Corona geiht in de tweete Runn

vun Katja Renfert

Hüüt fangt also de 2. "Lockdown" an, "Lockdown light" — wat för en gresig Johr, dat Johr vun de Rott.

De Rott. Klick op to'n Vergröttern!

Dörbi hett dat so goot anfungen! An 4. März heff ik to mien Wahnungs-Naver Florian, de as Bühnenmeister an de Hamborger Staatsoper arbeiden deit, seggt: "Endlich is de Oper 'Norma' in Hamborg! As ik de Arie 'Casta Diva' vör Johren in't Radio hört heff, bün ik foorts losscheest un heff so lang söökt, bit ik in en Musik-Laden de Gesamt-Opnahm mit Maria Callas funnen heff."
En Dag later stünn Florian mit 2 Korten för de General-Proov vör mien Dör!

Wat weer dat för mi en Beleevnis! Noch hüüt denk ik doran un bün so dankbor, denn twee Daag later hebbt se dat stoppt — Corona …

Villicht hebbt Se Lust, sik mol de Arie antohöörn...?

In November 2019 heff ik mien tweetes Book veröffentlicht — hier köönt Se beten Proov lesen —, un wieldem dor uk en Wandbild mit twee danzende Fruunslüüd binn is, schull ik dat bi de Vernissage in de "Galerie IMBA" vörstellen, wo Silke Frank den 2013 storven Künstler utstellen wull. Nix —— Corona …

An 2. Mai wull ik denn mien Book bi mien Fründin Bine, de ik siet 2008 kenn, op ehrn "Kunstbagger" vörstelln …

Ik op den Kunstbagger. Klick op to'n Vergröttern!

Nix ——— Corona …

Ik heff mi seggt: Katja, du hest in dien Leven al oftins swoore Tieden hatt un överstahn! Uk wenn dat bannig anstrengend weer: du hest dat jümmers schafft.

Jo, mit mien Steernteken, de optimistische Watermann, pardon, Water-Fru-Geborene, in'n Aszendenten de starke, kämpferische Löövin, heff ik jümmers Lösungen funn.

Nu heff ik opschreven, wat ik allens heff un maken kann!

Ik heff en schöne Wahnung, mit Balkon.
Wenn ik op mien Hängematt ligg, kann ik de Vagels un Katteker in de Bööm op de Wisch achter unsen Huus sehn.

Ik heff noog to eten un to drinken, ik heff mien Musik-Instrumente — Keyboard, Ukulele, Blockflöte, Mundharmonika, Chromonika, Kastagnetten, Tamburin, de ganzen CDs. Ik kann also Musik maken un hören.
Ik heff Telefon un Internet un kann in de Mediathek Filme kieken. Ik heff vun de velen Tuusch-Ecken in Hamborg veele Böker.
Ik dörv vun unsen Ingang bit to'n n neegsten den Goorn maken. Alleen de Lindenbööm vör unsen Huus sorgt daför, dat ik meist GartenPflegeSport maken kann — in't Fröhjohr Lindenblüten wegfegen, nu sünd se fast fertig mit de veelen Blöder. Dörbi heff ik meistens uk nette Klöönsnacks mit de Lüüd, de ut unsen Huus kümmt or Lüüd, de vörbi gaht. Un ik do wat för de Natur, denn bi mi dörft keen vun de Goornarbeiders mit'n Püster or sonstwat dran. Hecke, Rasen, allens maak ik mit Handarbeid.

Un as ik güstern dörbi weer, ole Planten aftosnieden, hett mi'n lütt Rootboost tokeeken. De sünd so totrulich, dor geiht di dat Hart op.

Achtern in'n Goorn heff ik, uk as vörn, överall Water för de Vagels. Dor köönt se drinken un in Sommer baden.

300 m wieder is de schöne Park "Planten & Blomen" — dor kann ik jeden Dag spazeern gahn.

De Heinrich-Hertz-Toorn in "Planten un Blomen". Klick op to'n Vergröttern!

Uk nun in'n Harvst is dat dor jümmers schön.

"Planten un Blomen". Klick op to'n Vergröttern!

Wat ik vermissen do, is mien ünnerwegens ween — spontan af to'n Bus or Bahn, or in en Utstellung, in't Museum, in't Konzert... Aver wenn ik de Blöder in de Bööm ruuschen hör or den Regen, kann ik mi vörstellen, dat is dat Meer.

Wat ik uk vermissen do, is, dat mi mol wedder en in'n Arm nimmt.

Vun de Künstlersch Rosa Treß heff ik mol in Kiel "The Hug" (dat heet etwa "Dat Knuddeln") fotografeert. Dat heff ik an mien Wand hängen un stell mi vör: dat is en, de mi drückt.

Un ik heff nette Naverschap, ik bün gesund, un ik versöch, dat Beste ut de Situation to maken. Un wenn ik nich jümmers ünnerwegens bün, kann ik endlich mol de Saken in mien Wahnung maken, de al lang dorop töövt, dat ik dat do!

Wat will ik mehr? Dat ik gesund bliev, un dat wünsch ik jüm all!