So weer dat Wedder in Julimoond

Dat Wedderdaagbook vun Uwe Mohr.
All Biller: Uwe Mohr


Mit Sünnenschien, Wolken, Blitz un Donner, mit Regenschuer un düchtig Wind ut West, so treckt de Heumoond an 1. in't Land. Mit Heu, to'n Drögen op smucke Reuter, kannst keen Wiesch mehr finnen. Se ward nu dörch witte Ballen aflöst.


Reuter op de Wisch — dat weer eenmol


So süht dat hüüt ut

Gassen, Rogg, Hover, Raps un Weet ward langsom geel un wüllt döscht warn. Bald liggt wedder dat Brummen von de Meihdöscher in de Luft. Sommerwedder ward brukt!


Koorn schuckelt in Wind

Over mit bloots 14°, veele Wolken an Heven, knapp Sünnenschien is von Julis hitte Gloot noch nix to marken. Geiht over hüüt an 4. loos. Mit 28° meist so warm as bi't Footballspeelen in Rio! Hitte Dag, laues Speel. De Düütschen hebbt gegen de Franzosen 1:0 wunnen.

An 5. noch en Sommerdag mit 29° un schwül. An Ovend lüttes Gewidder mit twee Donnersläg — weer wohl Petrus Bidrag op dat 1:0 gegen Frankriek. Hüüt, trotz Wolken, de drütte Sommerdag. So wüllt wi dat geern hebben, denn: "Sall Korn un Raps good gediehn, brukt de Juli Sünnenschien."


Meihdöscher bi de Arbeit

Over nu de 8. Düütschland gewinnt gegen Brasilien 7:1. Dat hett Regentrude dorto bröcht, 31 l/m² Freudentronen to blarrn. Un Thor, de Donnergott, hett mit en grodes Füerwark ut Blitz un Donner wiest, dat he sik ok över dat Speel freut hett.

Un denn keem he, de 13. Keen gewöhnlichen Sünndag. Von wegen, dat weer en Final-Sünndag, de in de Sportgeschichte ingeiht! Düütschland is Weltmeister worn! Dat ganze Land freut sik. Langsom verswinnt de Fohnenpracht wedder in de Kartons.

Poor Doog wieder ward mehr övert Wedder as över Football snackt. Na denn: Regenwedder hebbt wi, un bloots 16°. De Sünn mut wedder schienen, denn: "Juliregen nümmt de Oorn den Segen." Schient over, dat de lunische Sommer vörbi is. Bloots de stedige O-NO pust wieder mit dicke Backen.


Gassen ward riep

Wat opfallt: de Doog ward al körter. Siet Sommeranfang föfftig Minuten. Dat hett de Kuckuck ok markt. Siet 22. röppt he nich mehr. He is op Tour no Afrika, 9200 km un flücht bloots nachts.

Anfang von de drütte Dekode hett Hoch "Aymen" dat Seggen. Ölven Sommerdoog hebbt wi middewiel, un een hitten Dag. "Wenn de Nächte langen, kümmt de Sommer erst ingangen." Na nu, wat is dat? Vör luder Hunnenbellen kriggst keen Oog to. — De Hundsdoog fangt an. Von 23.7. bet 23.8. bringt se de hittesten Doog in't Johr. Se hebbt ehren Nomen von Sirius, den Hundsstern.


Döschte Hover

Nu hebbt wi doch noch en beten von Deep "Paula"afkregen. Se kümmt mit feuchte Grööt ut Oosten. In de Packelaasch Regen un angenehme Afköhlung. Weer ok nödig, no de broddigen Doog. De letzte Dag in Moond lött uns buten mol nich sweten.


Allens süht bannig uprüümt ut: Stoppelfeld mit Ballen

Wedderdoten letzte Moond (in Klammern de Doten vun'n Vörmoond):

  • De Dörchsnittstemperatur harr in 2 m Höchte 24°C (Vörmoond 16°), dat sünd glatte 3°C övert Middel.
  • De Höchsttemperatur mit 30,6°C (28,3°) harrn wi an 19. un de deepste mit 7,1°C (4°) an 3.
  • In'n Dörchsnitt harrn wi 20 cm in de Eer 19,4°C (17°) un 5 cm över de Eer de deepste Temperatur mit 6,1°C (3,3°).
  • De Sünn weer meist in Duerinsatz, 271 Stünn! (214) 33,4% övert Middel.
  • De Solorstrohlung keem op 358 W/m² (340). Se weer an hööchsten mit 1162 W/m² (1260) an 31.
  • Regen an 15 Doog (20) hett 83,4 l/m² (103,6) bröcht. Allerdings sünd dörch Evapotranspiration wedder 99 l/m² aftrocken (74).
  • De Wind hett mit 41,3 km/h (6Bft) an düllsten ut SO pustet un keem mit 24,3% ut O-SO.
  • De Moond harr 18 Sommerdoog (Tmax > 25°C), 1 hitten Dag (Tmax > 30°C) un 30 warme Doog (Tmax > 18°C).

Mehr Wedder gifft ünner hartenholmer-wetter.de.


8.8.2014


na baven