vun Behrend Böckmann

Paulus wier Saulus un Saulus wier Paulus, dat seggen dei Gelihrten, doch in'n Lüsdchnack heit dat ümmer noch "von'n Saulus taun Paulus warden". Dat sall bedüden, dat dei Saulus/Paulus as Jud up'e Welt keem, iernsthaftig in un nå dissen Globen läwt hett un mit Jesus nicks an'n Haut harr — un sik denn, na sien Damaskus-Beläwnis, nå un nå mit dei Jesus-Bewägung anfrünnen däd un opletzt taun gröttsten un besten Verkünner von't Urchristendaum wür un dor sien letzte Rauh funnen hett, wo hüt dei Petersdom as dei gröttst Kark up uns Ierd in'n Vatikan steiht.

Un so as Paulus hemm' sik väle Minschen inne Tiet von't Wirtschaftswunner tau Parlen in Gold musert un denn doch begräpen, dat dat Wassen Grenzen hett un dat dat nich unendlich so wiedergåhn kann. Un up eins geef dat dei gräunen Middelschicht-Christen, dei ok nauch inne Kniep harrn, sik up't gräune Läben intaurichten. Sünnenrosen as Teiken, Kattunkledåschen un sülben knütt't Liefwarmer wiern ansecht; dat, wat hüt Bio näumt ward, keem up. Sei sülben seggen von sik, dat's knütt't hemm' un dorbi dat Strieden krägen, dat's as "Müslifräter" un "Ökospinner" up'e Schipp nåhmen würn.

Œwer so nå un nå geiht man up'e Stråt un taun Ostermarsch, man sett sik för Fräden åhn Waffen in, geiht gägen dei niege Uprüstung up dei Stråt, helpt flüchtend Minschen, organiseert Demonstratschonen, lött sik tau Wåhlen upstellen, kümmt inne Parlementen. Man föllt up: langhorig un barstbeinig in Jesuslatschen, dat Baby in'n Wickeldauk vör dei Bost, un wenn nödig, ward dat ok stillt, 'n Sünnenros för't Läben un 'n dröger Dannentwiech för den Holtdod an'n Platz wiesen dorup hen, hier sitt 'n Gräune*r, gräune Frugenslüd hemm' ehr Knütt dorbi. Man will wiesen, dat dat 'n bädere Demokratie gifft as gewennt, un versöcht dat, wat sik "Basisdemokratie" näumt: Jeder sall un kann sik tau allens inbringen orrer sienen Semp dortaugäben.

Wenn so'n Chamäleon di dei Tung wiest, büst du as Fleeg vull an'n Moors!

Un denn is 'n sik doch nich einig, dei einen sünd dei "Fundis" un dei annern dei "Realos", sotauseggen dei Kathool'schen un dei Reformierten. Por 68er sünd tau Verstand kåmen, dorünner schämernde Nåmen as Antje Vollmer, Petra Kelly, Otto Schily, Jutta Ditfurth, Joschka Fischer, Christian Ströbele, Jürgen Trittin, Winfried Kretschmann, Cem Özdemir, Katrin Göring-Eckardt. Disse gräunen Adepten sünd Kinner von Bankdirektoren, Lihrers, Weitenschapler, Künstler, Kooplüd ut'n Middelstand, utnåhmen Petra Kelly as Besatzungs- un Cem Özdemir as Gastarbeiderkind.
1979 sitten taun iersten Mål vier Gräune inne Bremer Börgerschap. Joschka Fischer is von 1985-1987 in Hessen dei Turnschauh-Ümweltminister un ward 1998-2005 Butenminister vonne Republik, is dormit ok Vizekanzler von Kanzler Gerhard Schröder un in disse Funkschon in't ierste Halfjohr 1999 sogor Präsident vonne Europäisch Union.

1983 trecken 28 Gräune mit all ehr gräunen Teiken in Bundsdach in un gäben as Oppositschon dei annern anne Macht düchtig Paroli. 1985 sünd's hier un dor in Lännerparlementen tau finnen, 1998-2005 gifft dat näben Fischer noch anner gräune Minister in't Kabinett Schröder, af 2011 is Winfried Kretschmann der ierste gräune Landsvadder in'n Baden-Württemberg un 2021 willen dei Gräunen sogor den Kanzler stellen.

Mennigmaal ritt so'n Chamäleon dat Muul orig op

Dei Gräunen sünd 'n Partei, anne Spitz Robert Habeck as Philosoph, Dichter un gräuner Landspolitiker in SH, un Annalena Baerbock, Politikstudierte un Ex-Trampolinhüpperin; un sei willen ganz nå båben. Robert lött Annalena den Vörtritt, wat dei Kanzlerkannidatur angeiht, œwer mit den Kanzler klappt dat denn doch nich; un nu nehmen sei, binå ganz båben ankåmen, 'n Triumvirat mit rod un gäl in Kop. Sei sünd nich mihr streng kathoolsch, ne, sei hemm' sik reformiert. Bläben is blot dei olle Hass up den gottlosen Bolschewismus un dei witten Männer, dei gägen dei Eh för all sünd un dei den Atomstrom nich furtsens afschalten willen. Nie is dei Insicht, dat Verhanneln nicks bringt un man leiwer schwore Geschütze nå Kiew leiwern süll un Gas un Öl nich von son'n Tyrannen as Putin köpen sall, sonnern von dei amerikan'schen Frünn — dei, dei dat afghan'sche Volk väl Leid bröcht hemm' — un dei Frünn inne Golfstaaten, dei via dei Huthi-Rebellen in'n Jemen en Stellvertrederkrieg föhren laat, dat dor mihr as 20 Milljonen Minschen hungern un fief Milljonen up'e Flucht sünd. Ja, düsse bittere Wahlfrieheit hemm wi in uns Welt: Welk Unrecht wüllt wi mit uns Gas- un Petro-Dollars finanzeern? Dit, düt orr dat Unrecht? Wat Beters steiht nich to Utwahl — utnahmen Sporsamkeit, Windrööd un Solarzelln.

Un dormit sünd wi wedder bi dei Gräunen. Dei Partei, dei anners, ja bäder sien wull, is œwer dei Oppositschon an't Ruder kåmen un schwemmt nu in'n Strom mit. Wat tellt, dat is dei Macht, ok wenn s' noch deilt is; dat Mallür von Fukushima, dei Ierderwarmung un dei Klimawannel ward gägen Haubitzen un Panzer utschudert. Nich ümmer ward ut 'n Poggenstiert (dat's'n Kaulquappe) 'n Poggenkönig, dei blot Gaudet will un deit; un ok ut 'n gierig Ruup 'n ward nich ümmer 'n smucken Boddervågel, ok wenn man as 'n Chamäleon dei Farf twüschen hell un düster wesseln deit.