Moderne Welt

vun Hannes Frahm

Wat weren dat noch för schöne kommodige Tieden in Noorddüütschland, as dat noch mit Peer un Wagen dörch de Lannen gung! Dat geev en Nettwark an vele Kröge mit en Utspann, woneem de Peer sik verhalen kunnen un de Lüüd sik vun de lange Reis mit wat to Eten un wat to Drinken to sik nehmen kunnen. Ok weer dor twüschendörch noch Tiet för dat lütte un dat grote Geschäft.

Dat woor aflööst dörch de Överlandomnibusse un an enige Steden geev dat ok al de Iesenbahn. Haver-PS is dörch dat Spriet- un Köhlen/Water-PS övernahmen worrn. Ok de eersten Autos mit Benzin un Diesel weren op de Straten al to sehn.

Bi de Iesenbahn geev dat en ganzen Barg an verscheden Sellschoppen, de den Bedriev maakt hebbt. Lännerbahnen woorn de nöömt. Jeedeen Land harr sien egen Nett, deelwies sien egen Spoorwieden vun 900 Millimeter, 1 Meter un, so as de Afstand vun de Rööd op en Ass bi de Postkutsch, 1435 Millimeter. Dat letzte Maat is uns Regelspoor vundaag in ganz Europa. Vele Bahnstreken, egal wat för en Spoorwiede, sünd in fröhere Tieden för den Opbu un för dat Oprechtholen vun de Weertschop un Industrie buut worrn. Grote Lasten, de de Peer nich trecken kunnen, sünd op düsse Wies vun en Steed to en anner Steed tranporteert worrn. Un de Transport för de Lüüd woor tosätzlich mit opnahmen un weer en bannig gode Saak un en groten Erfolg vun de Politikers un de Weertschopslüüd.

Op düsse Regelspoor hebbt sik de Länner in de twintiger Johren bi dat Grünnen vun de Gesellschop vun de Reichsbahn (GRb) enigt un dat so fastleggt, sünst weer al to de Tiet de ÖPNV so lütt bi lütt utstorven. Aver ok dat Tosamenwassen vun de Industrie weer wichtig. Grote Lasten hebbt ünnerwegens nich mehr vun een Waggon op en annern Waggon ümpackt warrn müsst, denn de Spoorwiet weer je dorna op de wichtigsten Strecken liek. Ok de Fahrplaan vun de Töög weer nipp un nau afstimmt. Dat woor noch mit Plaantüüch per Hand, also "to Foot" maakt. Dat hett ok bannig goot klappt.

Wenn ik nu op uns Iesenbahn kieken do, denn fraag ik mi: "Wat för en Flickenwark is dor nu vun bleven? Wat hebbt uns Politikers un uns Weertschopsbosse dorut maakt?"

De Swoorlastverkehr? Woneem is de bleven? In Sleswig-Holsteen to'n Bispeel is dat blot noch de industrielle Dörchgangsverkehr op de Iesenbahn na Skandinavien un hier besünners na Sweden. De annere Swoorlastverkehr un Göderverkehr löppt bi de Bahn vundaag blot noch blangenbi. Dat Geschäft hett de Bahn op de Schienen opgeven, denn de Bahn maakt dat je ok mit ehr egen groten LKW-Fohrpark (Nagel, Schenker un Co.) un will dorch gor nich trüch op de Schienen!

Blifft also blot noch de Personenverkehr. Un wat hebbt de Bahn un de Politikers hier för Untöög maakt?

Personenverkehr via Bahn vundaag: De Flüchtlinge föhlt sik seker, Töög fohrt ja keen

Mit dat Wedderverenen in Düütschland is so bilütten ok de "Lännerbahn" wedder inföhrt worrn. De Regionalbahnen in de Länner maakt de Länner wedder sülven. De DB maakt blot noch den Personenverkehr, de över mehr as twee Länner rutgeiht. En Afstimmen vun Fohrplaans, tominnst hett een dat Geföhl, gifft dat nich mehr.

Un denn dat Tweikloppen in vele enkelte Gewarkschoppen föhrt ok to en "Weg vun de Bahn, rin in dat Auto!" Politikers un Arbeitsgerichten nöömt dat na dat ne'e Oordeel, dat an'n 3. September 2021 bekannt geven worrn is, seker "Klimaneutal!"
Versteiht dor een vundaag noch uns Gerichten mit dat Utspreken vun "Recht"? Is uns modern Recht vun vundaag un uns modern Politik blot noch dat Recht, de Sekerheit un dat Föddern vun "Lobbyarbeit"?

Hebbt wi as Lüüd in Düütschland keen Werte, keen Rechte, keen "Stimm" mehr, en Stimm blot noch för de Verspreken vun vör de Wahl, de de Politikers na de Wahl alltohoop vergeten hebbt?! "Dat Politiker-Alzheimer-Gesett na de Wahl". Weer jümmer so un blifft jümmer so, ok mit Wahl-O-Mat.

Ik wünsch jümm en gode Fohrt un dat jüm "standfast" blievt op den Bahnstieg!

Äh, ja — dat kann ok "Stahnblieven" heten!