Vulle Transparenz: Wahlurne

Uns Demokratie prosperiert

vun Behrend Böckmann

Wåhlen taun Bundsdach un Landdach ståhn vör dei Dör. Dat is nich tau œwerseihn, wenn man ünnerwägens is. Œwerall grienen einen Kannedaten vonne Lüchtenpåhls an, männigmål gliek drei œwereinanner. Un dor, wo dat in'n Urt näben dei Stråt noch 'n Gräunstriepen för jedeneinen gifft, grienen einen noch Kannedaten von'n Grotflächenreklåmeschild, 'n sogenannten "Wesselmann" von Ooch tau Ooch an. Dat näumt sik Wåhlkampf up "mobile Großflächen", un den Tauschlach för disse Oort Reklåmearbeit kreech bet up den hütigen Dach all 1965 dei Firma "Wesselmann Werbung GmbH" mit Sitz in Bochum/Wattenscheid. Dei 3,60 m × 2,90 m groten Sonnerplakaten, disse "Wesselmänner" inne Språk vonne Polletikers, warden von bet tau 600 Helpers von 120 Näbenstäden ut upstellt, wedder inhålt, repariert un för't dei neechste Reklame upwohrt. Un dat allens möt dei Stüertåhler berappen — œwer Demokratie gifft dat nu mal nich gratis, un för uns rieket Düütschland is dat ja würklich för dei Katz!

Unwillkamene Straten"smuck"

Uns Demokratie hett in't Œwereinsien mit dat Grundgesetz ok Spälrägeln: Wecker ihrenhafte Börger dörp wählen un sik wählen låten? Wat is nödig, üm as Kannedat up 'n List tau kåmen? Wennihr kann man 'n Partei grünnen? usw. Näbeni anmarkt, dat willen 47 Partein, dorvon sogor 40 mit Landslisten, in'n Bundsdach intrecken, dorünner näben dei uns bekannten as CDU/CSU, SPD, FDP, Linke, Gräune un AfD ok dei Ökologisch-Demokratische Partei, dei Partei "Mensch Umwelt Tierschutz", 'n Marxistisch-Leninistische Partei, Friee Wählers, 'n Nationaldemokratische Partei, Biertrinker- un Spaßpartei, Die Partei (Satirepartei), dei "Dritte Weg"-Partei un noch ganz väle anner. Dat is 'n säker Teiken dorför, dat nich blot uns Wirtschaft prosperiert, sonnern ok uns Demokratie. Ümmer mihr inne Wirtschaft bringt 'n gaudet Läben un ümmer mihr Demokratie bringt jedeneinen dei nödige Ihr. Un nå dei Devise "Wi schaffen dat", wenn dat üm dei Upnåhm von Frömde geiht, so warden wi ok mit dei polit'schen "Rottenfängers" fardig, sülfst denn, wenn's all as dei Gaulands inne Parlementen sitten un up Kosten von'n Stüertåhler düchtig afkassieren.

Ach ja, un ehr seht wi nu ok nich mehr! Tschüß!

Wootbörgers. Teknen vun Rudi Witzke

Nähmen wi mal dei Rottenfängers von'n "Drüdden Wech" mit Sitz in Wiesbaden, dei 'n "düütschen Sozialismus in'n grotdüütschet Riek" schaffen willen un in Würklichkeit noch rechter as dei AfD sünd. Mit Akschonen un Ünnerschriftensammlungen måken's för ehr Programm Reklåme. So würn Akschonen gägen den "Sprüttenterror" in Magdeborg organisiert, in Grimma/Sassen gägen dei "Coronadiktatur" trummelt un in Güstrow dusend Protest-Ünnerschriften gägen 'n "Islamisches Bildungszentrum" sammelt. Pegida, Dwerdenker, AfD, Identitäre Bewägung un anner Gruppen, dei sik för "biodüütsch", "völkisch" un frömdenfiendlich utgäben —— kœnen sei uns Demokratie würklich nicks andaun?

Välerurts inne Welt nimmt man sik nich tauletzt mit "Ehe för all" 'n Ogenspeigel an uns Demokratie, doch twinnig Johr hemm' wi up uns Oort vergäbens versöcht, dat 'n sik an'n Hindukusch bäten wat von uns Demokratie afkieken wür. Kœnen wi uns noch wiederhen vör dei Bost kloppen un seggen: "Dat höllt uns Demokratie ut!"?

Uns Demokratie gifft jeden dat Recht, ludhals up'e Stråt tau kråkählen, wenn hei sien Plichten as Börger inhöllt. So künn Martin Schulz för dei aflopen Wåhltiet verkünnen: "Ik bün dei niege Bundspräsident" un Michael Sack för dei itzigen Landdachswåhlen in MV "Ik bün dei niege Ministerpräsident". Dei ein is nich Kanzler worden un dei anner hett sik wull ok verkalkuliert, wenn man Ümfrågen Globen schenken deit.

Vernünftige un Dörknallte — all kriegt se ehr Wahlünnerlagen...

Gunst un Afgunst spälen bi Wåhlen ümmer 'n grote Rull un all, dei up 'n Sessel in 'n Parlement spekeliern, dei vergäten, dat dei Afgunst eins Kain dortau dräben hett, sienen Brauder Abel mit 'n Stein vör 'n Kopp dod tau schmieten. Woans fäuhlt dei lütte Mann, dei nich dat Inkåmen von'n Bankdirekter hett, nich as 'n Privatpatschent in 'n Krankenhus ümsorcht ward, sien Rent nich mit dei Pangschon von'n afdankten Minister verglieken kann, dei tau den Lohn för sien Arbeid noch "upstocken" möt?
Dat Wirtschaft nich unendlich wassen kann, dat hett dei "Club of Rome" all vör väle Johren begrünnt; ob Demokratie wiederhen so prosperieren kann, dat warden dei Wåhlen wiesen.