Daschendeev un Andänzer

vun Heinz Tiekötter


Annerlest heff ik mi op'n Patt no Hamborg mookt. Ik wull mol wedder de grote Welt beleben. Wat jo meist datsülbige is; för de mehrsten Lüüd ut uns Provinz is Hamborg de grote Welt. Ik fohr mit denn mit de Bohn. Free Parkplätz gifft dat in de hele Stadt nich.

Wat all op'n Bohnhoff för'n Bedrief is, dat gläuvt di tohuus keen Minsch. Sowat gifft dat allenfalls op'n Footballplatz, wenn St. Pauli gegen de Bayern speelt. Dor warrst du an'n Ingang ok drückt un drängt un dat geiht vör un torüch. Wenn du denn de Sperre achter di hest, tell lebber no, wat du noch alle Knööp an de Büx hest. Jüst so geiht dat veeruntwintig Stünn an'n Dag, Sünn- un Fierdags, in de Wannelhall op'n Hauptbohnhoff vun Hamborg to.
Un denn kümmt mi merrn in düsse Menge so'n süüdlännischen Typ in de Mööt, gifft mi de Hann, haut mi op de Schuller, as wenn he mien beste Fründ is, lacht mi an un drückt mi nochmol an sik, bevör he mi 'n goden Dag wünscht un mien Modder hartlig gröten lett. Un denn verswinnt he in den groten Pulk achter mi. Un ik frei mi noch öber so veel Nettigkeit un öberlegg, wat de Mann villicht för dat Stadt-Marketing ünnerwegens is, üm Hamborg 'n beten sympathetischer to moken. Miteens fallt mi in, wat ik öber de Gauners in de grote Stadt leest heff. Slagordig klopp ik mien Daschen af. Un denn weet ik all, dat de, de nu mit mien Kniep ünnerwegens is, 'n fründlichen Minschen is un Talent to'n Danzen hett.

Argerlich öber mi süllmst loop ik gau no de Bohnhoffswach. Dor will ik den Diebstohl mellen un 'ne Anzeige moken. Vör'n Tresen vun de Wach stoht all etliche Minschen mit datsülbige Anliggen. As ik endlich an de Reeg bün, seggt de Udl, dat he all soss Protokolle opsetten mutt. Man sowat duert elkeenmol foftein Minuten; he hett ober in dottig Minuten Fierobend. Dar weer nu nett, wenn ik in'ne Stünn nochmol vörbi koom, wenn sien Kolleeg Deenst hett. Ik froog gau, wat de Bohnhoff nich vun Kameras öberwacht ward. Jo, meent de Udl noch, bevör he anfangt, sik ümtotrecken, denn nu sünd dat bloots noch twintig Minuten bit to sien Fierobend, de Kameras harrn se europawiet utschreben un de döcht nich veel. Ik sall man lebber röber no Karstadt gohn; de hebbt 'ne betere Öberwachung. Dor warr ik nich so licht beklaut.


26.2.2019


na baven