Zeckenalarm!

Vun Gertrud Everding (den Sünnschienkieker)

Stickbreef

• Zecke (Gemeiner Holzbock, Ixodes ricinus)
• De Holtbuck höört to de Spinnendierten.
• Larve bloots 0,5 mm groot
• Nymphe:1,5 mm groot
• Utwussen Holtbuck: 3,5 - 4,5 mm groot

Igittigitt, wat för'n ekelhaftige Saak, so'n Diert! In mien Kinnertiet harr ik se al bi de Schaap ut'n Pelz puult un later denn bi uns Hunnen. Ne, ik krieg da immer en Schuuer över'n Rüch, wenn ik wedder een ruuttrecken mutt.
Dat Zeckenfever gifft dat al lang, dat harrn mennigmaal de Holtknechten hatt, wenn se nich för de Zecken oppasst harrn. Dat hett aver keeneen eernst nahmen. Dat güng na poor Daag von sülven vörbi. Wokeen hett sik da al üm kümmert? Nee, keeneen.

Aver denn was dat so wiet, de Zecken hebben sik mit de Viren von de Frühsommer-Enzephalitis, een slimme Hirnhautentzündung (FSME), und de Överdräger von de beuse Lyme-Borreliose infiziert. Se sülven warrn dorvon nich krank, sünnern blieven springlebennig.

Un dat is gefährlich: Zecken sind nu för Minschen een Dodesgefahr!

Dor wo dat infizierte Zecken gifft, da laten sik de Minschen jedes Johr gegen de slimme Lyme-Borreliose un gegen de FSME impen. Ok Hunnen sünd al krank worrn.
Dat gifft Landstriepen, dor sünd de Zecken all mit düsse Krankheiten ansteken, un dorto höört de Balkan, Österreich, de ganze Süüden von Düütschland, aver ok woll maal Sleswig Holsteen un de groten Reveeren von Hessen, Thüringen un den Harz. Dor kann een sik de Borreliose un de FSME (Hirnhautentzündung) halen. De Zecken sünd dor nöömlich meist de Överdräger von düsse Viren un Bazillen. Fragen Se na, wenn Se Ehrn Urlaub buchen.
To'n Glück sünd noch nich alle Zecken infiziert. Denn is dat harmloos, wenn se bieten un sugen don. Aver wokeen weet dat? Is se süük, is se nich süük?

Dat Zeckenleven...

...besteiht in de Hauptsaak ut Blootsupen un Eierleggen, as dat Bild wiest (Dank för dat Bild an www.unine.ch). As bi mennig Aarten von dat Krimmeltüüg, sünd de Fruunslüüd hier wedder de gefährlichsten.

Nymphe von den Holtbuck —
1-1,5 mm lütt, aver ok al gefährlich!

Keen Impschuul?

Wenn Se nich impt sind or dat vergeten hebben, denn much ik Se nu seggen: Passen Se immer goot op!
Gahn Se in Zeckenreveeren, wo dat meist ok von bekannt is, in Holt, Büsch un Wischen mit lange Büx un Hemd oder Jack, setten Se sik en Hoot op.
De Zecken rüken dat warme Bloot von de Minschen un Dierten un laten sik op ehr Opper fallen. Dat is för se graad as för uns de Duft von Heuhnersupp, wenn wi dullen Smacht hefft. Dor schreet wi ok: Nix wi ran an Töller!

1. Wenn Se een Holtbuck bi sik an den Liev finnen, denn trecken Se em vörsichtig mit en gode, faste Pinzett or 'ne richtige Zeckenpinzett (is nich düüer!) dicht an de Huut rut. Nich to ruppig rieten, süns geiht de Kopp kaputt oder de Rüssel ritt af, un de Holtbuck speet dat Gift düchtig in de Stichsteed un in Ehrn Liev rin. Nienich Parföng, Nagellack oder so'n Tüügs op dat Viech droppen! Bloots nich! Denn speet dat noch duller! Kieken Se na, hebben Se dat ganze Diert mit all sien Been un ok den Rüssel rutkregen? Wenn de nömlich binnen blifft, gifft dat en Wunn, de lang eitern deit.
   Desinfizeern Se de lütt Stichwunn, wenn dat Beest heel rut is.
2. Goot is dat, wenn Se den Holtbuck nich mit de Finger anfaten, nich glieks kaputtmaken un verbrennen, sünnern em in en lütt Deckelglas mit Spiritus oder Alkohol (70%ig) opbewohrn. Bit Se richtig krank warrn, kann dat womööglich 3 Daag bit poor Maanden duuern. Villicht is dat denn to laat för en gode Hölp.
   Dorüm: An besten glieks na'n Dokter! Dor möten Se denn aver dat Glas mit de Zeck mitnehmen!
3. Passen Se ok op sik sülven op. Is dor op'n maal en rode Steed, wo de Holtbuck beten hett? Villicht warrt de rode Rand ok immer grötter (Borreliose)? Kregen Se Fever, doon de Arms un Been weh? Hebben Se Koppien, is de Hals or Rüch stief? Nich lang täuven! Gahn Se hen na'n Arzt! Ok wenn Se nix von en Zeckenstich markt hefft. De Holtbuck is villicht lang weg. Is al noog, wenn Se in en Zeckenlandschap west sünd. Wenn Se de Zeck in dat Glas noch hebben, denn mutt se mit na'n Dokter, ok wenn dat villicht al paar Maanden her is.

De Zecken, wenn se sik mit Se Ehr Bloot vullfreten hefft, sehn nich graad sympathisch ut. Een kann sik würklich vör de Beester grulen. De Liev is woll dreemaal so dick un se wiggt nu woll 200 maal mehr as vörher, wo se noch'n leddigen Buuk harr. Un se sprütt an Enn noch maal ehrn Qualster mit dat Gift ünner Se Ehre Huut rin. Dat is, as wenn de Minsch Kümmel in sien Suuerkohl krümelt, dormit he den Kohl goot verdregen deit.
Kann poor Daag bit twee Weken duuern, bit se satt is, denn fallt se von sülven af un se finnen ehr villicht in de Kledaasch. Aver se kann ok eenfach wegkrupen or rünnerfallen un keeneen weet, dat se dor west is. — Ob se up SeEhrn Bettvörlegger liggt? Kieken Se na!! Se süht ut as Rhizinussaam. Dorüm ok de latiensche Naam "Ixodes ricinus".

Un dorüm:

4. Villicht is dat sowoso an besten, Se gahn glieks, wenn Se an sik so'n Beest gewohr warrn, to Se Ehrn Dokter. De treckt dat Diert seker rut un seggt Se glieks, up wat Se nu uppassen möten, damit Se nich krank warrn. Un he kann Se ok achterran villicht noch en Heil-Serum geven, wenn Se gau noog hengahn un wenn dat neudig is.
An besten, Se kregen keeneen von de Beester. Aver dat kann een nich ännern. De Welt is ja so scheun un spazeern gahn is noch schöner!

To'n Enn!

Laten Se sik gegen Borreliose un FSME impen, denn sünd Se op de sekere Siet! De Zecken sünd denn nix as harmlose, aver ekelhaftige Spinnendierten.

Un veel Spooß in Se Ehrn Urlaub!