Dunnerlüchting!

vun Behrend Böckmann

Siet mihr as 25 Johr säuken jedet Johr dei Heimatverband un dat Reuter Museum Stemhagen das schöste plattdüüsche Wurt, denn schönsten Utdruck un denn schönsten Lüdschnack. Dit Johr wier Dunnerlüchting dat Siegerwurt.

Dunnerlüchting — dat is, as wenn Blitz un Dunner tau glieken Tiet rünnerkåmen, un liekers schlööcht dei Blitz nich in. Bi dei Utwåhl för't plattdüütsche Wurt 2022 hett dat œwer inschlåhn, denn dit schöne plattdüütsche Wurt wür dat Siegerwurt. Dörch dei Ennung "ing" in Dunnerlüchting kümmt taun Utdruck, dat 'n œwer wat wunnern deit, wat 'n so gor nich för mœglich hüll. Man möt sik so wunnern, dat einen dei Sprak wech blifft, dat 'n platt is, dat dat nich tau glöben is...

Männigein in't Holstein'sche is ok platt, wenn dei Muskanten vonne Grupp "Donnerlüchten" spaßigen Rock up Platt taun Besten gäben. Taun schönsten Utdruck wür "tippschnacken" kürt, disse Utdruck steiht für dat hochdüütsche Wurt "chatten", wenn denn dei Minschen mit 'n Knopbuurd vör'n Klappräkner sitten. In't verlädern Johr hett 'n Schäulersch ut Demmin mit "rümbutschern" as besten Utdruck wunnen, dit Johr hett's wedder mitmåkt — un dei von ehr vörschlåhn Rädensoort "Een vergnöögt Hart is better as'n Büdel vull Geld" wür die ierste Platz tauspråken ünner dei Lüdschnacks.

Un dat Wäder is ja ok jüst passlich tau dat Thema:

Dunnerlüchting

An'n Häben trecken düster Wulken,
Sei trecken, schwarken, bülken, schwulken.
As dat so schwulkt un grummelt sacht,
Ward't düster gråd as inne Nacht,
Dat süht dor hinnen mulmig ut;
O kiek doch mal nå buten rut!
Sonn Rägenbülk, dei lött all åhnen,
Dor treckt sik ornlich wat tausåmen
Un jederein süht dat wull pricker,
Dei Rägenbülk ward ümmer dicker.
Un wenn di denn up einmål dücht,
Dat dor nu wat an'n Häben lücht,
Denn stickt uns Petrus Füer an,
Wat man wiethen all seihen kann;
Sien Füer is wiet œwer't Land
As Wäderlüchten gaut bekannt.

Dei olle Petrus ward ganz krägel,
Nu schuuft hei dor båben Kägel!
Man hüürt sei ierst ganz liesing grummeln,
Bet sei denn ümmer luder rummeln.
Denn Wind lött hei dortau noch susen,
Ok ierste Druppen rünnerbrusen,
Doch Blicks un Donner sünd noch wiet,
Sei kåmen nich tau glieken Tied.
Denn ward dat Füer ümmer heller,
Schient inne Ogen ümmer greller,
Un keemen's beid mit einen Mål
As Dunnerlüchting tau uns dål,
Måkt Dunnerlüchting all sihr bang —
Wi harrn an't Hus kein Wäderstang.

Dat schlimme Wäder ward noch schlimmer
Un dorüm sitten wi as ümmer
Antreckt, as künnt't up Reisen gåhn,
Wenn denn süll dei Blitz inschlåhn;
Un schlöcht hei in, kolt orrer hitt:
Ok dei Popieren mœten mit,
Un inn son lütten Kuffer fien
Harr Mudder den Versicherungsschien,
Dat Stammbauk un all dei Popieren,
Dei in son'n Brandfall nödig wieren.

Kümmt dei Sünn denn wedder rut,
Is mierstens dat Gewidder ut
Un bläben sünd blot grote Pütten,
An dei vergnäucht dei Schwœrken sitten.