Refa mit Kuddl

vun Heinz Tiekötter

In de 1970er Johren kemen de Refa-Studien op. Allerwegens hebbt Inschenööre sik för düt Fack utbillen loten. Mit de Refa wull'n se Tiet gewinnen un allens schlanker moken. Öberall in de Fabriken weern se an't Ümorganisieren. In de Produktschoon is dat Loger nu vun de Anleperung no de Fardigung komen. So weern de Mitarbeiders nich so lang ünnerwegens, üm sik Warktüüch or Dele to holen. Utleperung un Kontrull kreeg 'n neen Platz un de groden Fabriken bestellten jemmer Bedarf an Materiool "just in time"! Keen Stillstand, Tiet insporen un keen Handslag to veel. Dat weer de nee Devise.

Mi weer düsse Technik all lang vörher bekannt; dat weer noch in mien Lehrtiet. Bibröcht hett mi dat Kuddl Kraasch. Kuddl weer all dreeuntach-entig Johr oolt. Wenn wi veel to doon harrn, hölp he bi uns as Küper un Neiher ut. Kuddl weer noch as Matroos op Seilschepen fohrt. Wiel dat he ok ne Tietlang op utlännische Dampers arbeit hett, kreeg he blots ne lütte Rent. So stunn Kuddl jümmers paroot, wenn dat veel to doon geev. In sien hoget Oller klatter he in de Luken rüm, jüst so fix as ik as sossteinjährige Lehrjung.

Sien Wetenschop öber Refa hett Kuddl mi so bibröcht: Wi löschen den "American Trader" mit'n Barg Konserven ut Taiwan. As Tallyfirma weern wi jo nich blots för de Stücktall vun de Worn tostännig, wi harrn ok optopassen, dat all de Verpackungen, de Sacken, de Kisten un Kartons intakt weern. Also weer Kuddl Kraasch an Bord, harr Neihgorn, Liem, Kleevband un Hamer un Nogels bi sik, dormit he allns repariern kunn, ehrdem wat an de Empfängers utleepert worrn is. Un ik sull wat liehrn un müss Kuddl to Hand gohn.

An Luk 3 harr'n de Winschlüüd 'n Utscheter produziert. De Hiev harr an de Lukenkumming opsett un weer koppheister gohn. Nu legen all de Kartons mit Ananas an Deck. Loot doch blots mol een Karton mit Obst-konserven ut fief Meter Heugte op'n iesern Bodden falln! Denn hest du 'n Vörstellung, wo dat utsütt, wenn nu ne ganze Hiev afstört is.

Allerwegens legen opreten Pappkartons an Deck. De Büchsen weern dörch de Gegend rullt un inbuult. Kuddel un ik packten de Dosen wedder trüch in de Kartons in un kleevten dor Liemstriepen üm. Wi nehmen uns Karton för Karton vör.

Mien Ammer mit den Liem harr ik blangen mi op de Eer stellt un heff jedetmol so'n depen Diener mookt, wenn ik mien Pinsel instippen däe. Kuddl Kraasch seh dat un full mi in de Arms: "Teuv mol, mien Jung, un holl mol 'n Ogenblick op! Wat mookst du dor? Wullt du in Zirkus anfangen or is dat hier 'n Sportvereen?" Ik heff em froogwies ankeken un verstoh nich, wat he meent harr.

"Stell dien Ammer mit de Kleev mol dor op den Winschbock, so dat du good in Stohn ankümmst. Denn bruukst di ne to bücken, schoonst dien Krüüz un bist fixer bi de Arbeit. Wat gleuvst du wull, woran dat liggen deit, dat ik mit mien tachentig Johrn" — hier harr Kuddl 'n beten ünner-dreben — "dat ik noch noog Knööf för düssen Job heff? Ik heff mien Leben lang öberleggt, bevör ik mienen Arbeitplatz so inricht heff, dat ik mi schonen kunn un liekers ratschonool arbeiten. Mann, Jung, du muttst doch toeerst öberleggen, bevör du mit diene Arbeit anfangst. Denn kannst du di dat Leben veel lichter moken! Un fixer warst du ok."

Süh, de mehrsten Spezialisten hebbt Refa an de Hoochschool studiert. Kuddl Kraasch hett dat all lang wusst un mi hett he dat ok bibröcht.

PS:
In de sosstiger Johrn leeg de "Passat" bi Blohm un Voss in't Dock. Se is dor repariert worrn. Hüüt liggt se jo in Travemünn. Kuddl un ik kemen dor mit de Fierobend-Barkass vörbi. Wehmeudig keek de ole Mann na de Tops vun de hogen Masten un de Rahen hooch. Ganz liesen un mehr so to sik süllmst heur ik Kuddel seggen: "Och wat wurr ik dorför geben, wenn ik noch eenmol dor boben stohn kunn!"

De Passat