Sünndagsche Bläderstapels:
Schandaal un Moral

Vun Jens-Peter Bey

De Journalisten-Krokodile sitt all tohoop un künnt sik nich wedder inkriegen. De Tranen loopt eer dal. Dor hölpt keen Daschendook mehr. Villicht schulln se versöken, mit Dischdökers de Tranen to drögen. Wat sorgt se sik nu all üm de Ex-Bischöfin. Oh wie fein kümmt dat topass, dat se nu wedder 'ne eenfache Pastersche sien will. Düsse Promille-Geschichten künnt fein utwalzt warrn. Denn steiht dor ok nich so veel vun Kinnerschänners in de katholsche Kark in't Blatt. Oder vun de Deid-uns-bannig-leed-Orgien, wenn in Afghanistan Fruunslüüd un Kinner Bomben op'n Kopp kriegt.

Nee, Fru (Ex-)Bischöfin, harrn se nich to Afghanistan dat Muul holn kunnt? Denn weer nu ok nich so veel Opregung. Een lütten in'n Tee hebbt wi doch all mol hat. Un de Kor is achterna ok nich immer staan bleeben.

Kennst du dat Blatt, wo immer een kloken Kopp dor achter sitt? Nee, nich de Bunte, de sik för Bessenkamern un Slooptstuven interesseert un Promi-Treppenhüser in Stasi-Manier utspioniern löt. Nich to glöben: Uns ole Tante FAZ (an Sünndag) smuddelt mit. Eeren Bild-Redakteur dörf eenen Hilligenschien öber de Fru Bischopp monteern. Jungedie, wat för'n plietschen Ei-Kätscher op de eerste Siet. Un dormit wi uns all richtig inföhlen künnt, schrievt se mit Lokolkolorit: "Hannover. Das Steintor kann einem wie ein gottferner Ort erscheinen — aber auch wie ein schlichtes Kneipenviertel mit der einen oder anderen Rotlichtecke. Hier hat am letzten Wochenende der Fall einer Bischöfin begonnen…" Dat sünndagsche BAMS- Billerblatt mit de groten Bookstaben kann dat jüst so fein: "Sie kommt, das ist Vermutung, von einer privaten Feier, in der Nähe des Raschplatzes, dem Vergnügungsviertel der Landeshauptstadt, ein Mann soll neben ihr im Auto sitzen. Von der Bischofskanzlei in der Haarstraße, wo sich die Privatwohnung von Margot Käßmann befindet, ist das Paar eine Linkskurve und etwa 700 Meter entfernt." Dat is riep för'n Grimme-Pries: So fein holt se dat Weeten un dat Vermooden utenanner. Truschullig sünd Vergnögen, Mann, Promi-Fru, Wahnung un Supen gedanklich op'n Dutt bröcht worn. Du sülm musst di dat nu trechriemeln. De Journallje kann nix dorför. Un wenn dat eene Smeerblatt dat annere zitieren deit, "Lalleluja", künnt se eere Hannen in Unschuld waschen. — Bi de BAMS hebbt se sik ok een "Moralometer" utdacht. Dor kannst di eene Sünnen-Hitlist ankieken. Warst di wunnern, wat dorbi rutkümmt: För de befraagten Dütschen is dat Allerleegste in dat Sünnenregister, besapen Auto to föhrn. Wenn denn dorto de Gesinnungs-Ethiker Hans-Hermann Tiedje, langjährigen Baas vun Bild, sik moralisch opblasen deit, kann ik gonnich so veel freeten, as ik kotzen mutt.

Vergeeven un nich vergeeten. Hebbt de Dütschen ok mal mit eern allerersten Bunnspräsidenten makt. Dat weer "Papa" Heuss vun de FDP. Eenen hochanständigen Minschen. Liekers hett he vörn Krieg Adolf Nazis bruune Bande mit op'n Weg bröcht. As een Affordneten vun de Liberalen hett he de Hand för dat "Ermächtigungsgesetz" hochreckt. Dörch sien düchtiges Doon in de junge Bunnsrepublik is sien Wannel dütlich woorn. — Ik weet nich, worüm mi dat jüst infallt. Kannst du mi hölpen? Duun un bruun hebbt doch nix miteenanner to doon…