George Clooney un ik

vun Silke Frakstein

Hach ja, George Clooney. En Mann to'n Hensmölten. — Weet ji dat eegentlich? Ik heff wat mit em. Ok wenn he mit sien Amal verheiroodt is.

Vörher harr he jo dat Hängebauchschwein Max. Dat hett mi ober nix utmookt.

In’n Mai 1961 is he to Welt komen. Also is he en Stier un no dat Boombook en Pappel. Beter geiht dat nich. Mit de beiden Teken kunn ik al jümmers god.

Wi hebbt uns nich oft to sehn kregen. Klor, he leevt in Ameriko un denn de veelen Filme un …. de Froonslüüd.

He weer jo al mol verheiroodt. Doch dat is nix för em, hett he seggt. Dormals! Na, un nu Amal? Wenn de Kinner nich bald kümmt, seggt se Opa to em.

Villicht hett he dorüm keenen Bort mehr? Süht ok würklich beter ut. Fief Johr gewinnt he dormit.

He is jo Sexiest Man Alive. Dat is en internationale Utteeknung vun dat US-Magazin People. Schall heten: He hett Sexappeal. Na, dat mutt ik sehn — an’n Morgen, wenn he ut Bett kümmt!

Ganz annere Sieden kriggt wi nu vun em to heuern. To seh’n nich mehr so. Nu, wo den Folen kümmt, will he geern achter de Kamera stohn, denn Botox will he nich. — Ik ok nich.

He snackt lever intensiv mit „Uns Mutti“ in Berlin.

In’n April, wenn ik in Berlin bin, versöch ik dat ok bi „Mutti“. Heff nämlich ok allerhand vunwegen „wir schaffen das“ to seggen.

Ach ja, George Clooney un ik! Wi leevt so wiet ut’nanner, un doch hebbt wi wat tosomen:

de Gene för dat griese Hoor.

Un dat süht bi uns beide gliek good ut! Dat maakt uns bloots noch sexier. Ik heff dat vun mienen Vadder. Un he? Ik froog em.