De Afstimmen

10 lütte Brexiters weern överall dorgegen;
een hett sogoor sik sülvst verneint,
dor weern dat bloots noch negen.

Dat Uttelln

9 lütte Brexiters telln Stimmen in de Nacht;
man een hebbt se to wenig tellt,
dor weern se bloots noch acht.

Dat Ergeevnis

8 lütte Brexiters, de kunn'n ehr Glück nich glöben;
een kreeg vör Freud en Hartinfarkt,
nu sünd dat bloots noch söben.

De Kritik

Teihndusend Brexitgegner repen: "What a mess!"
Een Brexiter sä: "Recht hebbt se!" —
Nu sünd dat bloots noch söss.

Leaving?!

6 lütte Brexiters, de repen mal "Vote Leave!" —
Een nehm dat wöörtlich un güng weg;
nu sünd dat bloots noch fief.

"Bye! I'm leaving!"

Ernüchtern

5 grote Wahlverspreken sünd nu nix mehr weert;
een Brexiter gefull dat nich —
nu sünd se noch to veert.

Konflikte

4 lütte Brexiters, de hebbt Intrigen spunnen;
de een sett sik na Irland af,
en niegen hebbt s' nich funnen.

Feigheit

3 lütte Brexiters wulln Johnson, man de sä:
"Premierminister warr ik nich!"
Nu sünd dor bloots noch twee.

Reddung

2 lütte Brexiters, de weern totaal frustreert,
bet Brüssel wedder Schiet buut hett —
dor hebbt se sik vermehrt!