Echte Kierl (Utsnitt)

Dei jungen Linken un Sexismus

vun Behrend Böckmann

In Erfurt seeten's tauhop un wullen beråden, wat tau måken is, dat 'n bi dei neechsten Wåhlen wedder mihr as fief Purzent vonne Stimmen fangen deit, ok wenn't wägen por bekannte "Linke" noch eins klappt hett, por Stäuhl in'n Bundsdach tau beleggen. Doch dei niege Vörstand un dat Programm sünd ümråhmt von Diskusschonen œwer't Verhollen von Genossen, dei in'n Ümgang mit dei Genossinnen tau wiet gåhn, kein Grenzen kennen, sik grot daun, ehrn Posten nutzen un rutstrieken, dat's 'n richtigen Kierl sünd.

Flirt-Tipps von'n Profi!

Un man weit nu, dat dat an "Awareness-Strukturen" fählt, wat wull heiten sall, dat dei Maaten anner Såken in'n Kopp hemm' as dat würkliche Läben. — Un so frågen sik dei Maaten von "Solid", den sozialistischen, antifaschistischen, basisdemokratischen un feministischen Linksjugendkring, wat dei Linkspartei will, wenn's nich œwer "sexualisierte Gewalt" schnackt, disse Oort von Ümgang nich seihn will un so up den Ünnergang vonne Partei taustüert. Von all Maaten möt man verlangen, dat's ut dei Vörfäll von "sexualisierter Gewalt" bi dei Linken Lihren trecken sallen, dormit dei feministisch un emanzipatorisch Idee wedder mihr dat Parteiläben bestimmt. So weiht dei Wind tauierst ut'e Emma-Eck un dornå kümmt denn all dei anner Kråm up't Tapäh. Un man wunnert, dat dei Wählerschaft schrumpelt.

Wat is passiert? Ne, nich dei Frugens hemm' klåcht, sonnern dei feministischen Kierls, dei ünner Gliekstellung dat Gennern verståhn, dei MeToo-Bewägung för richtig hollen, dei all Minschen för Rägenbågenminschen hollen un wägen dei Klimakris sülben kein Nåkåmen inne Welt setten orrer nich weiten willen, dat 'n Kierl ok up'e Welt is, üm dorför tau sorgen. Dat harr all Adam in't Paradies mitkrägen un hei begüng mit Eva den Sünnfall un sei måken ut Vergnäugen Kain un Abel.

Naja, dei Sünnenfall wier, genau nahmen, kein Sex, sünnern Ungehorsam gägen Gott

Un doran hett sik bet hüt nich väl ännert, dei Kierl geiht solang up Brutschu, bet hei sien Brut funnen hett.

Un männichein ok noch dorna! As düsse echte, äh, Kierl.

Un ümmer güll un gellt dei schnurrig Lüdschnack: "Tau jeden Pott gifft dat 'n Stülp" orrer "inne Midd, dor passt dat ümmer". Un vör Tieden, as noch up Daukfäuhlung danzt wür un as dat noch nich dei Ünnerbüchsen mit 'n utpolsterten Knacknoors geef, würn männig Wür twüschen Kierls un Frugens wesselt, dei dei feministischen Minschen von hüt as "sexualisierte Gewalt" verståhn, œwer in Würklichkeit blot dat is, wat wi inne Vågelwelt Balz näumen. In uns hütig digitale Welt warden Bekanntschaften mit 'n Knopbuurd bi Paarsharing, Datingbörsen usw. måkt. Wecker noch analog mit Wür, Ogenupschlach un'n grienigen Blick den annern Minschen tweidüdig secht: "Du Luder büst ja ok dor!" orrer "Du büst œwer 'n Luder!", denn kümmt dat ja ok ümmer noch up den Tonfall un dei Ümstänn an un möt nich gliek bedüden, dat dei balzend Kierl dat anspråken Wief för'n Hex, 'n Miststück orrer Kanallje höllt, sonnern up disse Oort mit ehr Daukfäuhlung upnähmen will, denn "Luder" is 'n Lähnwuurt ut'e plattüütsche Språk un ward up Platt ierst as "Assluder" taun Schimpwuurt. Dor ward äbenso palawert, wenn einer 'n Lütten drunken hett un dorvon schnacken deit, dat hei noch einen utgifft, wenn einer frie nå "Polonöse Blankenese "Wir ziehen los mit ganz großen Schritten / Und Erwin fasst der Heidi von hinten an die .../ Das hebt die Stimmung, ja, da kommt Freude auf" un Heidi dorhen grapscht, wo hei nich hengrapschen süll.

So sabbeln dei Linken nich väl anners as dei Gräunen un hüppen gliekermaßen von ein Bein up't anner. Sünd sei 'n linkspopulistische Partei un stellen dat Gägendeil von dei rechte AfD dor, orrer sünd's dei Partei, dei för dei Emanzipatschon un dei "Klass" in'n marx'schen Sinn steiht un sik sik an Marx sien Devis "Dei Denker hemm' dei Welt ümmer blot up ehr Oort düd't; œwer nödig is't, sei tau verännern" höllt? Sei finnen nich gaut, wat Putin måkt, un sei finnen nich gaut, dat Düütschland dei Ukrain mit so väl Waffen tau Sied springen deit. Denn willen s' Sarah Wagenknecht as würklich Linke ut'e Partei exmittieren — un up eins möten s' bangen, dat s' noch up 5 Prozent kåmen, wenn dei neechsten Wåhlen in't Hus ståhn, denn mit Direktmandaten ward dat man ok lech utseihn.

"Kiek eins, ik heff ok en Blöömken mitbröcht!
Bün sooo kultiviert! Nu Sex!"

Wenn junge Linke von't Gennern un den Feminismus drömen un dat Balzverhollen von jöckig Kierls nich as erotische Signale verståhn, denn hemm s' würklich dei Poletik un ehr Wählers ut'e Ogen verlurn.

Un dat echte Frugens genauso denken, wiest düt lehrrieke Video: