Wer tröck dat betere Loos, Dannboom oder de Wiehnachtsgoos?

vun Addi Kahl

Een smucke Dann stünn versponnen mang Süstern un Bröder in Woold.
Dat güng op Wiehnachten to, as se düssen Snack hör, würr ehr in’t Hart bannig koolt:

„De Menschen hebben denn Bruuk, sik de piel wussen Bööm dor ruuttosagen,
un allens blots wegen de poor korten, fierlichen Wiehnachtsdagen?!“

Dat kunn de lüttje Dann nu avers bi besten Willen överhaupt nich verstahn;
wodennig laat de Minschen eerst so an de söven Johr düsse intensive Pleeg vergahn,

un laten ut so ’n luurlütten Steckling stolte Twee-Meter-Dannen wassen,
so as uns Dannen hier in överall in ’t Heegholt un ok woanners in riesige Massen.

Un so kööm denn ok för de lüttje Dann veel to fix dat so gresige Ennen.
Total verfeert hör se agressive Motorsagen gnetern, un denn düsse Wenn’,

in bunten Smuck to lannen in jichtenseen överhitzte Wiehnachtstuuv!
„Dat weer’t denn wull“, vertwiefel de Boom „komm ik hier nochmool lebennig ruut?“

Tröck he denn nu as Dannboom dat betere Loos, oder villicht doch eher de fette Goos?
Kiek mol, dat Deert hett doch nich mol för een Johr to leven ’ne reelle Chance.

"Ach wat? Nich?"

Över lange Maanden Pleeg över Pleeg, aver denn to Wiehnacht as Braden opeten,
wat je ’ne Dann nich tostöten kann — Twiegen mit Nadeln to Meddag kannst du vergeten.

In niege Frööhjohr allerdings ward se insammelt un opstapelt för hitte Biikefüür,
un so is so ’n Dannboom, tweemool to bruken, egens ok nich to düür.

Bild: Erwin Holldorf

Wenn so’n allerdings gröter ward, kann man ut em fienste Breder ruutsagen,
üm in mancheen warme Stuuv as Bökerschapp to ennen för lange Johren un Daagn.

Vördeel för denn Dannboom: man kann em ok to Biokompost schreddern.
Vun de Goos blievt blots afnagte Knaken, eventuell noch ’n poor Feddern.

Aver’n Dannstämm laat sik to Viskose verarbeiten för fienstet Büttenpapeer,
wat weller wunnerboor to gebruken is för ’n Riemel, as nipp un nau dat hier.

Also, wer tröck denn nu dat beter Loos, fraag ik, ward wi de beiden gerecht?
Egaal, ob een Johr as Goos oder söben as Dann, so een Afgang is slecht.

Dat endt jümmer in en Füür!