juno, dorut is denn Juni worn.


Pingstroos. Foto Uwe Mohr

Böös dröög is dat intwischen. Dat hett Petrus nu ok mitkregen un Regentrude op Tour schickt. An 5. hett se 16 l/m² ut ehren Rock wunnen. "Vör Johanni mut dat regen — noher kümmt he ungelegen."


Fröhstück an'n Pingstdag. Foto Uwe Mohr

An Wuchenend hebbt wi Pingsten. Dormit dat recht sünnig un warm ward, streckt Hoch "Wolfgang" sien Föhlers ut. Dor fallt mi jüst J.W.v. Goethes "Reineke Fuchs" in. Hier heet dat in eersten Gesang u.a.: "Pingsten, dat leefliche Fest, weer komen: Nu gröönten un blöhten Feld un Woold. Nobel, de König, reep de Hoff tosomen; keeneen sull fehlen! Un liekers fehle de een, Reineke Voss, de Schelm. He schliekert sik över de Koppel lang, dormit em keeneen von Hoff ut sehen kunn. So schuut dat bös' Geweten Licht un Dag." (Plattdüütsch U.W.M.)


Keem Reinke, de Voss... Jaja, dat böös Geweten schuugt dat Licht. Foto Uwe Mohr

Eerst Pingstdag harrn wi en Sommerdag mit maximal 27°C. Gegen Ovend geev dat Donnergrummeln mit Regen, poor starke Böen un Nevel. Tweet Pingstdag meist as de eerste, bloots mit de Warms weer bi 24°C Sluss. Anfang tweete Dekode een Sommerdag, as he sien sall. Ovens, halvig ölven, noch 25°C. Magst gor nich to Bett krupen, so schön is dat buten.

Over Wedder kann sik gau ännern. Von wegen, schon ut twee Sommerdoog en Sahara-Sommer moken, dat geiht nich, leeve Medienlandschop! Noch is de Schoopsküll ünnerwegs. Meisttieds twüschen 4. un 20. Juni. Wüllt hoopen, dat mit Anfang von de drütte Dekode un astronomischen Sommeranfang an 21. statt Harvstwedder nu de Sommer kümmt!


De Pingstoss lett sik dat smecken. Foto Uwe Mohr

Nödig brukt wi Regen. Bloots 312 l/m² (39%) sünd bet nu von Johrsnedderslag ankomen. Wat noch an Natten in de Eer is, puust en kohlen Noordwind eenfach weg. "Nordwind, de in Juni weiht, nich in gooden Roop he steiht."

De eerste Wuch in Sommer hebbt wi ansneden un sünd in de Mitt von't Johr ankomen. Langsoom ward de Doog nu wedder körter un dat Quinkeleren von de Vogels weniger. Leider is de Sommer noch ümmer in Aprilluun. To allen Arger hölp hier Deep "Hildegunde" noch düchtig mit.


Wennehr kümmt denn de Oss? En Bull weer uns aver noch lever... Foto Uwe Mohr

Hüüt is Sövenslöper. Regent dat, gift söven Wuchen Regen — seggt en Buernspruch. Nu jo, glöven heet nich weeten. Noch schient de Sünn. Wüllt over nich de Dach vör'n Ovend löven. Oh haue, haue ha, nu hebbt wi dat Maleur. In fast ganz Sleswig-Holsteen hett dat regent! Nich vertogen — de Julimoond bringt bald Sünn un Warms.


Sinnige Pingstloop. Foto Uwe Mohr

Wedderdoten letzte Moond (in Klammern de Doten vun'n Vörmoond):

  • De Dörchsnittstemperatur harr in 2 m Höchte 16°C (Vörmoond 12,3), dat sünd 0,6°C övert Middel.
  • De Höchsttemperatur mit 28,3°C (29) harrn wi an 10. un de deepste mit 4°C (2,2) an 2.
  • In'n Dörchsnitt harrn wi 20 cm in de Eer 17°C (13,7) un 5 cm över de Eer de deepste Temperatur mit 3,3°C (-3,3).
  • De Sünn hett uns 214 Stünn (201) anstrohlt, dat sünd 93% von't Soll.
  • De Solorstrohlung keem op 340 W/m² (301) un weer an hööchsten mit 1260 W/m² (1155) an 22.
  • Regen an 20 Doog (19) weer nich so dull. Bloots 44 l/m² (103,6), sünd 57% von't Soll, sünd fullen. Aftrocken dörch Evapotranspiration sünd 74 l/m² (80,3).
  • De Pusterich hett an meisten mit 48% ut W-NW weiht un an düllsten mit 46 km/h (6 Beaufort) ut W-NW.
  • De Moond harr 2 Sommerdoog (Tmax > 25°C) un 22 warme Doog (Tmax > 18°C).

Mehr Wedder? hartenholmer-wetter.de.


2.7.2014


na baven