10 lütt Investmentbankers wulln en Bank bedregen,
de een wähl Lehman Brothers ut —
nu sünd dat bloots noch negen.

9 lütt Investmentbankers hebbt en "Derivat"
ut fule Hypotheken maakt —
bloots acht reddt Vadder Staat.

8 lütt Investmentbankers harrn en Schuldverschreben;
de een harr dat vun Grekenland —
nu sünd dat bloots noch söben.

7 lütt Investmentbankers harrn gewaltig Stress;
een hett den Stresstest nich bestahn,
nu sünd dat bloots noch söss.

6 lütt Investmentbankers denken positiv —
man Denken weer to swaar för een.
Da weern dat bloots noch fief.

5 lütt Investmentbankers güngen spikeleern;
de een hett op sik sülven sett —
nu sünd se noch to veern.

4 lütt Investmentbankers flögen mal na'n Maand,
den een hett't da so good gefulln,
dat he da hüüt noch wahnt.

3 lütt Investmentbankers setten op BP
un swemmen staats in Geld in Ööl —
dat överleven twee.

2 lütt Investmentbankers wulln Renditen sehn;
de een hett Bernie Madoff truut —
de letzte bleev alleen.

1 lütt Investmentbanker sä ok mal wat Wohrs —
da sään de Lü: "He lüggt al we'er!"
un pedden em in'n Mors.

 

 

Ganz ahn Investmentbankers, dach ik, is dat fein —
un as ik in de Runde keek,
da weern da hunnertteihn!

Wat maakt wi nu?!???