vun Behrend Böckmann

Wolodymyr Selensky näumt sien Partei „Deiner för't Volk“. Dat klingt demödig nauch. As so'n Deiner, man villicht nich so bescheiden, flücht Selensky von Land tau Land, nich tauletzt tau'n Johrsdach vonne Franzöös'sche Revolutschon an'n 14. Juli in Paris, un weck Wunner, nich blot in'n ukrain'schen Militärluck, sonnern as Ihrengast in 'n düstern Rock. As 500 Soldaten ut dei willigen Länner un 25 ukrain'sche Soldaten inne Präsidentengard vörbimarschiern, lött hei sik aflichten mank dei Willigen, denn dei spälen em dat Geld in sien Kriegskass un hemm siet korte Tied ein bannig groten Vermaak an dei ukrain'sche Drohnentechnik. Sei snüffeln na den Duft von niee, oewerraschen Drohnen mit unbekannte Fähigkeiten, einen Duft von Schangs un Winst, dei upstunns ut dei Ukrain' röverweiht. Oewerhaupt is Wolodymyr as Maskottchen von't liberale Abendland al Stammpersonal in düsse Runden. Un all sien Frünn inne europä'schen Länner un dei EU-Königin Uschi un dei Prinzessin Kaja Kallas, taustännig för Säkerheit un Butenangelägenheiten, eien Wolodymyr mit ehr Sympathie un ehr Milljarden. Will seggen: uns' Milljarden, as Stüertahlers.

Vör dei Folgen von düsse Milljarden — den endlosen Krieg — neihen dei Ukrainer miehr un miehr ut, denn 5,9 Milljonen sind Frömde in anner Länner, twei Drüddel dorvon in EU-Länner. In Düütschland sünd 1,26 Milljonen mellt, dorünner  550.000 Mannslünd un dorünner 33.000 in'n Wehrplichtöller. Hett 'n Ukrainer tauhus in'n Schnitt knapp 500 € in'n Månd taun Läben, so kriecht hei bi uns, solang hei kein Arbeid finnt, dei Grundsäkerung von 563 € un dat Wåhngeld noch båbenup. — Woans kœnen so väl Mannslüd dat Land verlåten, wenn blot dei utneihn dörpen, dei noch nich 22 Johr orrer œwer 60 Johr olt sünd? Dat lött sik inne Rekrutierungsbüros gägen gaudet Geld rägeln.

Un wat hier anfangt, geiht bi't Militär un dei Rüstungsindustrie wieder un is ein von dei groten Probleme von dei Ukrain'. Mit Schmeergeld is väl tau måken un dörch Schmeergeldünnernähmen warden Hülpsgeller tau private Prunkhüs orrer lannen up Konten, wo's nich lannen süllen. So hemm' dat dei einstigen Frünn Tymur Minditsch un Andrij Jermak as Langfinger tau Riekdaum bröcht; Herman Haluschtschenko, tauierst Energieminister un denn Justizmister, wirtschaftet ok so väl inne eigen Tasch, dat sogor Wolodymyr Selensky sülvst dei Kragen platzt un hei all schassen deit. Un œwerhaupt, so as bi'n Fautball dei Trainer utwesselt warden, wenn't nich so löppt, as't lopen süll, wesselt Wolodymyr Minister un Beamte un billt 'n Regierung nå sienen Schmack un näumt dat „ännern vonne politisch Strategie“.

Ja?

So ward dei ierst in'n Hartung (Februar) inwesselt Kriegsminister Mychail Fedorow nå gaut 'n half Johr all wedder utwesselt, bloots dat dei Minschen dorwägen fuchtig sünd, denn Fedorow hett grote Verdeinsten üm dei moderne Drohnen-Kriegsföhren un is dorwägen beleiwt. In Kiew sünd dei jungen Lüd up'e Strat, Selenskyj is wull tau wiet gåhn, wat dei Afdankung von den jungen Kriegsminister angeiht. Äbenso schasst wuur dei Ministerpräsidentin Julia Swyrydenko, dei af 'n Heumånd (Juli) 2025 up dissen Posten seet. Sei möt gåhn ut kreech in Utsicht stellt, dor ukrain'sche Botschafterin tau warden, wo nu dei einst in Düütschland  ukrain'sche Botschafter Melnyk UN-Botschafter is, Melnyk mit dat lose Mundwark, för den Kanzler Scholz 'n „vergnatzte Läwerwust“ wier, wenn hei mit em nich œwerein keem.

Nich bloots Korrupschon, ok Gewalt...

Dei wacklige politische Kurs un dei unbannige Korrupschon sünd grote Problemen, dei dei Ukrain' den Weg in dei EU tauschluten warrn. Un dat sünd nich dei einzigen Problemen.

Dei 155. Brigad vonne ukrain'sche Armee süll dei ganze Stolt warden un wür nu dei Schandål: Dei Brigadier hett sik afsett't un is ünnerdükert, denn em ward tau Last lecht, dat hei Zivilisten achter Trallen bröcht hett un sogor tau ehrn Muuder wür. Un dat noch: Mitarbeiders von "Ukroboronprom", 'n Rüstungsünnernähmen mit 100 Fabriken, hemm' gägen dei Vörschriften dicht bi Kiew 'n Munitionsdepot ünnerhollen, dat dörch 'n russ'schen Angriff inne Luft güng; ein por Dach güngen dei Flammen nich ut. Man süht ok œwerwech, dat twei Dutzend Rekruten dei Grundutbillung in't Stormregiment „Skelja“ nich œwerståhn hemm', denn sei würn rünnermåkt, malträtiert un dodprügelt. Un dei willigen Frünnen in Europa jökt dat ok nich, wenn Språkschandarmen dörch dei Stråten gåhn un luschern, ob sik dei Minschen up russisch orrer ukrainsch ünnerhollen, un dei, dei russisch schnacken, furtsens 'n Ukrain'sch-Lihrgang anwiesen. Ganz nie sickert dei „Busfizierung“ dörch. Dat sallen Rekrutierer sien, dei mit 'n lütten Bus orrer Liewerwagen ünnerwägens sünd, un wenn's 'n Kierl utmåken, anhollen un sien Militärdokumente in Ogenschien nähmen. Un Gnade em Gott, hei hett dei nich bi sik, denn geiht dat af. Im Lemberg hemm' disse Oort "Deiner" von Wolodymyr all Schacht krägen.  

Dat is blot 'n lütt bäten von dat, wat an Korrupschon un Staatsverbräken inne Ukrain aflöppt un an göttlich Macht tau beläben is. Doch dei plietschen Willigen bruken Wolodymyr, dat hei ehr dei Russen von'n Hals höllt, Russland schwack måkt, denn so as Spreihn inne Schof fleigen, sallen bald Drohnen in'n Schof gägen Putin stüert warden. Un so is dei Ukrain för den modernen hybriden Krieg mit Drohnen dat militär'sche Rebeit, wat för Tieden Peenemünde för dei V-Waffen wier. Dei "Willigen" is dat egål, wenn beid Länner — dei Ukrain un Russland — dorbi utbläuden.

Wohraftig, dei Ukrain is kein Land von Engels un Hillige. Oewer dei europäischen willigen Länner sünd ok nich dei, dei 'n sik as Hartensfrünnen utsäuken wüür. Dei Ukrain hett bloots kein Wåhl.