Noch öllere Daagbook-Notizen vun Marlou


6.9.02 ...."Duell": Nich ankieken! ...

... wull ik schrieven; kiekt ji sik dat "TV-Duell" nich an, laat ji sik nich verdummdüveln! Leest lever de Programmen vun de Partein! De Websieden vun de Partein kennt ji ja alle (www.xypartei.de). Boykotteert den Duell-Wahnsinn, dat Afstimmen över "Sympathiepünkt" per Knoopdruck-Fallbiel, de Hollywood-Demokratie! Benütt Juun Kopp, nich den Buuk!

Dat wull ik schrieven — un denn passeert sowat. De Amrikaaner gaht balstürig op Krieg los, un wi mööt rutkriegen, wokeen vun us Partein us dor best ruthollen kann; mehr noch, wokeen dat an't best verhinnern kann. Een Saak, to de in de Parteiprogrammen so nix steiht. Mööt wi us nu dochen dat "Duell" andoon, dat wi to höörn kriggt, wat de twee Elefantenpartein dorto seggt? Mööt wi doch de poleerten, instudeerten Posen duren? Un seggt us dat denn wat? Sünd dat allens nich bloots Wöör in'n Wind, wat de dor seggt? - Dat eerste Duell heff ik ja mit Spood boykotteert. Wenn ik mi düt Duell nu ando, denn warrt dat een grote Tafel Schoklaad dat Leven kosten. Un ankieken orrer nich: jümmers gellt: Benütt Juun Kopp, nich den Buuk!

P.S. Hebbt Ji dat mitkregen? De twee Fruuns, de dat "Duell" nu managen warrt, warrt vun anner Lü an'n mehrsten fraagt - na? wat? wat se de Kandidaten fragen warrt? wat se sülven vun de Kandidaten hollt? - Nee! Nix vun dat; de wichtigste Fraag is:

"Was werden Sie anziehen?"

De Welt is doch to'n Knuddeln, nich?


22.8.02....Schiller un de Klimawannel...

...hüüt mal op Hoochdüütsch, avers bloots, wieldat Schiller sin "Glocke" op Hooch schreven hett; un de Reeg "Denn die Elemente hassen..." heff ik jüst ziteert höört as Kommentaar op dat Hoochwater.

"denn die elemente hassen das gebild der menschenhand" —
ham uns lange machen lassen beinah hat uns der verstand
unterdes schon ganz verlassen; uns gefällts auch, dass der tand
immer neu muss weil die kassen davon klingeln; mal das land
ganz und gar verwüsten lassen nützt dem bau, dem mittelstand;
öl? in unbegrenzten massen haben wir das zeugs verbrannt
nicht so sehr weil wir es hassen hassen ist uns unbekannt
aber alles anzufassen ham wir niemals scheu gekannt
und wieso nicht weiterprassen? wozu dauer und bestand?
dass wir uns was einfalln lassen, dafür sind wir doch bekannt
und genügend arrogant, uns drauf zu verlassen;
also liebe elemente stellt euch nicht so zickig an
als wenn da was schiefgehn könnte — auch egal — no risk, no fun!


3.8.02 ....Zippeln ut Nieseeland

Schiet, bün vundaag nich mehr op den Markt kamen. Frische Zippeln bruk ik avers doch. Also haal ik poor in'n Supermarkt.

Ik tru min Oogen nich. "Herkunftsort: Neuseeland" steiht bi de losen Zippeln. Ik kiek foorts na de afpackten Zippeln in't Nett, schoonst ik so veel gor nich hebben wull. "Herkunftsort: Neuseeland" steiht ok bi de afpackten Zippeln. Wasst bi us to disse Johrstied villicht keen Zippeln?!

Min Vörslag: För elk Waar warrt een nieges Kriterium inföhrt, de Kilogrammkilometer. Dat heet: Wenn in'n helen Produkschoonsprozess vun een Waar 1 Kilogramm Substanz (vun jichtenswat) 1 Kilometer wiet transporteert warrn mutt, warrt dat in düt Kriterium fasthollen. Wenn 500 kg 80 km wiet transporteert warrt, gifft dat 500x80=4000 Kilogrammkilometer. Un düt Kriterium warrt bestüert. Dennso höört dat nämlich op, dat se de Joghurts to'n Todeckeln 400 km wiet fohrt. 150 g Joghurt sünd 0,15 kg mal 400 km, dat kost orrig Stüer, dat maakt düsse Waren dürer. De hiesigen Waren hebbt denn betere Marktchancen, un de "Ümwelt" (dat heet: de Welt) warrt schoont. -- Un een Kilometer Transport mit dat ümweltschädlichste vun alle Transportmiddel, dat Fleegtüüch, tellt sößfach!!

Natüürlich warrt dat sowat nich geven. Wi hebbt to'n Verhinnern vun sowat ja Europa, un överhaupt: Sünd wi nu globaliseert orrer wat?! - Ja, avers globaliseert hebbt wi bloots de Weerschap. Nich de Vernunft, nich den Schuul vun'e Ümwelt. Bloots de Globus sülm is liekers global; jichtenswenn kriggt wi de Quittung för uns Hanneln, för de Zippeln ut Nieseeland. Wi mööt den wahren Pries betahlen - wi un de ärmsten Minschen op de Welt, de an'n mehrsten ünner Klimawannel un Globaliseern to lieden hebbt.


23.7.02 ....Den Düwel mit'n Beelzebub - ? Orrer bloots dat Kind mit dat Bad utschütt?

Vör 10 Johrn - 1992 - hett de Mafia in Sizilien den Richter Giovanni Falcone ümbröcht, de ehr verfolgen dä. Avers se hett nich bloots em ümbröcht - nee, sin Fru un sin Liefwächters alltohoop, fief Personen. So stark weer de Bomb. Villicht erinnert ji sik an dat Foto -? den Bombenkrater op'e Straat? Avers de Straat weer weg - dor weer bloots noch een Trichter, wied un deep as een Huus; fief Unschüllige, dorto Recht un Höpen - allens leeg doot in den Bombentrichter.

Düt Foto heff ik nie vergeten. De Bombenkrater sülvst in sin Grött weer dat Gruun: De weer dat Drauhn, dat Ankünnigen, dat se vör nix Halt maakt, dat se ahn Skrupeln allens daat, wenn een jüm verfolgen deit. De mutt starven, egaal wat dat kost; egaal, waveel Unschüllige mit em starven, un wenn de Bombentrichter so groot as de ganze Welt würr: Hauptsaak, de jüm verfolgt, is doot.

So maak dat domals de Mafia. - Vunnacht hett de israeelsche Armee fief Hüüs mit een Bomb toschannen maakt. 15 Minschen sünd doot. De jüm verfolgen dä, weer dorbi.


19.7.02....De Lösung:

Dat Verteidigungsministerium övernimmt Ron Sommer. De hett ja nu noog Tied. Denn deit he dormit dat eenzige, wat he kann: He privatiseert dat un bringt dat an de Börs. De Bundeswehr kümmt an de Börs! - Sülvstredend mööt denn avers ok annere Privaatarmeen in Düütschland tolaten warrn; dröff ja keen Monopol mehr geven! De kaamt ok alle an de Börs. De Wehrpflicht warrt afschafft. De Bundesregeern kann denn bi jeden Verteidigungs-Opdrag nafragen, wokeen dat an'n billigsten maakt. Kann Kostenvöranslääg inholen för een Afghanistan-Insatz un för een Mazedonien-Insatz orrer ok för een Express-Akschoon t.B. bi een nieges Hoochwater an'e Oder. Un de beste un billigste Anbeder kriggt den Opdrag. Dat spaart Geld!!! - In'n europääschen Rahmen köönt denn natüürlich ok de Anbeder ut dat Utland op unsen Markt mitbeden. Villicht verteidigt denn ja mal de Armee vun Frankriek Düütschland! Wieldat se'n Opdrag kregen hett.

Op'n internaschonaalen Militärmarkt warrt de USA denn wiß de Marktföhrers ween mit jümehr Hoochpräzischoonswaffen. Avers dür warrt se ok ween. Un blangbi scheten un Unschüllige dootbomben, dat geiht denn nich mehr, Jungs! Denn gifft dat nämlich Regress - dor kriggt ji denn keen Geld mehr för!

Jo, dat is de Lösung. Ok, meen ik, för de Arbeitslosigkeit. - Un de Telekom? Wokeen reet de ut'n Düstern? Na, dat maakt denn Manfred Krug!


14.7.02 ....Biedermeier-Navelschau

Kann't angahn?! De Diskuschoonen in't Kiekschapp. "Wokeen schafft Arbeitsplätze?", "'keen hett dat betere Weerschapskonzept?", "wat kümmt na Ron Sommer?", vun fröh bet laat. De Talkshow vun Christiane Sabinsen, alias Sabine Christiansen, is de leegste. De sünndäägliche TV-Götzendeenst: Nix as Binnen- un Weerschapspoletik. Een Navelschau, een Rüchtoog op sik sülm as in't Biedermeier. Un dat merrn in de globaliseerte Welt! Avers vun de Welt is nix to sehn. Gifft dat noch Gegenden buten vun de Grenzen vun Düütschland? Passeert dor ok noch wat? Ja, avers bloots, wenn sik dat op uns Weerschap utwirken deit. Süß existeert dor nix. Kunnen in uns Nahverslänner Wahlen ween, kunnen Kriege ween, höörst nix vun. Sietdat wi de Globaliseern hebbt, gifft dat keen Welt mehr. Paradox? De Welt is tosamensnurrt op de Standoortkonkurrenz. Wokeen weet noch, wat in de Welt passeert? Wokeen würr weten, wat för'n Unrecht in Afghanistan losweer, wenn nich poor Lü in New York Hoochhüüs kaputtmaakt harrn? O ja, dat kaputte Hoochhuus, dor keken wi op. Weer jo "bi us", in uns Deel vun'e Welt. Kunn us drepen. Dat weer süß noch vundaag nich anners in Afghanistan. De kunnen sik bi Bin Laden bedanken. Avers wi hebbt nix lehrt. Sünd sachen wedder inslopen. Bet denn wedder'n Hoochhuus fällig is. Goodnacht, Fru Sabinsen.


8.7.02.... Snickenslalom

De ganze Landstraat is nu een eenzig groot Snickenmassaker. De dösigen Deerten stört sik in Koppeln vun Stücker föfftig tohoop op'e Straat — ok op'e Autobohn, bang sünd se ja vör nix. Un dat is jüst dat Malöör. So'n Snick hett ja nich grood 'n groten Bregen, de Stratenverkehrsorrnung hett dor keen Platz. Avers kiekt een jüm ut'e Neegde an: de ganze Lief spannt in de Richt, de se sik mit düssen lütten Bregen vörnahmen hett; de ganze Snick is Richtung, langsame, taagnackig Richtung; ehr weke Lief nakelt; un ehr dörsichtig zaarten Föhlers mit de Oogen na baben reckt, na Heben to, so anstrengt, dat de halve Snick vörn mit na baben kümmt — na, kort seggt, de Snick is een Embleem för'n Minschen (orrer för wat Beteres as'n Minschen) un de Minsch ok bloots een Snick — nich veel klööker, nich veel gauer. Un wat nu de Snick dösiger is as de Autobohn orrer annersrüm, dat wull ik nich fastsetten möten! Bloots de Snick weer toeerst dor.

Ik fohr jüm nich doot! Dat weer mi een Gruul, so een zaarten Snickenkopp mit dat Paar Oogen vull Schu un Erwarten to Matsch to rullen mit so en grote dösige Maschien. Ik fohr Slalom üm de Snicken. Mutt een even oppassen. Woans de Snicken sik vull Schu un Erwarten na vörn un na'n Heben reckt, dat is en Embleem — för jichtenswat. Se sünd dree Zentimeters hooch un ik 170, avers de Heben is glieks wiet weg för us all.


7.7.02...."Quäl dich, du Sau!"

"Tour der Leiden" nöömt se dat, wat nu wedder anfangt un offischiell Tour de France heet. Un den Toroop "Quäl dich, du Sau!" hett een vun de Fahrers doch wohraftig to höörn kregen. Avers - se daat dat ok! Se quäält sik so, as een dat för unmööglich hollen würr, dat een Minsch sik sülven so quälen dä. (Dat Minschen eenanner so quäält, doröver wunnerwarkt wi ja all lang nich mehr.) Sik sülven quälen! Dor mutt doch wat verkehrt ween. Dat is doch nich richtig! To'n Quälen sünd doch de annern dor!!

Du quäälst di also sülm. All lang büst du an din Leistungsgrenz un büst doch dorbleven. Nu is de Lief an'n Enn. Elk Zell rebelleert, elk Fees hett Pien, Hannen, Fööt un Tung brennt di. Din Lief hett di nich in'n Stich laten, avers nu jankt he na Verhaal. Din levig Lief fleht di üm Gnaad an, man du löttst em nich. Woso nich? Büst du een Minsch op de Flucht - een vun de Millionen Minschen op de Flucht? Wokeen is achter di? Fienden? De Doot? - Nee. Radfohrers, Tokiekers un Geld. Veel Geld.

Man, de Ruhm. Ah ja. De Ruhm. - Is de wichtiger as dat Leven? wichtiger as din egen Wörd? Dat gifft so veel Quaal in'e Welt, dat dat een Schann is, ehr noch to vermehrn - un wenn dat ok an'n egen Lief is. De Lief - ok de egen! - is een achtensweert Leevwesen, nich een Saak. Un wenn din Lief seggt, "ik will nu pattu in'n Schadden liggen un dat geneten, un wat to snopen kunn ik ok verdragen" - un dat is in din Riekwiet: woso nich? Mennig quäält Lü hebbt dat nich in jümehr Riekwiet. Sik sülm unnödig quälen deit de Lü Unrecht, de sik dat nich utsöken künnt. - Quääl di nich, Söög!



na baven