 |
vun Behrend Böckmann Dat vergeiht hüt ja binå nich ein "Torkrunn", wo nich ein sik klauk gäbender Minsch ut 'n Denkfabrik tau Wurt kümmt. Dorbi heit dat in'n Lüdschnack: Dei Minsch sall nådenken un nich denken, dat Denken süll man dei Pier œwerlåten, denn dei hemm' den grötteren Kopp. Un wenn ein/einer secht: "Ik denk mi dat so!", denn möt dat, wat sei/hei sik denken deit, noch lang nich wohr sien! "Ik heff dacht, dat wier Kauhschiet, un in Würklichkeit wier't Hunnkœtel!", secht dei lütt Jung tau sienen Vadder, un dei antert blot "Sik irren is minschlich!" Œwer kåmen wi von'n Lüdschnack up uns Denkfabrik taurüch. Tauierst föllt up, dat dei Denker inne Denkfabriken dacht hemm', dat 'n in Düütschland nich mit dinglisch Wür as Skrollen, Schillen, Bäsching, Juser, Händy orrer Äwoar dat Upseihn schafft, wat nödig is, üm dei Produkten ut 'n Denkfabrik ok gaut tau verköpen. Ut dissen Grund hett man sik nich dat Wurt "think tank" ut Amerika anfrünnt un dorför dat düütsche Wurt "Denkfabrik" erfunnen.
Dat Wurt "think" deit inne inglisch Språk "denken, glöben, annähmen" un "tank" 'n Panzer orrer 'n Fatt för Wåder un anner Natt bedüden. In Verbinnung von think un tank kreech "think tank" all inne Tiet von 2. Weltkrieg dei Bedüdung von Lihranstalten, in wecker dei taukünftigen Staatsbeamten för dei Verwaltung utbillt würn. Hüt sind "think tanks" Inrichtungen orrer Institute, dei dei Richtung för dei Entwicklung in Poletik, Wirtschaft un Gesellschaft vördenken un so ehrn Geldgäber beråden. Dat gifft dat nu ok in Düütschland un man denkt in Farwen as schwatt, rod, güllen, gräun, in Rägenbågenfarwen un inne Trendfarf Veri Peri, in Saharagäl un Algengräun usw.
So as Poggenstäuhl ut't Mosch scheiten, so scheiten dei Denkfabriken ut'e Ierd. Näben mihr as 100 staatlich Unis, äbenso väl private Hochschaulen un knapp 250 Fachhochschaulen gifft dat tau Tiet mihr as 200 Denkfabriken in Düütschland. Sei warden ünnerhollen von Stiftungen, Innungen, Verbänn', den Staat un private Geldgäber. Œwer dat, wat dei Denker inne Denkfabrik denken daun, sall gauder Rat för Poletik un Wirtschaft sien un den münnigen Börger wiesen, woans hei tau denken hett.
Dei Denker von uns einstig Kriegsministersch von der Leyen wullen den Stüertåhler verkloren, dat teihn Milljonen Euros för dei Reparatur von't Schaulsägelschipp "Gorch Fock" gaut anlecht sünd, denn up son'n Schipp kann jeder Düütsche stolt sien. Harrn dei Denker bäten nådacht, denn wiern's ihrer up dei endlich würklichen Kosten von 135 Milljonen kåmen. Un dei Denker ut'e Scholzsche Denkfabrik hemm' dei Gefohr ut'n Osten nie uplecht un em dei Tiedenwenn' so verklort, dat hei ut dissen Grund 100 Milljarden för dei Bundswehr locker måkt, dormit Düütschland sik in'n Iernstfall verdeffendieren kann. Männig Denkfabrik secht von sik, dat dat, wat sei måkt, Spåß måken sall un dörch den Spåß niege Infäll upkåmen, dei dei Welt verännern kœnen. Un dor läs ik wat vonne Denkfabrik "Niege Arbeit", dei Denkfabrik "Energiewenn'", von'n Denkfabrik "Nahverkihr", 'n Denkfabrik "MV-Bike" un 'n Denkfabrik "digitale Gesellschaft", von'n Denkfabrik "Klimaschutz" in Bollewick bi Röbel, von'n Denkfabrik in Elmenhorst bi Rostock mit klauke Infäll för dei Landwirtschaft, von'n Denkfabrik in Stralsund, wo man erfohrn kann, woans man as Ünnernähmensgrünner mit Minschen ümgåhn möt. Ok för den Frömdenverkihr gifft dat 'n Denkfabrik, in wecker Denker sik utdenken, woans mit dei Devis' "MV tut gut" orrer dei Devis' "MV — Land tau'n Läben" so Reklåme tau måken is, dat MV noch vör Bavaria dat Verhålungsland Nr. 1 in Düütschland ward. Un wenn dat so kåmen sall, denn süll man mien Denkfabrik "Plattdüütsch" nich buten vör låten. So as dei nuurddüütsche Patschent fixer wedder gesund ward, wenn dei Dokter orrer dei Doktersch mit ehr orrer em Platt schnackt, so künnen ok dei Gäst dat Janken nå noch mihr "MV deit gaut" kriegen!
27.11.2022
|
