Flupp un weg! —
De Zwergtaucher
— tachybaptus ruficollis —

vun Antje Heßler

Wedder opduukt!

De Zwergtaucher höört to de Familie vun de Lappentaucher. Vun düsse Oort Watervagels is he de Lüttste, is lütter as en Duuv. Man kann em in Europa överall andrapen. He hett keen Swömmhuut mank de Töhn, so as de Aanten. Liekers kümmt he ganz flott vöran, denn sien Tehn sünd orrig breed dör so nöömte "Swömmlappen". Dörch sien schuuch Verhollen kriggt man em selten to sehn, ganz besünners in de Bruuttiet. Dor söcht he sik en stilles Water, mit Schilf un anner Waterplanten bewussen, de in't Water hangt. Dat schützt em vör Fienden. Dat bruun bit düsterbruun Sommerfedderkleed passt sik de Natuur goot an. He is dormit blots swoor uttomaken.

Sogoor ünner de Zappen is de Zwergtaucher (de helle Vagel vörn) en Winzling!

Wieldat de stillen, vun Röhricht afschermten Water in uns Tied heel raar woorn sünd, is de lütte Vagel vunwegen sien Levensruum böös in de Kniep kamen. He hett sogoor mal as "stark bedrauht" up de Rode List stahn, siet 2003 is dat avers wedder wat beter mit em woorn.

Zwergtaucher (rechterhand) un Zappen

Nich Moder un Kind, nee: Zappi un Zwergtaucher

In Aprilmaand fangt de Balz vun den Zwergtaucher an. Wenn man Glück hett un ehr Stimm kennt, kann man se beter höörn as sehn. Se schriegt hooch un lang, reinweg as'n Triller. Dat Nest is en Swömmnest. Se leggt fief bit söss Eier. Na rund dree Weken kruupt de Lütten ut de Eier. De lierlütten Fedderknüdels gaht glieks to Water un köönt stantepe swömmen. Mit energisches Piepen paddelt se de Olen achterran. Se sünd Nestflüchter. Söss Weken warrt se aver noch vun de Öllern fodert. Dorna fangt de Öllern noch en tweete Bruut an. De Zwergtaucher kann bit to söventein Johr olt warrn.

Zwergtaucher duukt af, Zappi verschreckt sik

Den Winter över leevt de Zwergtaucher oftmaals wiet weg vun dat Bruutwater. Ok denn sünd se böös schuuch. Blots korte Tiet laat se sik sehn. Se sünd mehr ünner as över Water. Mit ehr griesbruun Winterkleed sünd se goot tarnt un swoor uttomaken. Se fangt lütte Fisch, Kaulquappen, Larven, Insekten, Watersnicken un anner lütt Deerten. De Zwergtaucher sünd gode un flinke Swömmer un noch betere Düker.

Wedder dor!

As ik vör en poor Daag mal an de Trav weer, hebbt sik doch wedder de lütten Zwergtaucher sehn laten. Seker sünd dat de vun verleden Johr. Twors kunn ik se blots ümmer för en korten Momang sehn. De mehrst Tiet weern se ünner Water. Ik kreeg vun ehr blots de Waterkringel to sehn, de vun't Ünnerdükern nableven.

Flupp! Een Zwergtaucher is afduukt, een kiekt to

Aver ik heff mi düchtig freut, dat ik se wedder to sehn kreeg. Den helen Sommer hebbt se sik nich wiest. Ümmer wedder heff ik na ehr utkeken. Aver narms kunn ik se utmaken. Seker harrn sik de beiden mit ehr Kinner in't Schilf verkrapen. Dor weern se sekerer vör de Raubmöven un anner Fienden.

Zwergtaucher (rechterhand) un Zappen

Den helen letzten Winter heff ik ümmer versöcht, de Zwergtaucher to knipsen. Aver wenn se mi wies wöörn, weern se schwupps ünnerdükert. Dat sünd bannig schuuch un heemlich Watervagels. Ik wüss ganz genau, wo se antodrapen weern. Meisttiets dükern se ünner de in Winter lerrigen Bootssteeg up. Mitünner weern se sogoor beid to glieken Tiet to sehn. Ok an de Brüch vun de Lootsenstatschoon leten se sik sehn. Dor wöör ik doch wat neger an de Zwergtaucher rankamen. Aver an de Brüch steiht: Betreten verboten!

Kort entslaten heff ik bi de Lootsenstatschoon ankloppt un nafraagt, up ik to'n Knipsen vun de Zwergtaucher mal up de Brüch kunn. De en Loots grien mi an un anter up mien Fraag: "Sicher, aber fallen sie beim Knipsen nicht ins Wasser!" Ok de Lotsenbrüch hett mi nich holpen. Immer wenn ik meen, nu klappt dat, weern de lütten Zwergtaucher wedder ünnerdükert.

Vun den rechten Zwergtaucher sühst noch den Achtersten

Ok Spazeergänger weern de lütten Zwergtaucher wies woorn un menen mit n' beten Sorg in de Stimm: "Kuck mal, da schwimmen noch kleine Entenküken! Wie sollen die über den Winter kommen?" Ik heff denn verkloort, dat dat utwussen Zwergtaucher weern.

Nu geiht dat up den Winter to un ik warr seker wedder versöken, de Zwergtaucher to knipsen. Villicht heff ik dütt Johr mehr Glück.