Allens in Bodder

vun Heinz Tiekötter


Tweemol in de Week füllt se uns de Breefkassen mit Werbung. No uns Freuhstück kiek ik jümmers mol in düsse Bläder. "Du", segg ik nülich to miene Fro, "se schrieft hier, wat ik all de hele Tiet vertell. Bodder is beter för de Gesundheit as Margarine. De bringt weniger Cholesterin in unse Odern. Un Cholesterin bruukt wi, dormit uns Blootgefäße inwännig nich brüchig ward." "Papperlapapp", anter miene Hübsche, "dat dat nich stimmt, dat weet doch jedet Kind. Du gleuvst ok allens, wat se di vertellt." "Du", segg ik, "ik lees dat nu nich dat erstemol, dat steiht ok annerwo in." "Goh mi af mit all dien Weten, de Doktersche hett mi nüülich erst 'n Faltblatt öber Statine un Lipidsenker mitgeben un in uns Aphtek liggt 'n Barg Böker doröber ut." "Denn bring doch mol son Afhandlungen mit!", bitt ik ehr. Snippisch froogt se trüch, of ik sowat mit miene Schoolbillung öberhaupt verstoh. Wat ik mi allwedder öber de Studierten stellen wull. Ik kunn jo nich mol Latiensch.

Düsse Ort vun ehr joogt mi den Blootdruck in de Heuchte. "Wenn du dat verstohn kannst, dat Margarine beter as gode Bodder sien sall, denn war ik dat woll ok lesen könen." Wütig verschanz ik mi achter mien Kääsblatt. De restliche Tiet vun uns Freuhstück leep so ruhig af as annerswo bi de Taubstummen.

Vun den groten Inkeup an Freedag bröcht miene Fro 'n Handvull Prospekte un en lütt Handbook öber Cholesterinreduzierung no Huus. Se harr all de Aptheken un Reformhüser afklappert. Doch ik weer in de Lehbökeree fünnig worrn un keem mit dat Book "Die Cholesterin-Lüge" vun Professor Hartenbach an Loden. So nu legen de Waffen för uns Gefecht op denn Disch.

"Wat wull du mit dat engelde Book denn all bewiesen?", güng mien Fro to'n Angriff öber. "Egentlich hest jo Recht", meen ik, "lot uns doch mol sehn, welk Experten diene velen Infobläder rutbröcht hebbt." Dat Resultat leeg gau op den Disch: Söss vun de Faltbläder kemen vun de Pharma-Industrie un twee harr de gröttste Margarine-Hersteller rutgeben. All wulln se Geld mit uns Bang verdenen.

Un denn keem mien Tügen, de Pathologe Prof. Hartenbach ut München to Woort. De hett erst vertell, dat de Markt för Cholesterinmiddel öber 4 Milliarden Dollar groot is un dat se dormit veel Geld verdeent. Keen Medikament op düsse Welt ward so veel verköfft as de Cholesterin-Senkers. Un denn schrifft mien Professer, dat de Zielgruppe Johr för Johr grötter warrt. He meen, in dat Johr 2000 hebbt se vertellt, de Lüüd weern gesund, wenn se nich mehr as 260 mg Gesamtcholesterin harrn. Denn hebbt Ärzte un Apthekers so veel "Opklärung" öber dat Cholesterin an de Lüüd verdeelt, dat de nu Bang üm ehre Gesundheit kregen un sik de Statine verschreben loten. Op düsse Oort hett de Pharmaindustrie den dörchschnittlichenCholesteringehalt dooldrücken kunnt. Un so harrst du all mit 240 mg den Kötel in de Büx. Nu weerst du jo wedder öber den aktuellen Referenzweert weg. So kemen se mit de Tiet op 200 mg. Un se vertellt di wedder, dat du krank warrn kunnst, wenn du öber düsse 200 mg liggen deist. Du sasst man fortsens wat dorgegen moken. Harrst du noch 'n heugeren Weert, denn stunn dien Gesundheit op beus wacklige Been. Mit de Statine un de Bang vun uns Minschen achter sik peilt se nu en Dörchschnitt vun 160 mg an. Op düsse Oort krallt se sik nee Bangbüxen.

Wat mien Professer Hartenbach dor schreef, weern keen Argumente för miene Fro. Dat Book wull se ok nich lesen. Se harr wull Angst, dat ik ruutfinn, dat se ok keen Latien snackt. Bi uns stoht nu twee Bodderglocken op'n Disch. In den een is ehre Margarine in. Ik blief bi miene Bodder un feul mi jümmers wohl. Miene Fro müss ik verspreken, dat ik miene Kantüffeln tokünftig nich mehr in Bodder broden warr. Ik nehm nu dörchwussen Speck. De smeckt mi ok veel beter.

Annerlest heff ik leest, dat de Pharma-Industrie seggt, se harrn sik irrt: To wenig Cholesterin is ungesund un mookt de Odern brüchig. Dat weer nich goot för uns Minschen. Ober bi den Blootdruck, dor sullen wi bannig oppassen. Wenn de an 140 rangoht, harrn se 'n godet Middel dorgegen. In Momang weern noch 120 ideal. Ober se arbeit all doran!


25.6.2017


na baven