Besöök op de "Arctic Sunrise"

vun Katja Renfert


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Friedag dacht ik, wat maak ik denn Pingsten?
Ik heff mi anwöhnt, in'n Veranstaltungskalenner vun kulturlotse.de to kieken, för de ik uk aktiv bün. In de Website is allens ut Hamborg un dat Hamborger Ümland binn, wat keen Geld kosten deit. Un denn sehg ik dit!

Foorts wüss ik: Dor will ik morgen hen! De Haven, Water, Schepen, dor geiht mi dat Hart op. Un denn uk noch den Iesbreker vun binnen to sehn un vun de Ehrenamtlichen bi en Föhrung wat över dat Schipp un de Aktionen to erfohren, dat weer wat!

Nadem ik Sünnavend Middag mien lecker Grööntüüch-Pott mit Mairübchen, Tomate un Zippel, wat ik op'n Wochenmarkt inköfft harr, mit een Tofu-Würstchen un natüürlich frische Petersill opeeten harr, bün ik glieks mit 'n Bus un de U-Bahn na de Landungsbrücken fohrt.

Dor weern al 'n Barg Lüüd, un an de Landungsbrück 7 wull ik glieks rop op dat Schipp.
Man nee, dor weer en Fru vun Greenpeace in ehr grööne Jack un segg, wi mööt töven, bit de annern Lüüd wedder rünnerkamt. Dor dörvt jümmer blots 12 Lüüd tosamen rop.

Töven is nu nich so mien Ding, aver ik weer froh, dat ik för den nächsten Törn mit dorbi weer. Un in'ne Twischentied heff ik de Lüüd vertellt, dat ik al Fridag de Petition online ünnerschreven heff gegen dat Ölbohren in dat Wattenmeer in'ne Nordsee. Blangenbi beten Reklaam för de gode Saak maken, dat is mien Ding!

Un denn gung dat los. Toerst sünd wi rechte Siet en Trepp hochklattert, un de junge Fru vun Greenpeace hett uns de Netten wiest.

De meisten vun de Netten sünd nich mehr ut Hanf, sünnern ut Plastik un ward „Geisternetten“ nöömt. Dat hett sienen Grund: Hanf verrott nämlich noch, düsse Netten aver nich. Allens över düsse Netten is op de Website von Greenpeace to lesen.


All düsse Netten hebbt se as Müll ut de See fischt!

Op dat Schipp sünd uk Infotafeln to sehn, un as wi dor stunnen, bruust jüst de Schaufelraddampfer „Louisiana Star“ af. Düsse Damper hett för mi wat Disneyland-Haftigs, he passt nich so recht in de Ümgeven. Aver he maakt de typische "Hamborger Havenrundfohrt".

An Bord vun de "Arctic Sunrise" sünd natüürlich uk en poor Slauchbööt, de ward mit en Kran to Water laten.

Wi gungen nu wieder över en small Brück, mehr so en Stegel, na'n annern Deel vun dat Schipp.

Op'n Weg na de annere Siet sehg ik den hoogen Utsichtsturm, wo een vun de Besatzung hochklattern mutt, üm to'n Bispeel in de Arktis to kieken, wo in dat veele Ies en Weg is, dörchtokamen.

Op düsset Foto sünd uk poor vun de velen Gerätschaften to sehn. De "Arctic Sunrise" is ja nich bloots en Iesbreker, üm dat Ies to breken, se is ok to'n Erkunden vun de arktische Ümwelt dor.

In dat Föhrerhuus hett uns Kim, en jungen Mann ut Südkorea, de ganzen Apperaaten wiest un verklaart. De Böker un annere Saken in den Ruum sünd all fastmakt, denn wenn dat Schipp op See is, fallt sünst allens dörchenanner.


In't Föhrerhuus kann bloots noch de Mannschap seekrank warden, de Rest is fastmaakt

Ut de Finster kunnen wi uk de veelen Lüüd buten an de Landungsbrücken sehn. Dor töven uk al wedder welk op den nächsten Besichtigens-Törn.

Nu gung dat wedder 'n Trepp daal. Överhaupt sünd op dat ganze Schipp Stiggens, un wi müßt bannig oppassen, wo wi hinpadden.

De „Arctic Sunrise“ ward siet 1995 vun de NonProfit-Organisation Greenpeace nütt; de Heimaathaven is, as op'n Rettungsring to sehn, Amsterdam.

Nu gung de junge Fru mit uns in den Frachtruum, wo op en groten Bildschirm en Film över de Aktivitäten vun Greenpeace to sehn weer. De ruge Holtdeck vun de Frachtruum un de technische Utrüsten för den Film geven en spannenden Kontrast af.

In den ganzen Frachtruum is 'n Barg to kieken, un ik heff mi wunnert, wokeen sik dat utdacht hett, dat Schipp so to buen.

Op dat Schild „Vital Statistics“ sünd Daten vun de „Arctic Sunrise“ — 949 Tunnen Wicht, 46,6 m Längde, 28 Kojen, un de Hööfdmotor hett en Knööv vun 1519 kW. Buut woor dat Schipp 1975 in de norwegsche Vaagen-Werft.

Buten weer en Döör: „To be closed at sea“. De Döör harr uk gode Dichtung un en Barg Griffe. Dor warrt di klor, dat dat op See jümmer heel eernst is!

Op düsset Foto is noch eenmal de Utsichtsturm to sehn.

As ik wedder vun dat Schipp gung, heff ik dat Glieke seggt as düsset Schild in den Frachtruum!

Greenpeace hett uk 'n multimediale Duurutstellung in de Hafencity, Hongkongstraße 10. Natüürlich köönt Se bi'n Kulturlotsen wat doröver lesen. Ankieken lohnt bestimmt! Jüst as düsse Besöök op den Iesbreker.


Mehr vun Katja H. Renfert: renfert.net


16.5.2016


na baven