Wenn't Böllerverbot kümmt...

vun Behrend Böckmann

'N Füerwark is 'n oll Såk, un dat dat mit Larm verbunnen is, dat is äbenso olt. All vör tweidusend Johren hemm' dei Chinesen mit 'n Oort Knaller ehr Gägner verfihrt, väl ihrer as dat 'n inne Nacht von Oltjohrsåbend tau Niejohr mit väl Larm un Böllerie dei bösen Späukels verdrieben wull. Un ut't italjänsche Vicenza is bekannt, dat dat dor all 1379 'n Lustfüerwark geef, dat denn låters oft dat festlich Enn' von'n grot Fieer wier.

Prinz Georg August (1683-1760) ut dat Hus Hannover wier af 1727 bet tau sienen Dod dei inglisch König Georg II. un hei harr sik mit Maria Theresia (11717-1780) ut dat Hus Habsborg in'n Œsterrieker Arffolgkrieg (1740-1748) tausåmendån. Dei fünn denn an'n 18. Oktober 1748 mit den Fräden von Aachen sien Enn', un ut dissen Grund süll dat nå den Willen von Georg II. an'n 15. Mai 1749 'n grotet Füerwark up'e Thems gäben — un Georg Friedrich Händel (1685-1759) kreech dortau den Updrach, dei “Füerwarksmusik” tau komponieren.

In't 19. Johrhunnert keemen dei Raketen in all ehr Pracht up un ok dei Gesetzen, dei den Ümgang dormit rägeln: Wurväl Futt dörp son'n Raket hemm', wecker dörp dormit ümgåhn un wennihr is't mœglich, dormit tau hantieren. Inne 60er Johren güng denn dei Post so ornlich af. Wunnerlichten un Knallbonbon wiern nich nauch för den Radau an'n Oltjohrsåbend un dei Geldrüker bröchten Chinaböller un Raketen in'n Hannel, dormit jederein einmål in't Johr 'n “Pyrotechniker“ sien künn. Disse lütten Pyrotechniker hemm' in't Johr 2000 all gaut 100 Milljonen Euros för Böller un Raketen utgäben un sünd bet hüt all up 130 Milljonen kåmen. So hett nå Robert Habeck dei “Wirtschaftskrieg gägen dei Natur” ok den Ottjohrsåbend tau fåten krägen un dei Staat hett dortau dei Gesetzen måkt.

Raketen, dei taun Johreswessel ut 'n Buddel as “Startramp” in'n Häben fleigen un denn mit allerlei Farwenspäl vergläuhn un as hitten Restmüll wedder rünnerkåmen, sünd “pyrotechnische Fluggeräte”, dei sik nå dei Zünnung dörch dat “Rückstoßprinzip” up 'n Flaugbåhn begäben. Bünneln wi dei Schubkraft vonne Silvesterraketen, dei allein in Düütschland inne Luft gåhn, denn geef dat mihr Futt, as 'n Saturn-V-Rakeet upbringen kann. Œwer dat is blot 'n Gedankenspäl, denn uns Silvesterraketen, sülfst wenn man 50 Milljonen in'n Bünnel zünnen wür, geiht all nå twei Sekunnen in knapp 40m Hööcht dat Schwattpulver ut.

Un so as dat 'n Bipackzeddel tau dei Pillen ut'e Apteik gifft, finnen wi lüttdruckt mang dei aflichten Böller un Raketen por Henwies up Atennot un Verbrennungen, up Ogenkniepen dörch den Rok un süss noch wat. Nich tau finnen sünd Henwies up den Müll un dat jedet Johr allein in Düütschland 8000 Minschen mit Blessuren inne Notupnåhm lannen. Hentau kåmen noch 5000 t fiensten Stoff, dei in in ein Nacht friesett't warden un 15 Purzent von den Deil utmåken, dei in ein Johr dörch Fohrtüüch anne Ümwelt afgäben ward. So kümmt nå un nå dei Insicht, dat dei Raketen- un Böllermüll un dei Fienstoff uns Ümwelt tau dull belasten, un man versöcht nu gägentaustüern.

In Schweden sünd Böller un schwore Raketen verbåden, un för dei leichten Såken sall man so as dei Angler un Jäger ok 'n Fürwarkerschien måken. Anner frågen, ob dat nich mœglich wier, Bio-Böller, Öko-Raketen orrer Knaller light up'n Markt tau bringen. Un nich tauletzt gifft dat dei välen Strieder un männigmål blot Striethåmels för 'n bädere Ümwelt, dei sik hütigendåchs “Aktivisten” näumen, dei jede private Knallerie, ok üm Katten, Hunn' un Vœgels nich tau verfihren, ganz un gor ünnerseggen willen un von 'n “Lasershow” as Ersatz schnacken. Von son'n farwenprächtig “Lasershow” geiht kein Gefohr ut un is nich mit Larm un Knallerie verbunnen.