Frohe Coronoostern!

vun Behrendt Böckmann


Leiw Plattsnackerfrünn': Ein Johr is üm un wi sünd ümmer noch dor, wo wi vör 'n Johr ok wiern: Ostern allein tau Hus! Œwer wi låten uns nich ünnerkriegen un hollen wiederhen mit Afstand tausåmen.

Ostern 2020 un Ostern 2021?

Dat wier bi uns dei Weltenlop,
Ostern keem dei Sipp tauhop:
bi Schnei un ok bi Sünnenschien
bröcht dei Hås farwt Eier fien,
doch Twinnigtwinnig wür uns klor,
nix is so as alle Johr,
denn jederein süll Afstand hollen,
ganz besonners tau uns Ollen,
as Corona leech in't Nest
tau dat leiflich Osterfest.
Fautball, Oper kannst vergäten,
inne Wirtschaft kannst nich äten,
sülfst wenn dei Hor ganz wiet afståhn
kannst du taun Barbier nich gåhn,
denn dat deit blot würklich gäben,
wat nödig is för't däglich Läben.
Blief tau Hus un gåh nich rut
un holl dat in dei Wåhnung ut,
denn dei Sük nich denn beföllt,
dei sik in sien Hus uphöllt.

So schräben wi up olle Oort
an gaude Frünn 'ne Osterkort.
Mien Ollsch dei hett ehr Freud doran,
dat's gaut mit Technik ümgåhn kann,
un skeipt nu mit ehr "Smartphone"
äbenwech in Bild un Ton,
schnackt mit dei Kinner inne Fiern,
denn seihen wull sei gor tau giern,
wat dei denn för Gesichter måken
tau dei schönen Ostersåken.


Dei Hås in'n Coronatieden

Nu hett dei Hås ok dorvon hürt,
wat tau Ostern uns malürt:
Ut is dat mit denn Utrauhdåch
gägen dei Coronaplåch,
doch hei hürt nu Minschen singen:
"Dei Hås, hei sall dei Sprütt mi bringen,
denn dei wier nu dat Allerbest
in't Corona-Osternest!"



4.4.2021


na baven