Ut un vörbi

vun Behrend Böckmann

Bi't Geld hürt dei Fründschaft up — un so is dat ok inne rod-gräun-gäle Taukunftskoalitschon kåmen. Mit dei "Tiedenwenn" wull man allens daun, dat keinein in Düütschland tau Schaden kümmt un dat Land wiederhen as dei schöönste Blaum in'n Weltgorn bläuht. Un denn keem 'n Energie- un Verkihrswenn': Atomstrom wech un  Sünnen- un Windenergie her, Verbrenner gägen E-Autos utschudern, 'n nieget Heizungsgesetz möt her... Dei Tiedenwenn' ward 'n Wirtschaftswenn': Dei Wirtschaftskraft ward ümmer lütter un noch lütter, wenn dor nich dei Rüstung wier; dei Woren warden dürer un man möt för'n Currywust mit Tüffelsticken hier un dor all 10 Euros utgäben un för'n Streuselschneck an'n Backworenstand 2 Euros henleggen. Un denn dei Vörschriften, woans man bäuten un wat 'n äten sall... Un Düütschland buucht in Südamerika Radwääch as Teiken vonne Entwicklungshülp, wat ja an sik nix Schlechts is, œwer in Dresden geiht taugliek dei Carolabrügg tau Bruch, un dor kriggt ein doch dat Nådenken œwer Prioritäten ... Dei Minschen warden untaufräden, un man måkt mit 'n „Demokratieföddergesetz“ wedder Geller locker, üm denn Aktivisten as „Omas gägen rechts“, „Rentjähs for future“ orrer dei vonne Rägenbågenbewägung gägen  dei „Populisten“ uptauwiegeln. 

11.500 neue Beamtenposten hett dei Taukunftskoalitschon inricht't, dorünner ok Posten, dei sik üm dei välen Frömden kümmern; denn inne Welt gellt Düütschland ümmer noch as dei Urt, wo man åhn Arbeit gaut läben kann. Un dei nich ümmer insichtig un gnatzig Bevölkerung ward von 'n Kanzler verspråken, gägen dei „irreguläre Migration“ vörtaugåhn un dat all, dei in Düütschland nix tau säuken hemm', ganz fix wedder afschåben warden. Œwer dor kennt hei nich gaut nauch dei düütschen Gesetze — un ihrer dat so wiet is, verschwinnen nägen von teihn Kannedaten.

Dei hemm' Karkenasyl krägen, sind ünnerdükert, hemm' sik 'n Afkåten nåhmen, sünd unmünnig, warden duldt, sünd krank usw... Poor Anstännige sünd in'n Utbillung, liehrn Düütsch un verschwinnen nich, un wieldat ein dei lichter opfinnen kann as dei Ünnerdükerten, warden dei — dei Anstännigen — denn as Eerste afschåven. In dei Utsichtslosigkeit. Un dei Firmen kamen üm ehrn Nåwuss un üm dei Möhgde, dei sei al in de Lüüd investiert hemm. Dei pure Irrsinn.

Un man is stolt, dat man dat Cannabisgesetz un dat "Sülfstbestimmungsgesetz" in Kraft setten däd. Jederein kann nu drei Hanfplanten uptrecken un ok ganz licht sienen Nåmen von Paul up Paula orrer Fred up Frieda ännern, sotauseggen up Wunsch dat Geslecht sien, wat 'n gråd sien will. Un disse feministisch utricht't Koalitschon höllt dat ok för normal, dat dei gräune Deputierte Tessa, dei einst 'n Markus wier, mit Stäkmuster œwer un œwer vull, sik mit 'n Hand inne Büx in'n Schritt rümhanteert, wat sogor dei AfD-Deputierte von Storch för „'n Schande för den Düütschen Bundsdach“ höllt, un dei mutt dat ja weiten. 

Un denn ümmer wedder Striet üm't Geld un dei Schullenbrems. Dei gäle Finanzminister höllt anne Schullenbrems fast un versöcht, dörch 'n anner Wirtschaften Geller tau sporen, taun Bispill bi't Börgergeld för tauwannert Minschen. Œwer hei måkt dat so klammheimlich un dei rode Kanzler un dei gräune Wirtschaftsminister sünd nich inverståhn mit dat, wat nu as Popier taun Wirtschfatswenn' vörlecht wür. Gäl hett utspält, den Kanzler platzt dei Krågen, Lindner ward rutboxiert, dei annern FDP-Minister sallen ok gåhn, Wissing schmitt dat Parteibauk hen un blifft, Habeck will dei Finanzen mit verwalten, dei Kanzler dei Vertrugensfråch stellen, Fiete Merz freut sik all, nu endlich Kanzler tau warden, un is tauversichtlich, dat em nich noch eins so as tau Angies Tieden 'n Sträk dörch sien Räknung måkt ward. Un dat allens passiert in dei Nacht, as Donald Trump huushoch dei Wåhl taun 47. USA-Präsidenten winnt.

Toupet orr not Toupet, that is the question!

Dor fraagst di doch: Will uns dor båven een tau'n Narrn hebben? Måkt dei leve Gott Witze? Dor krigg ik Twievel an sien Humor — ik kann nich so recht lachen. "Nee?", fraagt Gott — un leggt noch ein båvenop: Dei Eer is hitter as je, un morgen beginnt dei Klimakonferenz in dat Gasexportland Baku — un dei Karneval.