Bedregen för nix!

vun Heinz Tiekötter


Een Modder kann ehr Kinners nich mehr leefhebben as Fiete Puls sienen olen Mercedes. "In de modernen Wogen kummt dat Gewicht doch blots vun dat vele Tobehöör un nich vun de Stabilität. Mien Wogen hett noch starket Blick un Qualität. So'n Auto hett Duuer un Bestand. Dat hollt mit mi ut; ik heff em jo all twintig Johr. Dat is noch 'n annern Snack!"

Siene Stammdisch-Breuder fangt jümmers an to smustern, wenn Fiete op sien Lieblingsthema kümmt; dat heet, annere hett he ok nich. Doch annerlest weer he 'n beten ruhiger. Fiete siene Koor hett nämlich 'n Problem: Op de Frontschiev bild sik Duuernebel. De Sicht no vürn ward slechter. He kunn nich mehr richtig dörch dat Glas kieken. Langsom entwickel sik dat to Melkglas. Wischen un Polieren kunn dat nich opholl'n.

Fiete fallt dat swoor, vun düssen Qualitätsinbruch to vertellen. Wo he doch jümmers vull Loff öber sien Wogen west is. Doch denn vertell he dat an Stammdisch liekers. Un dat de nee Schiev 800 € kosten sall. De sall he alleen betolen. Dat weer mehr as de Restweert vun siene Kalesche, meen de Versekerung. De harrn jo keen Ohnung. De Wogen weer doch veel mehr weert as de modernen, de hüüt ut de Fabriken koomt.

Fietes Macker Paul is'n ganzen Plietschen. De steekt vull Fietschepupereen un kennt alle Tricks. He harr ok allmol mit de Polizei to doon. Un eenmol müss he sogor in Kallabusch brummen. "Smiet doch 'n Steen in diene Schiev. Achteran vertellst du diene Versekerung, op de Landstroot hett 'n Lastwogen den hoochsmeten un diene Frontschiev dropen."

Man för sowat weer Fiete nich to hebben. Dat weer jo Swinnel un Versekerungsbedrog. Sowat mook he nich. "Denn lot dat doch, wenn bi di de 800 € so locker sitten doot", anter Paul. Bi Fiete seet nu en Floh in Ohr, de pisack em jümmers mehr. He kunn gornich mehr richtig slopen. Un as se wedder tosomen in'n Kroog seten, hett he teuvt, dat Paul mol ut de Büx mutt. Fiete leep, as rein tofällig, achteran un nehm Paul an de Siet un keek sik üm. As he seker sien kunn, dat se alleen weern, keem he 'n beten benaut mit sien Anliggen rut: "Du Paul", säe he, "ik schaff dat nich, mi süllmst 'n Steen in de Autoschiev to smieten. Wenn ik di nu 'n Twintiger geev, kunnst du dat nich moken?" "Na klor, keen Probleem", säe Paul. As se trüch an'n Disch weern, schuuf Fiete ganz sachens een Twintiger ünner'n Beerdeckel no Paul röber. De kneep een Oog dicht un nickköppte em to.

As Fiete an neegsten Morgen to sien Wogen keem, harr he genau vör dat Lenkrad 'n Lock in de Schiev. Nich so dörchgängig, dat dat rinregen däe; nee man grood so, dat keen dörchkieken kunn. Fiete kreeg in de Warksteed 'n nee Schiev un de Versekerung de Reken. Dreehunnert vun de achthunnert Euro muss he sülmst betolen, so stunn dat in sien Tarif. Egool, he harr nu een nee Schiev un sien scheunen Wogen weer wedder in de Reeg. Sünnobend hett Fiete dat Auto poliert un op Schick bröcht. Nu geev't nix mehr doran uttosetten. Ene Woch lang hett Fiete sik richtig freit. Weer jo ok allerbest lopen. An'n Wekenenn wull he denn mit Hilde un de nee Schiev an de Ostsee fohrn. Nu kunnen se wedder de scheune Landschop bewunnern.

Op de Autobohn 21 bi Tensfeld, dat is door, wo de velen Kieskuhlen sünd, keem so fiefhunnert Meter vör Fiete 'n Kieslaster öber de Opfohrt un sett sik vör Fiete op de Spur. Fiete geev Gas un wull em öberholen. Jüst as he eben achter düssen Laster weer, knall dat düchtig un de nee Frontschiev harr luder Risse.

An Maandagmorgen stunn Fiete mit sien Wogen in de Warksteed un müss wedder dreehunnert Euro sülmst betolen. Dat heet, den Twintiger för Paul kunn he dütmol sporn.
"Unrecht Gut gedeihet nicht!", seggt de Volksmund.


10.5.2020


na baven