BummBumm, Bobbele — Bum!

vun Behrend Böckmann

In't Öller von gaut sœbenteihn Johren
wier hei ünner dei Junjoren
all dei gröttste Tennisspäler
un dat Goldstück vun ganz väler,
dei em höllen för 'nen Held
inne vörnähm Tenniswelt.
Un so künn't nich anners kåmen,
dat Bobbele harr bald 'n Nåmen,
dörch weckern keem denn in'n Verlop
'n groter Hümpel Geld tauhop —
un wi künn dat anners sien,
dat fünn männig Diern ok fien,
doch dat Bobbele wier nich
so as Tenniskumpel Stich,
keem ok nich David Beckham gliek
ut dat Fautball-Späler-Riek.

Männig Frugensdrom ward wohr
von blåge Ogen, vossig Hor —
Hor, dei man von Milva kennt,
as Ponny in den Bobbeletrend,
un ünner den, so deit dat düchten,
Ogen von Franco Nero lüchten.

Dat Bobbele is bald dei Held
vör väle Frugens up uns Welt,
un mit em läben teihn denn gaut
so nå un nå up groten Faut,
mål kort, mål lang, denn wier dat ut,
dei Frugens trecken in un ut,
mit drei hett hei vier Kinner krägen,
doch Anna, dei keem ungelägen.
Twei Jungs harr hei mit Barbara —
dei wannert ut nå Florida,
un't Bobbele harr grotet Pech:
mit föfteihn Milljonen wier's nu wech.
Låters måkt hei denn geschwind
Anna, dat Bessenkåmerkind,
wat sik däd för dei Mudder lohnen,
kreech's dorför doch söss Milljonen,
un Anna, dei nå Boris kümmt,
jeden Månd sössdusend nimmt.
As Anna up'e Welt denn keem
hei Afschied von dat Tennis nähm.

As Einspänner wull hei nich läben
un hett sik Lilly denn hengäben,
dreihn bi "Let's Dance" dulle Reigen,
warden ehrn Amadeus weigen,
kriegen sik denn inne Plünnen
un dat "Ut!" ludhals verkünnen,
wedder wür hei gaut utnåhmen
bet dat mit eins is anners kåmen,
dor Boris as 'n rieker Mann
mit sien Geld nich ümgåhn kann,
un't Bobbele ward sotauseggen
näbenbi sien Geld anleggen
üm dörch ganz riskante Såken
wiederhen ok Geld tau måken:
Hei deit mål Späler denn trainieren,
mål 'nen Späl ok kommentieren,
spält in't Kiekschapp mål denn Held,
måkt mit Reklame ok noch Geld,
mål för Autos, mål för Bier,
för Hotels, Verhüterlie,
bet denn keem dei Zockerie.
Noch ihrer dat mit Lilly ut,
kreech all dat Finanzamt rut,
dat hei dei Stüer wull ümgåhn,
wat em düer keem tau ståhn,
denn tau Popier harr hei doch gäben,
hei wür in Monaco läben.
So wull hei dei Stüern sporn,
doch't Finanzamt hett't erfohrn,
un so wier sik dei Fiskus wiss,
dat sien Wåhnsitz München is.

Bi solk belemmert Lögerien,
dor muttst schon ballaballa sien!

So lannt nu Boris vör't Gericht
un düster wür denn sien Gesicht,
as dei Richter deit verkünnen,
dat hei för sien Stüersünnen
möt twei Johr up Bewährung läben
un'n half Milljon as Stråfgeld gäben.
So is hei in't düütsche Land
as Tennisstar ganz gaut bekannt
un Kinolüd harrn sik vörnåhmen,
sien Läben süll in't Kino kåmen.

Doch denn keem dei grote Wenn',
dat fiene Läben harr 'n Enn',
denn em wier dat Geld utgåhn,
mösst wedder vör den Richter ståhn,
un Boris deit, dat hei nich weit,
wat "insolvent" wull heiten deit.
Un Amadeus süht mit an,
wat Geld ut Minschen måken kann,
dat' n Minsch ganz deip kann fallen
un lannt endlich achter Trallen;
wurtau eins anner em hemm' råden,
möt Boris nu allein utbåden.

In'n iersten Knast güng em dat schlecht,
doch hei wür denn bald verlecht,
denn dei Justiz wier sik ganz wiss,
dat hei kein Schwerverbräker is;
un liekers möt dei Star vergäten,
mit Boris Johnson fien tau äten.
Ach Bobbele, weck grote Last
in den königlichen Knast!
Tweieinhalf Johr würn di gäben,
mösst nu as Uli Hoeneß läben;
låt di man von em vertellen,
woans man sik wull möt anstellen,
woans deinern un ok bidden,
üm bäten körter intausitten!

Un as man hürt, is hei so klauk
un schrifft in Torm all an sien Bauk
œwer't Geld in sien Läben
un wat för Frugens dat hett gäben;
ok dei Bunten will'n berichten
gägen Geld ganz väl Geschichten,
denn dat kümmt so selten vör,
dat einer achtern tauig Dör,
dei in Wimbledon oft wunnen,
sik hett taun Tüffelkur infunnen.
Sössstellig männig Angebot —
dat help denn Boris in sien Not,
un hei ward denn sostauseggen
sien Geld up niege Oort anleggen!