Wi tellt de Stünnen, Johr un Dag.
De Tied wasst op ehr Aart.
Uns Johren wasst bloots na’n Bedrag;
uns Leven wasst in’t Hart.

Uns Johren wasst un hebbt en Richt,
un dat is nich de Dood.
Leeftallig maalt se uns Gesicht,
un wat se maalt, is good.

Wi smüüstert na uns Frünnen hin
un wünscht ehr alltied Weel;
un fallt ehr Schritt in unsen in,
denn is de Weg dat Teel.

En frohes nieges Johr, leve plattdüütsche Maten un Frünnen!

Ja, wi wüllt mit Tovertruun in't niege Johr vörutkieken. Avers hier schallt wi ja nu eerstmaal noch in den Dezembermaand vun't ole Johr trüchkieken. Un ok de Dezembermaand harr sien Undeepden.

Dat Gedicht baven heff ik in en Hoochsommer schreven, nich to en nieges Kalennerjohr, sünnern to en nieges Levensjohr: 2012 heff ik dat mien leve Frünnin Hannelore Hinz to ehrn Bortsdag toegent. Hanne Hinz is nu ok op de grote Reis gahn, merrn in de Wintertied, in'n Advent -- in düt Johr, dat uns so mennig vun uns Frünnen un Mitmakers nahmen hett. Mien Seel brukt en Pudelmütz, much ik dor mit Hanne seggen. Un ok uns Maat Günter Sohnemann, de Verfater vun't "Seemannsgarn", is Anfang Dezember na korte swore Krankheit vun uns gahn. Man sien Reeg warrt liekers wiederlopen, denn he hett uns all sien Texten achterlaten, un de warrt wiederhen rutkamen.

Ja, wi hebbt ok niege Mitmakers, dat wüllt wi mit Freid anerkennen: Günther Kloppert, as al Stefan Siegmund-Schultze tovöör, sünd Maten ut Thomas Seemann sien oostfreesche Natuurfrünnen-Bande un wüllt uns mit Natuurbeobachten un sünnerlich ehr exzellente Fotos ünnerstütten. Wi heet ehr hartens willkamen.

De Nevelmaand weer noch Övergang, de Dezembermaand steiht vull in't Licht vun de Wiehnacht -- un wat hebbt wi nich för'n Füllhoorn an wunnerschöne Bidrääg vun all uns Maten utschüdden köönt! Nerrn in de List finnt Se all; bloots en poor vun de Bridrääg in de List hebbt nix mit Wiehnachten to doon. Ludgerd Lüske hett nich bloots de beklemmen Barmenslosigkeit vun de Welt in sien Adventsreeg (1, 2, 3, 4) afbildt, sünnern lööst ehr ok op in Gottvertruun, översett Heines Wiehnachtsdroom un vertellt uns, woans een de Welt to'n beter Steed maken kann. Dat liggt in de Hannen vun uns all un vun jedeenen. Ok in de Live-Reportaasch vun Cord Denker kannst dat sehn. De Mannschap vun de MS Rheinland beleevt "Witte Wiehnachten", avers nich vun Snee... Un för de Kinner hett Klås Tüxen de Märken vun'n Wohld un vun de Christroos un ok noch en Storm-Gedicht överdragen.

Wohraftig, bloots wenig Bidrääg hebbt nich Wiehnacht to'n Thema: Günter Schiller ameseert sik an Omas Bortsdag, Heinz Tiekötter weer'n rechte Sleef, un mit den Johrsutklang kiekt Cord Denker trüch un vörut op de Corona-Pandemie, un Hildegard Tölke hett sogor Informaschoonen ut allereerste Hand. Uns Reeg mit Planten ut Pagels' Goorn geiht mit dat Moos toenn. Neegst Johr -- ach nee: düt Johr warrt düsse Reeg nich wiederföhrt, dorför warrt wi en niegen Klenner op dat Künst-Flack hebben.

Bi en Bidrag vun Helmut Marxen is mi wat passeert, wat al fakener mal vörkeem: Ik harr sienen Text 2011 nich in den "Fertig"-Ordner smeten, harr dat sachs vergeten, un so full he mi düsse Wiehnachten wedder in de Hannen. Upps, dach ik, dat mutt ik doch rutbringen! -- Tja, un nu hebbt wi twee Verschoonen, un ik heff dat nu eerst markt. Is mi schaneerlich, dat geev ik to, avers nich allto dull. Ik laat de twee Verschoonen stahn. De Tall vun Bidrääg op Plattpartu steiht nu bi 4000, nich mittellt de Computerie-Bidrääg (totaal överhaalt vun de Tiedlööp, reinweg en Museum!) un de enkelten Indrääg in Natuurnotizbook, Erinnern-Notizbook un Kommentaarn -- sünst güng dat sachs op de Teihndusend. Dor kann ik eenfach nich allens in'n Kopp behollen, wat ik mal in de Finger harr; ik mutt mi op mien Dateiverwalten verlaten. Wenn Se wat opfallt, 'neem ik slampt heff, mailt Se mi! Dankschöön!

Leve Maten un Frünnen, geern much ik Se all den Weg dör de Tied smödig un even maken, man wi mööt ja doch alltosamen un liekers jedeen enkelt dör de Tied wannern, un nüms kann de annern vörut gahn un vörsorgen... So wünsch ik Se nu vun Harten en godes Johr, en Johr ahn Bang un Verlust, mit Freiden un Wassdom -- un mit veeeel Plattdüütsch, spraken un schreven Plattdüütsch! Ik frei mi op twölf niege Maanden mit Se! Blievt Se behöödt!


Nu de Linkliste. Op de Links bruukt Se bloots klicken, dat Se henkaamt.

Plattdüütsch Künst:

Allennig staiht en Dannenboom. Gedicht vun Heine, överdragen vun Ludgerd Lüske    (25.12.)
Notizen ut'n Maimaand. Fotos un Verse vun Marlou Lessing    (6.12.)


De Welt un Gott:

De Koorten. Vun Klaus-Dieter Tüxen    (27.12.)
Seemannsgarn: "Witte Wiehnacht". Vun Günter Sohnemann    (26.12.)
Winnelwessel in Bethlehem. Vun Cord Denker    (25.12.)
Dei Wiehnachtsboom. Leed vun Hildegard Tölke    (25.12.)
Wiehnachten -- allein tauhuus. Vun Ludgerd Lüske    (24.12.)
Tüschken Advent un Hilligaobend. Vun Ludgerd Lüske    (23.12.)
Dei veierde Advent. Vun Ludgerd Lüske    (20.12.)
Speeltüüg för alle. Vun Helmut Marxen    (19.12.)
En oll Wiehnachtsleed. Vun Karl-Heinz Sadewasser    (19.12.)
Mien Wiehnachtsclown. Vun Addi Kahl    (19.12.)
Dei drüdde Advent. Vun Ludgerd Lüske    (13.12.)
En laden Schipp. Vun Marlou Lessing    (13.12.)
An de Veddeler Brückenwaag. Vun Heinz Tiekötter    (6.12.)
Grootmoder ehr Negentigste. Vun Günter Schiller    (6.12.)
Dei tweide Advent. Vun Ludgerd Lüske    (6.12.)


In't Lütte Gebeedbauk:

        Wiehnacht. Vun Ewald Eden    (25.12.)

In't Erinnern-Notizbook:

        An'n drütten Advent. Vun Antje Heßler    (13.12.)


Natuur un Wetenschap
:

Planten in Pagels' Goorn: Moos. Vun Thomas Seemann, Günther H. Kloppert un Marlou Lessing    (20.12.)


In't aktuelle Natuurnotizbook:

        Lütt Broder kiekt di to. Vun Thomas Seemann    (13.12.)


Wat in de Welt vörgeiht:

Breiw van Covid 19. Vun Hildegard Tölke    (28.12.)
Corona-Daag. Vun Cord Denker    (27.12.)

...un twee niege Indrääg in Marlous plattdüütsch Notizbook.


För Kinner:

Modder Sünn ehr Kinner: De Christroos an de Muer. Märken vun Sophie Reinheimer, överdragen vun Klaus-Dieter Tüxen    (20.12.)
Knecht Ruprecht. Gedicht vun Theodor Storm, överdragen vun Klaus-Dieter Tüxen    (6.12.)
Modder Sünn ehr Kinner: De Wohld slöppt in. Märken vun Sophie Reinheimer, överdragen vun Klaus-Dieter Tüxen    (6.12.)



Hartlich grööt

Marlou Lessing